މާދަމާގެ މަޖިލިސް ޖަލްސާގައި 12 ބިލެއް ހުށަހަޅަނީ

މާދަމާ އަށް ތާވަލްކޮށްފައިވާ ރައްޔިތުންގެ މަޖިލީހުގެ ޖަލްސާއަށް 12 ބިލެއް ހުށަހެޅުމަށް އެޖެންޑާކޮށްފިއެވެ.

މިހާރު ހިނގަމުންދާ ރައްޔިތުންގެ މަޖިލީހުގެ ދައުރު ނިމެން 2 ހަފްތާއަށް ވެފައި ވަނިކޮށް މަޖިލީހަށް މުޅިން އަލަށް ހުށަހަޅާ ބިލްތަކުގެ ތެރޭގައި މުޅިން އަލަށް ހުށަހަޅާ ބައެއް ބިލްތަކާއި ޤާނޫނުތަކަށް ސަރުކާރުން ހުށަހަޅާ އިސްލާހުތައް ވެސް ހިމެނެއެވެ.

އެގޮތުން ސަރުކާރުން ހުށަހަޅާ ބިލްތަކުގެ ތެރޭގައި ހިމެނެނީ ރާއްޖޭގެ ސަގާފީ ތަރިކައިގެ ބިލާއި، ވިޔަފާރީގެ ދާއިރާގައި ވާދަވެރިކަން އުފައްދައި ދެމެހެއްޓުމުގެ ބިލެވެ. މާދަމާގެ ޖަލްސާގައި 2 ބިލުގެ ވެސް ފުރަތަމަ ކިޔުން އިއްވާނެއެވެ.

މީގެއިތުރުން، ސަރުކާރުގެ ފަރާތުން ހުށަހަޅާ ބިލްތަކުގެ ތެރޭގައި މަސްވެރިކަމުގެ ބިލާއި، މުދާގަންނަ ފަރާތްތަކާއި ހިދުމަތް ލިބިގަންނަ ފަރާތްތައް ހިމާޔަތްކުރުމުގެ ބިލް، އިންތިޤާލީ ޢަދާލަތުގެ ބިލް އަދި ދަނޑުވެރިކަމުގައި ބޭނުންކުރާ ޕެސްޓިސައިޑާ ބެހޭ ބިލް ވެސް ހިމެނެއެވެ.

މާދަމާގެ ޖަލްސާއަށް އެޖެންޑާކޮށްފައިވާ ބިލްތަކުގެ ތެރޭގައި ސަރުކާރުގެ ގާނޫނުތަކަށް ގެންނަށް ހުށަހަޅާފައިވާ އިސްލާހު ގެނައުމުގެ ބިލްތައް ވެސް ހިމެނެއެވެ. އެގޮތުން ދިވެހި ސިވިލް ސަރވިސްގެ ގާނޫނަށް ހުށަހަޅާފައިވާ އިސްލާހު ގެނައުމުގެ ބިލާއި، ހިޔުމަން ރައިޓްސް ކޮމިޝަނުގެ ގާނޫނަށް އިސްލާހު ގެނައުމުގެ ބިލް އަދި ރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނަށް އިސްލާހު ގެނައުމުގެ ބިލް ހިމެނެއެވެ.

މާދަމާގެ ޖަލްސާގައި ހުށަހަޅާ އިތުރު އިސްލާހުތަކުގެ ތެރޭގައި އެންޓި-ކޮރަޕްޝަން ކޮމިޝަނަށް އިސްލާހު ގެނައުމުގެ ބިލާއި އޮޑިޓް ގާނޫނަށް އިސްލާހު ގެނައުމުގެ ބިލުގެ އިތުރުން އިލެކްޝަންސް ކޮމިޝަންގެ ގާނޫނަށް އިސްލާހު ގެނައުމުގެ ބިލެއް ވެސް ހިމެނެއެވެ.