ރޯދަމަހު ހާމަކަން ބޮޑުގޮތެއްގައި ފަތުރުވެރިންނަށް ކާން ދިނުން ހުއްޓާލަންޖެހޭ: ވަޒީރު ޑރ. ޝަހީމް
ލިޔުންތެރިޔާ
ޚަދީޖާ އަރުފާ
ބަރަކާތްތެރި ރަމަޟާން މަހުގައި، މީހުން ދިރިއުޅޭ ރަށްރަށުގައި ރެސްޓޯރަންޓް ފަދަ ތަންތަނުގައި، ހާމަކަން ބޮޑު ގޮތެއްގައި ފަތުރުވެރިންނަށް ކާން ދިނުން ހުއްޓާލުމަށް އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު އެދިވަޑައިގެންފިއެވެ.
"ރަމަޟާން މަހުގެ މަތިވެރިކަން" މަޢުޟޫއަށް ޚާއްސަކޮށް ރޭ އޮތް މި ރަމަޟާންމަހުގެ ފުރަތަމަ އިހްޔާ ފޯރަމްގައި ތަޤްރީރު ކުރައްވަމުން ވަޒީރު ޝަހީމް ވިދާޅުވީ، ރަމަޟާން މަހަކީ ޙުރުމަތްތެރިވެގެންވާ މައްސަރެއް ކަމަށެވެ. އެހެން ކަމުން މި މައްސަރުގެ ޙުރުމަތާއި ޤަތަރު ހިފެހެއްޓުމަށް ވަޒީރު ވަނީ އެންމެހާ ދިވެހިންގެ ކިބައިން އެދިވަޑައިގެންފައެވެ.
މިއީ އަޅުގަނޑުމެންގެ އިސްލާމީ އަޤީދާއާއި އިސްލާމީ ސަގާފަތާ އިސްލާމީ އުއްމަތުގެ ވަރަށް މަތިވެރި މޫސުމެއްކަން އަޅުގަނޑުމެން ހަނދާންކުރަންޖެހޭ.
އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު
ވަކިން ޚާއްސަކޮށް ލޯކަލް ޓޫރިޒަމް އޮތް މީހުން ދިރިއުޅޭ ރަށްތަކުގެ މީހުން ރަމަޟާން މަހުގެ ޙުރުމަތަށް އުނިކަން އަންނަ ފަދަ ނުކުރުމަށް ވިސްނަންޖެހޭނެ ކަމަށް ވަޒީރު ވިދާޅުވިއެވެ.
ރެސްޓޯރަންޓް ފަދަ ތަންތަން ހުޅުވައިގެން، ހާމަކަންބޮޑު ގޮތެއްގައި ދުވާލު ފަތުރުވެރިންނަށް ކާން ދިނުމާ، މިކަންކަން އަޅުގަނޑުމެންޖެހޭ ހުއްޓާލަން. ފަތުރުވެރި ޣައިރު މުސްލިމުންނަށް ކާން ދިނުމަށް ޚާއްސަ އިންތިޒާމެއް، އެމީހުން ދިރިއުޅޭ ތަނުގެ ތެރޭގައި، އާއްމުންނަށް ނުފެންނަހެން، އިންތިޒާމް ކިރެވިދާނެ. އެކަމަކު ރަމަޟާން މަހުގެ ހުރުމަތަށް އުނިކަން އަންނަގޮތަށް އެކަން ކުރިއަށް ގެންދިޔުން ހުއްދައެއް ނުވާނެ.
އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު
ވަޒީރު އިތުރަށް ވިދާޅުވީ، ރޯދަމަހު ފަތުރުވެރިންނަށް ކާން ދިނުމާއި ގުޅޭ ގޮތުން ޤާނޫނާއި ޤަވާއިދުތައް ހެދިފައި ހުރިއިރު ކައުންސިލުތަކުން އެ ޤަނޫނުތަކާއި ޤަވައިދުތައް ތަންފީޒް ކުރަން ޖެހޭނެކަމަށެވެ.
"އެގަވާއިދުތަކަށްވުރެ އަޅުގަނޑުމެންގެ އަޤީދާ މާ މުހިންމު. އަޅުގަނޑުމެން މާތްالله އަށް އަދާކުރަންޖެހޭ ވާޖިބު މާ މަތިވެރި. އަޅުގަނޑުމެންގެ ދީނާމެދު ބޮލުގައި އެޅިފައި އޮތް މަސްއޫލިއްޔަތު މާ ބޮޑު. އެ ފަރުދީ ޒިންމާ އުފުލަންޖެހޭނެ. އަދި ކައުންސިލް ތަކުން އެމީހުންގެ ގާނޫނީ ޒިންމާ އުފުލަންޖެހޭނެ.
އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު
ވަޒީރު އިތުރަށް ވުދާޅުވީ، ދީނަށްވުރެ މުހިއްމުކަމެއް އޮވެގެން ނުވާނެ ކަމަށާ، ދީނުގެ ހުރުމަތްތެރިކަން ކެނޑިގެން ހިނގައްޖެނަމަ ހެދިބޮޑުވެގެން އަންނަ ޖީލުތަކުގެ ހިތްތަކުގައި އިސްލާމްދީނާ މެދުގައި އޮންނަ ހައިބަތާއި ޤަދަރާއި ކަރާމާތް ނެތިގެން ހިނގައިދާނެ ކަމަށެވެ. ވުމާއެކު އެކަންކަމާމެދު އެންމެންވެސް ވިސްނަން ޖެހޭނެ ކަމަށް ޝަހީމް ވިދާޅުވިއެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
