ނެދަލެންޑްސްގެ މައްޗަށް ޖަރުމަނުން ކުރި ހޯދައިފި

މިދުވަސްކޮޅު ކުރިއަށްދާ ޔޫރޯ 2020 އަށް ކޮލިފައިވުމަށް ކުޅެމުން އަންނަ މެޗުތަކުގެ ތެރެއިން ގުރޫޕް ސީ ގައި ނެދަލެންޑްސް އަދި ޖާމަނީ ބައްދަލުކުރި މެޗް 2-3 ކުން ޖާމަނީ ކާމިޔާބު ކޮށްފިއެވެ.

ދެ ޓީމުގެ ފަރާތުންވެސް ވާދަވެރި ކުޅުމެއް ފެނިގެންދިޔަ މި މެޗުގައި ފުރަތަމަ ގޯލް ޖަހާ ކުރި ހޯދާފައިވަނީ ޖާމަނީއެވެ. 15 ވަނަ މިނެޓުގައި މެންޗެސްޓާ ސިޓީގެ ތަރި ސާނޭ ޖާމަނީއަށް ކުރި ހޯދަދިންއިރު ބަޔާން މިއުނިޗްގެ ގްނެބްރީ ވަނީ އޭގެ ކުޑަ ވަގުތު ކޮޅެއް ފަހުން އިތުރު ގޯލެއް ކާމިޔާބުކޮށް ޖަރުމަން ޓީމަށް ދެ ގޯލުގެ ލީޑެއް ހޯދަދީފައެވެ.

ފުރަތަމަ ހާފުގެ ކުޅުން 2-0 ކުން ޖާމަނީ ކުރީގަ އޮވެގެން ނިމުނު އިރު ނެދެލަންޑްސްވަނީ ދެވަނަ ހާފުގަ އެޓީމުގެ ކުޅުން ރަނގަޅުކޮށް ލިބުނު ފުރުސަތުތަކުގެ ބޭނުން ހިފައި ނަތީޖާ 2-2 ކަށް ހަދާފައެވެ. އެގޮތުން އެޓީމުގެ ގޯލްތައް ކާމިޔާބު ކޮށްދިނީ އަޔެކްސްގެ ޒުވާން ޑިފެންޑަރު ޑެލިޓް އަދި ލިޔޯންއަށް ކުޅެމުން އަންނަ ހުނަރުވެރި ފޯވަޑް ޑިޕާއީއެވެ.

ޖާމަނީއިން ތިން ޕޮއިންޓް ކަށަވަރު ކުރި ގޯލް މެޗުގެ ފުރިހަމަ ވަގުތު ހަމަވެގެން ދެއްކި އިތުރު ގަޑީގައި ޖެހީ މާކޯ ރިއުސް ދިން ބޯޅައަކުން ނިކޯ ޝްލްޒްއެވެ.

މި ނަތީޖާއާއެކު ޖާމަނީ އޮތީ މި ގުރޫޕްގެ ދެވަނައިގައެވެ. އެއީ އެއް މެޗް ކުޅެގެން ލިބުނު ތިން ޕޮއިންޓުންނެވެ. ދެ މެޗުން ހަ ޕޮއިންޓް ހޯދައިގެން ނޮދަން އަޔަލެންޑް އެއްވަނައިގަ އޮތް އިރު ނެދެލަންޑްސް ތިން ވަނައިގަ އޮތީ ދެ މެޗުން ލިބުނު ތިން ޕޮއިންޓާއެކީއެވެ.

ޔޫރޯ ކޮލިފައިންގައި ކުޅެވުނު އެހެން މެޗުތަކުގެ ނަތީޖާތަކަށް ބަލާލާއިރު ވޭލްސްވަނީ ސްލޮވާކިއާ އަތުން 1-0 ކުން މޮޅުވެފައެވެ. ކަޒިކިސްތާނުގެ މައްޗަށް 4-0 ގެ ބޮޑު ތަފާތަކުން ރަޝިއާ ކުރި ހޯދިއިރު ކްރޮއޭޝިއާވަނީ ހައިރާން ކުރުވަނިވި ގޮތަކަށް ހަންގޭރީ އަތުން 2-1 ކުން ބަލިވެފައެވެ.