ސިއްހީ ނިޒާމުގެ މައްސަލަތައް ބޮޑުވީ ކޮރަޕްޝަނާ ފަސާދަ ވަނުމުން: ރައީސް
ސިއްހީ ނިޒާމުގެ އެންމެ ބޮޑު މައްސަލައަކީ، ރައްޔިތުންނަށް ލުއިފަސޭހަ ކޮށްދިނުމަށް ރާވާފައި ހުރި ކަންކަމުގެ ތެރެއަށްވެސް ކޮރަޕްޝަނާއި ފަސާދަ ވަނުން ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު ވިދާޅުވެއްޖެއެވެ.
ބ. އަތޮޅު ހޮސްޕިޓަލަށް 50 އަހަރު ފުރުން ފާހަގަކުރުމަށް މިރޭ އެހޮސްޕިޓަލުގައި ބޭއްވި ރަސްމިއްޔާތު ޝަރަފުވެރިކޮށްދެއްވައި ވާހަކަފުޅު ދައްކަވަމުން ރައީސް ސޯލިހު ވިދާޅުވީ އާސަންދަ ތައާރަފުކުރި ފަހުން އާސަންދައިގެ ހަގީގީ މަގުސަދު ހާސިލުނުވެ ދައުލަތުގެ ބަޖެޓަށް ބުރަ ބޮޑުވަނީ ވެސް ކޮރަޕްޝަންގެ ސަބަބުން ކަމަށެވެ. ރައީސްގެ ވާހަކަފުޅުގައި ސިއްހީ މައްސަލަތަކާއި ގުޅިގެން ރައްޔިތުންގެ ޝަކުވާތައް ބޮޑުވީ މާލެ ތޮއްޖެހުމަށް ސަރުކާރުން ރޭވި މަޝްރޫއުތަކުގެ ސަބަބުން ކަން ފާހަގަކުރެއްވިއެވެ.
އެމަނިކުފާނު ވިދާޅުވީ ސިއްހީ ޚިދުމަތުގެ ސިޔާސަތަކީ ރައްޔިތުންނާ ވީހާ ގާތުން، އެމީހަކު ހުރި ރަށަކުން ނުވަތަ އެމީހަކު ހުރި އަތޮޅަކުން އެކަށޭނަ ސިއްހީ ފަރުވާ ފޯރުކޮށްދިނުން ކަމަށާއި އެކަން ކުރެވޭނީ، ލާމަރުކަޒީ އުސޫލުން ރާއްޖޭގެ ސިއްހީ ނިޒާމަށް ބަދަލުތަކެއް ގެނެސްގެން ކަމަށެވެ.
އަދި ސިއްހީ މަރުކަޒުތަކާ ހޮސްޕިޓަލުތަކުގެ ފެންވަރު ރަނގަޅުކޮށް ބޭހުގެ ފެންވަރު ރަގަޅުކުރުމުން ބޭސްކުރަން މާލެއަށް ކުރަންޖެހޭ ދަތުރުތައް ވެސް ހުއްޓުމަކަށް އަންނާނެ ކަމަށް ރައީސް ވިދާޅުވިއެވެ.
އަދި ރަށްރަށުން އެކަށީގެންވާ ސިއްހީ ހިދުމަތްތައް ލިބެން ނެތުމަކީ، މިއަދުވެސް ރައްޔިތުންގެ އެންމެ ބޮޑު ޝަކުވާ ކަމަށް ވިދާޅުވިއެވެ. އެގޮތުން ޑޮކްޓަރަށް ދެއްކުމަށް މާލެ ދާ މީހުންނަށް ހާއްސަ ޑޮކްޓަރަކަށް ދެއްކުމަށް އެތައް ދުވަހަކު އިންތިޒާރުގައި ތިބެން ޖެހޭކަން ރައީސް ފާހަގަކުރެއްވިއެވެ.
މީގެއިތުރުން އެމަނިކުފާނު ވިދާޅުވީ ސަރުކާރުގެ ސިއްހީ ހިދުމަތުގެ ސިޔާސަތަކީ ރައްޔިތުންނާ ވީހާވެސް ގާތުން އަދި އެމީހަކު ހުރި ރަށަކުން ސިއްހީ ހިދުމަތް ދިނުން ކަމަށާއި އެގޮތުން މިއަހަރު ތެރޭގައި ޕްރައިމަރީ ހެލްތްކެއާ ޕްރޮގްރާމް ރާވަން ހާއްސަ އިސްކަމެއް ދެއްވާނެ ކަމަށެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
