މިފްކޯ ބޯޑުގައި މަސްވެރިން ތަމްސީލްކުރާ މެމްބަރު އައްޔަނުކޮށްފި

މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ ލިމިޓެޑް (މިފްކޯ) ގެ ބޯޑަށް މަސްވެރިން ފަރާތުން ތަމްސީލްކުރާ މެމްބަރު މިއަދު އައްޔަނުކޮށްފިއެވެ.

ސަރުކާރު ކުންފުނިތަކުގެ ބަލަދުވެރިފަރާތް، ޕީސީބީން ބުނީ މަސްވެރިންގފެ ފަރާތުން ތަމްސީލްކުރާ މެމްބަރެއްގެ ގޮތުގައި އައްޔަނުކޮށްފައިވަނީ، ގދ.ތިނަދޫ، ރިހިވެލި ރީޝަމް މުޙައްމަދު ޝަރީފް ކަމަށެވެ. މިފްކޯގެ ބޯޑު ޑިރެކްޓަރަކަށް މަސްވެރިން ތަމްސީލްކުރާ މެމްބަރަކު އައްޔަނުކޮށްފައިމިވަނީ މިފްކޯ ހިންގުމުގައި މަސްވެރިންގެ ދައުރު ފުޅާކުރުމަށް، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގެންގުޅުއްވާ ސިޔާސަތުގެ ތެރެއިންކަމަށް ޕީސީބީން ބުނެއެވެ.

މިފްކޯގެ ބޯޑަށް މަސްވެރިންގެ ފަރާތުން ޑިރެކްޓަރަކު އައްޔަނުކޮށްފައިވަނީ މިނިސްޓްރީ އޮފް ފިޝަރީޒް އެންޑް އޯޝަން ރިސޯސަސްއިން އާންމުކޮށް ޢިއުލާނުކޮށް ހުޅުވާލައި އެކަމަށް ޝައުގުވެރިކަން ފާޅުކޮށް ހުށަހަޅާފައިވާ އެޕްލިކޭޝަންތަކުގެ މައްޗަށް ރިޔާއަތްކޮށެވެ.