ތިން ގައުމަކަށް ކަނޑައެޅި ސަފީރުންނަށް މަޖިލީހުން ރުހުން ދީފި

ތިން ޤައުމަކަށް ކަނޑައެޅި ސަފީރުންނަށް މަޖިލީހުން ރުހުން ދީފިއެވެ.

އެގޮތުން ރައްޔިތުންގެ މަޖިލީހުގެ މިއަދުގެ ޖަލްސާގައި ރުހުން ދޭން ފާސްކޮށްފައިވަނީ ޗައިނާގައި ހުންނަވާ ރާއްޖޭގެ ސަފީރަށާއި، ބަންގްލަދޭޝްގައި ހުންނަ ދިވެހިރާއްޖޭގެ ސަފީރުގެ އިތުރުން ސަޢުދީ ޢަރަބިއްޔާގައި ހުންނަވާ ރާއްޖޭގެ ސަފީރަށެވެ.

ޗައިނާގައި ހުންނަވާ ރާއްޖޭގެ ސަފީރުގެ މަގާމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އައްޔަނު ކުރައްވާފައިވަނީ އެމްއެމްއޭގެ ކުރީގެ ގަވަރުނަރު ޑރ. ފަޒީލް ނަޖީބެވެ. އޭނާ އައްޔަނުކުރަން ފާސްކުރީ ވޯޓުގައި ބައިވެރިވެޑައިގެންނެވި 35 މެމްބަރުންގެ އިއްތިފާގުންނެވެ.

ބަންގްލަދޭޝްގައި ހުންނަވާ ރާއްޖޭގެ ސަފީރު ކަމަށް ކަނޑައެޅުއްވީ އައްޑޫ ހިތަދޫ އަސަރީގެ، ޝިއުނީ ރަޝީދެވެ. އޭނާއަށް ރުހުންދޭން ފާސްކުރީ ވެސް ވޯޓުގައި ބައިވެރިވެވަޑައިގެންނެވި 35 މެމްބަރުންގެ އިއްތިފާގުންނެވެ.

ރާއްޖޭގެ ފަރާތުން ސައުދީ އަރަބިއްޔާގައި ހުންނަވާ ސަފީރުގެ މަގާމަށް އައްޔަނުކުރެއްވީ ނ. ހޮޅުދޫ، އުފަންވެލި، މުހައްމަތު ޠާހާ އެވެ. އޭނާއަށް ރުހުން ދޭން ފާސްކުރީ ވޯޓުގައި ބައިވެރިވެވަޑައިގެންނެވި 33 މެމްބަރުންގެ އިއްތިފާގުންނެވެ.