ބަދަލު ދިނުން ކުރިޔަށްދަނީ ސަރުކާރާއި އެމްޑީޕީގެ ބާރު ހުރި މީހުންގެ މަސްލަހަތު އޮތީމަ: ޝަރީފު
ދައުލަތުގެ ފައިސާއިން އެކިއެކި ފަރާތްތަކަށް ބަދަލު ދިނުމުގެ މަސައްކަތްކުރަމުންދަނީ ސަރުކާރާއި އެމްޑީޕީގެ ބާރު ހުރި މީހުންގެ މަސްލަހަތު އެކަމުގައި އޮތުމުން ކަމަށް ރައްޔިތުންގެ މަޖިލީހުގެ މަރަދޫ ދާއިރާގެ މެންބަރު އިބްރާހީމް ޝަރީފު ވިދާޅުވެއްޖެއެވެ.
އެކި އެކި އެއްބަސްވުންތަކާ ހިލާފްވެގެން، ދައުލަތުން އެކި ފަރާތްތަކަށް ފައިސާގެ ބޮޑެތި އަދަދު ތަކަކުން މިހާރު ބަދަލުޖޭންޖެހިފައިވާ މައްސަލައިގައި ކަންބޮޑުވުން ފާޅުކުރައްވައި މިއަދު ބޭއްވި ރައްޔިތުންގެ މަޖިލީހުގެ ޖަލްސާގައި ވާހަކަދައްކަވަމުން މެންބަރު ޝަރީފު ވިދާޅުވީ، މިއީ މިއަދު ރައްޔިތުން ކަންބޮޑުވާންޖެހޭ ފަދަ ބޮޑު މައްސަލައެއް ކަމަށެވެ.
ދީބާޖާ އިންވެސްޓްމަންޓް ޕްރައިވެޓް ލިމިޓެޑަށް ބަދަލުދެއްވުމަށް ނިންމެވި މައްސަލަ މާލިއްޔަތު ކޮމިޓީން ދިރާސާކޮށް ނިންމި ގޮތުގެ ރިޕޯޓު މިއަދު މަޖިލީހުގެ ތަޅުމަށް ހުށަހެޅުމުން ގިނަ މެންބަރުންވަނީ ބަދަލު ދިނުމުގެ ގޮތުން ދައުލަތުން އެތައް މިލިއަން ރުފިޔާއެއް ދޭންޖެހުމަކީ ކަންބޮޑުވާންޖެހޭ ކަމެއް ކަމަށް ވިދާޅުވެފައެވެ.
އެގޮތުން ޝަރީފު ދެއްކެވި ވާހަކައިގައި ވިދާޅުވީ މިއަދު ފެނިގެންދަނީ ސަރުކާރުގެ ފައިސާއިން 300 މިލިއަނުން 3000 މިލިއަނުން ދައުލަތުން ފައިސާ ނަގާއިރު މިއީ އެއްވެސް މައްސަލައެއް ނޫން ކަމަށް ދެކިގެން ތިބޭ މަންޒަރު ކަމަށެވެ.
ޝަރީފު ވިދާޅުވީ ސަރުކާރަށް ލިބިފައި ހުރި ފައިސާއިން މިއަހަރުވެސް 4000 މިލިއަން ރުފިޔާ ޑެފިސިޓްވެގެންދަނީ ބަދަލު ދިނުމުގެ ސަބަބުން ކަމަށެވެ. އަންނަ އަހަރު މިބަދަލު ދީފިނަމަ ރައްޔިތުންގެ އަސާސީ ހިދުމަތްތަކަށް ބުރޫއަރާނެ ކަމަށް ވެސް ވިދާޅުވިއެވެ.
''ދުނިޔޭގެ އެއްވެސް ގައުމެއްގައި 50 އަހަރަށް ކޮށްފައި ހުންނަ އެގްރިމެންޓް 50 އަހަރުގެ ފައިދާ ކަމަށް ކަރުދާސް ކުންފުންޏަކުން ހުށަހަޅާ ހުށަހެޅުން ގަބޫލެއް ނުކުރާނެ ރާއްޖެ ފިޔަވައި. ހިތާމަޔާއެކު ދަންނަވަން މަޖިލީހުގެ މެންބަރުންގެ އަޅުގަނޑު މެންގެ ޕާޓީގެ ބާރުހުރި ބައެއްގެ މަސްހަކަތުވެސް އޮތަތީވެ، ސަރުކާރަށް ނިސްބަތްވާ ބައެއް މީހުންގެ ބާރު އޮތަތީވެ މިބަދަލު ދިނުމުގެ ކަންތައްތައް ހަމަ ހެސްކިޔާފައި ކުރިޔަށް މިދަނީ.'' ޝަރީފު ވިދާޅުވިއެވެ.
ޝަރީފު ވިދާޅުވީ ބަދަލު ދިނުމަށް އަމިއްލައަށް ނަމަވެސް ގާނޫނެއް ހަދަންޖެހޭ ކަމަށެވެ. އޭނާ ވިދާޅުވީ އެންމެ މުހިންމު ކަމަކަށް ވާންޖެހޭނީ ރައްޔިތުންގެ ފައިސާ ހިމާޔަތްކުރުން ކަމަށެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
