ހިތަދޫ އުތުރު ދާއިރާގެ ބައި އިލެކްޝަން: އެމްޑީޕީގެ ޓިކެޓް ޞާދިޤަށް

ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ ބައި-އިލެކްޝަންގައި އެމްޑީޕީގެ ޓިކެޓްގައި ވާދަކުރާ ކެންޑިޑޭޓަކީ އައްޑޫ ސިޓީގެ ކުރީގެ މޭޔަރު ސޯދިގު (ސޯބެ)ޢަބްދުالله ޞާދިޤް ކަމަށް އެޕާޓީން ބުނެފިއެވެ.

އެމްޑީޕީން ބުނީ، އެ ދާއިރާގެ ބައި އިލެކްޝަން ޕްރައިމަރީއަށް ހުޅުވާލެވުނު އިއުލާނުގެ މުއްދަތު ހަމަވިއިރު ކުރިމަތިލާފަވާނީ ޞާދިޤު އެކަންޏެވެ. އެހެންކަމުން، އޭނާއަކީ އެޕާޓީގެ ހިތަދޫ އުތުރު ދާއިރާގެ މަޖިލިސް ކެންޑިޑޭޓްކަމަށް ބުނެފައިވެއެވެ.

އައްޑޫ މޭޔަރުގެ ކަމުގެ އިތުރު ކުރީގެ ރައީސް ޞާލިޙްގެ ވެރިކަމުގައި ޕްލޭނިން މިނިސްޓްރީން އައްޑޫގައި ހިންގާ ތަރައްގީގެ މަސައްކަތްތައް ބަލަހައްޓަވާނެ ޚާއްސަ ބޭފުޅާގެ ގޮތުގައި އެ މިނިސްޓްރީގެ ސްޓޭޓު މިނިސްޓަރަކަށްވެސް ސޯބެ އައްޔަނު ކޮށްފައިވެއެވެ.

ރައްޔިތުންގެ މަޖިލީހުގެ 20 ވަނަ ދައުރުގެ ހިތަދޫ އުތުރު ދާއިރާގެ ގޮނޑި ހުސްވީ، ޕީއެންސީގެ މެންބަރު މުހައްމަދު ސިނާންގެ ގޮނޑި ގެއްލިފައިވާ ކަމަށް ސުޕްރީމް ކޯޓުން ހުކުމް ކުރުމާއި ގުޅިގެންނެވެ.

އެއާއެކު އީސީން ވަނީ ހިތަދޫ އުތުރު ދާއިރާގެ ބައި-އިލެކްޝަނަށް ކުރިމަތިލުމަށް އެދޭ މީހުންނަށް އެ ފުރުޞަތު، އެޕްރީލް 14 ވާ އަންގާރަ ދުވަހުގެ 10:00 އިން ފެށިގެން، އެޕްރީލް 29 ވާ ބުދަ ދުވަހުގެ 15:00 އާ ހަމަޔަށް އޮންނާނެ ކަމަށް ބުނެ އިއުލާން ކޮށްފައެވެ.