"ހޯޕް އައިލެންޑް" ތަރައްގީކޮށްދޭނެ ބަޔަކު ހޯދަނީ

އުތުރު ތިލަފަޅުގައި "ހޯޕް އައިލެންޑް" ތަރައްގީ ކުރާނެ ބަޔަކު ހޯދަން ހޯމް ލޭންޑް ސެކިއުރިޓީ މިނިސްޓްރީން އިއުލާނުކޮށްފި އެވެ.

“ހޯޕް އައިލެންޑް” އަކީ ކުށުގެ ވެށީގައި އުޅޭ 18 އަހަރު ނުވާ ކުޑަކުދިން އިސްލާހުކުރުމަށްފަހު އަނބުރާ މުޖްތަމަޢުއަށް ގެނައުމަށްޓަކައި މުޖުތަމަޢުއިން އެކަހެރިކޮށްފައި ބައިތިއްބައިގެން ސިފައިންނާއި ފުލުހުންނާއި ކަމާ ބެހޭ މިނިސްޓްރީތަކާ ގުޅިގެން އެ ކުދިންނަށް ޕްރޮގްރާމްތައް ހިންގާ ގޮތަށް ތަރައްޤީކުރެވޭ ރަށެކެވެ.

މި މަޝްރޫޢު ފުރަތަމަ ކުރިއަށްގެންދަން ދ.ވާނީގައި ނިންމި ނަމަވެސް މިހާރު އެތަން އުތުރު ތިލަ ފަޅުގައި ތަރައްޤީކުރުމަށް ވަނީ ނިންމާފައެވެ.

ހޯމް ލޭންޑް ސެކިއުރިޓީ މިނިސްޓްރީން އިއްޔެ ކުރި އިއުލާނުގައި ބުނީ އެ ތަން ތަރައްޤީކުރަނީ 700 ކުދިންނަށް އެއްފަހަރާ ދިރިއުޅެވޭ ގޮތަށް ކަމަށެވެ.

މި ރަށުގައި ކޔޑަކުދިން ބަންދުކޮށްގެން ގެންގުޅެވޭނެ ތަންތަނާއި އެކުދިން ދިރިއުޅޭނެ ތަންތަނާއި ޕާކުތަކާއި މިސްކިތަކާއި ސިނަމާއަކާއި ފުޓުބޯޅަ ކުޅޭ ތަނަކާއި ސްކޫލެއް އެރަށުގައި އަޅަން ވަނީ ނިންމާފައެވެ.

ސެންޓްރަލް ޕްރިޒަން ކޮމްޕްލެކްސްއާ އެކު އަޅާ އެ ތަނުގައި ދީނީ ތައުލީމާއި ރަސްމީ ތައުލީމާއި ކުޅިވަރު އަދި ސައިކޯސޯޝަލް އިންޓަވެންޝަން ޕްރޮގްރާމްތައް ވެސް ހިންގާނެ އެވެ.

މީގެ ކުރިން، ހޯމް މިނިސްޓަރ އަލީ އިހުސާމު ވިދާޅުވީ އެ ރަށުގައި އެކުދިން އުމުރުން 18 އަހަރު ފުރޭދެއް ގެންގުޅުމަށް ފަހު، ފުލުހުންނާއކ ސިފައިންގެ ވަޒީފާއަށް ރަސްމީކޮށް ނެގޭނެ ކަމަށެވެ. އަދި އެއަށްފަހު، ވަކި މުއްދަތަކަށް އެ ހިދުމަތުގައި އުޅެ، އިވެލުއޭޝަނެއް ހަދައި އެ ކުދކން ފާން ބޭނުންވާ ދާއިރާއަކުން ކުރިޔަށް ދިއުމަށް ފުރުސަތު ދެވޭނެ ކަމަށެވެ.