ފިޓްސް އެއާއިންވެސް އައު ޓާމިނަލް ބޭނުންކުރަން ފަށައިފި

އަވައްޓެރި ސްރީލަންކާގެ އަމިއްލަ އެއާލައިނެއްކަމަށްވާ ފިޓްސް އެއާއިން ވެލާނާ އިންޓަރނޭޝަނަލް އެއާޕޯޓްގެ އައު ޓާމިނަލް ބޭނުންކުރަން ފަށައިފިއެވެ.

ފިޓްސްއިން އައު ޓާމިނަލް ބޭނުންކުރުން ފެށުމުގެ ގޮތުން މިއަދު ވަނީ ޓާމިނަލް 1 ގައި ހާއްސަ ރަސްމިއްޔާތެއް ކުރިއަށްގެންގޮސްފައެވެ. މި ރަސްމިއްޔާތު ޝަރަފުވެރި ކޮށްދެއްވީ ވިޒިޓް މޯލްޑިވްސް ކޯޕަރޭޝަން (ވީއެމްސީ)ގެ މެނޭޖިން ޑިރެކްޓަރު އިބްރާހިމް ޝިއުރީއެވެ.

ރަސްމިއްޔާތުގައި އެމްއޭސީއެލްގެ ސީއީއޯ އަދި މެނޭޖިން ޑިރެކްޓަރު އިބްރާހިމް ޝަރީފު މުހައްމަދު އާއި ޑެޕިއުޓީ މެނޭޖިން ޑިރެކްޓަރު މުޖުތަބާ ލަތީފު އާއި ޑެޕިއުޓީ މެނޭޖިން ޑިރެކްޓަރު މުހައްމަދު ލަމްޢާން އަދި ކުންފުނީގެ ބޯޑް މެންބަރުންނާއި އިސްވެރިންގެ އިތުރުން ފިޓްސް ހޮލިޑޭސްގެ ޑިރެކްޓަރު އަނާހް ކާސިމް އަދި ފިޓްސް އެއާގެ އޮޕަރޭޝަންސް އެގްޒެކެޓިވް އިބްރާހިމް އަމީން ހަސަން މަނިކު ބައިވެރިވެވަޑައިގެންނެވި އެވެ.

މިއަދުގެ ރަސްމިއްޔާތުގައި ފިޓްސް އެއާގެ ޗެކިން ކައުންޓަރުތައް ރަސްމީކޮށް ހުޅުވައި، އެ އެއާލައިނުން ފުރި 71 ފަސިންޖަރުންނަށް ވަނީ ހަދިޔާ ދީފައެވެ.

އަދި އެމްއޭސީއެލުން ވަނީ ޓާމިނަލް 1 އަށް ކައިރި ކުރި ފިޓްސް އެއާގެ ފުރަތަމަ މަތިންދާބޯޓު, 8ޑީ-921 އަށް ހާއްސަ ވޯޓާ ސެލިއުޓެއް އަރުވައި، އެ ފްލައިޓުން ރާއްޖެ އައި 154 ފަސިންޖަރުންނަށް ވަނީ ސަގާފީ ހަރަކާތްތަކާއެކު ހޫނު މަރުހަބާއެއް ކިޔާފައެވެ.

ފިޓްސް އެއާ އަކީ ސްރީ ލަންކާގެ އެންމެ ބޮޑު ޕްރައިވެޓް އެއާލައިނެވެ. އެ އެއާލައިން އިން ރާއްޖެއާއި ސްރީ ލަންކާގެ ވެރިރަށް ކޮލަމްބޯއާ ދެމެދު ދަތުރުރަށް ފެށީ 2022ގައެވެ.

ރާއްޖެއަށް ނިސްބަތްވާ އަމިއްލަ ލަގްޒަރީ އެއާލައިނެއްކަމަށްވާ ބިއޮންޑުންވެސް ވަނީ އައު ޓާމިނަލް ބޭނުންކުރަން ފަށާފައެވެ. މީގެ އިތުރުން މޯލްޑިވިއަން ފިޔަވައި ދެން އައު ޓާމިނަލް ބޭނުންކުރަނީ ޔޫއޭއީގެ ބަޖެޓް އެއާލައިނެއްކަމަށްވާ އެއާ އަރަބިއާއެވެ.

ވީއައިއޭ ހިންގާ އެމްއޭސީއެލުން ބުނީ ކުރިއަށްއޮތްތަނުގައި ބައިނަލްއަޤްވާމީ އިތުރު އެއާލައިންތަކުން އައު ޓާމިނަލް ބޭނުންކުރަމުންދާނޭކަމަށެވެ. ރާއްޖޭގެ މައި ވައިގެ ބަނދަރުގައި ތަރައްޤީކުރި އައު ޓާމިނަލް ހުޅުވާފައިވަނީ ރާއްޖޭގެ މިނިވަންދުވަހާ ގުޅުވައިގެން އެދުވަހުގެ ރެއެވެ.