އެމްޑީޕީ ސަރުކާރުން ކަންކަން ކުރި ގޮތުގެ ވާހަކަ ދެއްކީމާ އޭގަ މަތިޖަހަން އުޅުނީމާ ކަމަކު ނުދާނެ: ޤާސިމް

އެމްޑީޕީ ސަރުކާރުން ލޯނުތައް ނަގައި ދައުލަތް ދަރުވާލި ގޮތުގެ ވާހަކަ ދެއްކުމުން އޭގަ މަތިޖަހަން އުޅުމަކީ އެއްގޮތަކަށްވެސް ކަމުދާ ކަމެއް ނޫން ކަމަށް ޖުމްހޫރީ ޕާޓީގެ ލީޑަރު އަދި މާމިގިލި ދާއިރާގެ މެންބަރު ޤާސިމް އިބްރާހީމް ވިދާޅުވެއްޖެއެވެ.

ޤާސިމް މިހެން ވިދާޅުވެފައި ވަނީ، ރައްޔިތުންގެ މަޖިލީހުގެ މިއަދުގެ ޖަލްސާގައި ދައުލަތުގެ ދަރަންޏަށް ޒިންމާވުމުގެ ބިލަށް ބަހުސް ކުރައްވަމުންނެވެ.

އެގޮތުން ގާސިމް ވަނީ ކުރީ ސަރުކާރޭ ނޫނީ މި ސަރުކާރޭ ކިޔައި ސަރުކާރުގެ ބޮލުގައި ތުހުމަތުތައް އެޅުމުގެ ބޭނުމެއް ނެތް ނަމަވެސް،  މިހާތަނަށް އެންމެ ގިނަ ލޯނު ނަގާފައިވަނީ ނިމިދިޔަ އެމްޑީޕީ ސަރުކާރުންކަން ފާހަގަކުރައްވައި އޭގެ ސަބަބުން ދައުލަތަށް ބޮޑެތި ގެއްލުން ވެފައިވާކަން ފާހަގަކުރައްވާފައެވެ.

ޝޯޓް ޓާމް ލޯނު، ބޮޑު އަދަދު އަދަދުން ނަގާފައިހުރީ ކާކު؟ އެންރޯލް ކޮށްފައި ހުރީ ކާކު؟ ސުކޫކަށް ނަގާފައި ހުރި ލާރި؟ އެއީ ޕީޕީއެމް ސަރުކާރުން ނެގި އެއްޗެއް ކަމަށްވިޔަސް އޭތި އެންރޯލް ކުރީ ކާކު؟ އާދެ މިދިޔަ ސަރުކާރުން. އެމްޑީޕީން. 200 މިލިއަން ޑޮލަރު. އޭގެ ފަހުން، އެމީހުން ނަގާފައި ހުރި 200 މިލިއަން ޑޮލަރު 2025 ގައި ހަމަ ވަނީ. އެހެންވީމާ އެވާހަކަ ދައްކަން އަޅުގަނޑުމެނެ ފެށީމާ، އެކަމުގައި މަތި ޖަހަން އުޅުނަސް ކަމަކު ނުދާނެ. އެވާހަކަ ދައްކަން އެބަޖެހޭ.

ޤާސިމް އިބްރާހިމް

ޤާސިމް އިތުރަށް ވިދާޅުވީ، ރިޔާސީ އިންތިޚާބާ ދިމާކޮށް ފެނަކަ އާއި ސްޓެލްކޯއިން ހައްދެއް ނެތި، މީހުންނަށް ވަޒީފާ ދިން ކަމަށާއި، މަސް ދޯނިފަހަރުށް މަހަށް ދިޔަ ޒުވާނުންނަށްވެސް އެތަންތަނުން ވަޒީފާ ދިނުމުން މަސް ދޯނިތަކަށް މަހަށް ނުފުރިފައި ތިބި ކަމަށެވެ.

އެހެންކަމުން، މި ސަރުކާރުން ސަރުކާރުގެ ކުންފުނިތަކާއި، ސަރުކާރުގެ އިދާރާ ތަކުގައި ސިޔާސީ މަގާމު ތަކަށް ނެގުމުން އެވާހަކަ އެމްޑީޕީން ދައްކާނެ ކަމެއް ނެތް ކަމަށްވެސް ގާސިމް ވިދާޅުވިއެވެ.