ޗައިނާއިން ރާއްޖެ އެތެރެކުރާ 70 އިންސައްތަ މުދަލުގެ ޑިއުޓީ މިއަދުން ފެށިގެން މަޢާފްވާނެ!

ރާއްޖެ އާއި ޗައިނާގެ މިނިވަން ވިޔަފާރީގެ އެއްބަސްވުން މިއަދު ތަންފީޒު ކުރަން ފެށުމުން ޗައިނާ އިން ރާއްޖެ އެތެރެކުރާ 70 އިންސައްތަ މުދަލުގެ ޑިޔުޓީ ކެޑޭނެ ކަމަށް އިކޮނިމިކް ޑިވެލޮޕްމަންޓް މިނިސްޓަރު މުޙައްމަދު ސަޢީދު ވިދާޅުވެއްޖެއެވެ.

މިނިވަން ވިޔަފާރީގެ އެއްބަސްވުމެއްގައި ޗައިނާއާއެކު ރާއްޖެއިން ސޮއިކުރީ ކުރީގެ ރައީސް ޔާމީން އަބްދުލް ޤައްޔޫމްގެ ވެރިކަމުގައި 2014 ވަނަ އަހަރުއެވެ. އޭރުވެސް ފްރީޓްރޭޑް އެއްބަސްވުން އެކުލަވާލުމުގައި އެންމެ އިސްކޮށް ހުންނެވީ މިހާރުގެ އިކޮނޮމިކް މިނިސްޓަރު މުހައްމަދު ސައީދެވެ.

ޗައިނާ ސަރުކާރާއި ދިވެހިރާއްޖެއާ ދެމެދު ގާއިމްކުރި މިނިވަން ވިޔަފާރީގެ އެއްބަސްވުމާ ގުޅޭ ގޮތުން، ވާހަކަދައްކަވަމުން އިކޮނޮމިކް މިނިސްޓަރު މުހައްމަދު ސައީދު ވިދާޅުވީ، މި އެއްބަސްވުމާއެކު ޗައިނާއިން ރާއްޖެއަށް އެތެރެކުރާ 290 އަށްވުރެ ގިނަ މުދަލުން ނަގާ ޑިއުޓީ މައާފްވެގެން ދާނޭކަމަށެވެ. މިގޮތުން ފަރުނީޗަރާއި، އިލެކްޓްރޯނިކް އައިޓަމްގެ އިތުރުން މެޝިނަރީން ނަގާ ޑިއުޓީވެސް މައާފްވެގެންދާނެއެވެ.

މިނިސްޓަރު ސައީދު ވިދާޅުވީ ފްރީޓްރޭޑް އެއްބަސްވުމުގެ ދަށުން ގެންނަ މުދަލުގެ ޑިއުޓީ މައާފްވެ އެ މުދަލުން މީގެކުރިން ދައުލަތަށް ލިބެމުން އައި އާމްދަނީ އުނިވިނަމަވެސް، ޑިއުޓީ މައްާފްކުރުމުން ރައްޔިތުންނަށް އޭގެ މަންފާލިބި އިގްތިސާދުގެ އެކި ދާއިރާތަކަށް އެކަމުގެ ކުރިއެރުންތައް ލިބިގެންދާނެއެވެ.

މިސާލެއްގެ ގޮތުގައި މިނިސްޓަރު ނެންގެވީ ޗައިނާއިން ގެސްޓްހައުސް ވިޔަފާރިއަށް ގެންނަ ފަރުނީޗަރުން ޑިއުޓީ މައާފްކުރުމުން މާލީގޮތުން އެކަމުގެ ލުއިކަން އެ ގެންނަ ފަރާތްތަކަށް ލިބިގެންދާއިރު، އެތަކެތި ރާއްޖެ ގެނައުމަށްފަހު ދެން އެތަކެތި އުފުލުމަށް ކުރާ ހޭދައާއި އެނޫންވެސް ކަންކަމުން ދައުލަތަށް އާމްދަނީ ލިބިގެންދާނޭކަމެވެ.

ޗައިނާ އާއި ރާއްޖެއާ ދެމެދު ވެވުނު މިނިވަން ވިޔަފާރީގެ އެއްބަސްވުމުގެ ސަބަބުން ދިވެހިންނަށް ލިބިގެންދާ އެންމެ ހާއްސަ އެއްކަމަކީ، ޗައިނާގެ ބޮޑެތި ސިޓީތައް ނުވަތަ ޗައިނާގެ މާކެޓުގައި ދިވެހިންނަށް ވިޔަފާރިކުރަން ފުރުސަތުތައް ލިބި، އެހެންގައުމުގެ މާކެޓްތަކަށް ވަނުމުގެ ފުރުސަތު ލިބިގެންދިއުމެވެ.

ޗައިނާ އާއި ރާއްޖެއާ ދެމެދު ގާއިމްކުރި މިނިވަން ވިޔަފާރީގެ އެއްބަސްވުން އެކުލަވާލައި ނިމުނީ، ރައީސް ޔާމީނުގެ ދައުރު ނިމެން އުޅެނިކޮށެވެ. ޖެހިގެން އައި ރައީސް އިބްރާހިމް މުހައްމަދުގެ ސަރުކާރުން އެ އެއްބަސްވުން ކުރިއަށް ގެންގޮސްފައި ނުވެއެވެ.