އެމްޑީޕީގެ ހިނގާލުމުން ދޭހަވެގެންދިޔައީ ސަރުކާރުން އެއްވެ އުޅުމަށް ފުރުސަތުދޭ މިންވަރު: ހީނާ

އިދިކޮޅު އެމްޑީޕީން މިރޭ މާލޭގައި ކުރިއަށްގެންދިޔަ ހިނގާލުމުން ދޭހަވެގެންދިޔައީ ސަރުކާރުން އެއްވެ އުޅުމަށް ފުރުސަތުދޭ މިންވަރުކަމަށް ސަރުކާރުގެ ތަރުޖަމާނު ހީނާ ވަލީދު ވިދާޅުވެއްޖެއެވެ.

އެމްޑީޕީން މިރޭ ވަނީ މާލޭގައި "ފުދިއްޖެ، ފުނޑިއްޖެ" ނަމުގައި ޝުއޫރު ފާޅުކުރުމުގެ ގޮތުން މަގުތަކުގައި ބޮޑު ހިނގާލުމެއް ކުރިއަށްގެންގޮސްފައެވެ. މި އެއްވުމުގައި އެމްޑީޕީން ވަނީ ސަރުކާރުގެ ސިޔާސަތްތަކަށް ފާޑުކިޔައި ރައީސް ޑރ.މުއިއްޒުގެ އިސްތިއުފާއަށް ގޮވާލާފައެވެ.

އެމްޑީޕީގެ މި ހަރަކާތާ ގުޅޭގޮތުން އެކްސްގައި ކުރެއްވި ޕޯސްޓެއްގައި ހީނާ ވިދާޅުވީ އެމްޑީޕީގެ ހިނގާލުން ބޭއްވުމުގެ ފުރުސަތު ދިނުމުން ދޭހަވެގެންދަނީ އެއްވެ އުޅޫމާއި ހިޔާލުފާޅުކުރުންފަދަ އަސާސީ ހައްގުތަކަށް މި ސަރުކާރުން ފުރުސަތުދޭ މިންވަރުކަމަށެވެ. ހީނާ ވިދާޅުވީ ރައީސް ޑރ.މުހައްމަދު މުއިއްޒުގެ ސިޔާސަތަކީ ހިޔާލުފާޅުކުރުމުގެ މިނިވަންކަމުގެ ސިޔާސަތު ރައްކާތެރިކޮށްދިނުން ކަމަށެވެ.

އެމްޑީޕީން މިރޭ މާލޭގައި ސަރުކާރާ ދެކޮޅަށް ބޭއްވި ހިނގާލުން ނިމިފައިވަނީ އެއްވެސް ކަހަލަ ހަމަނުޖެހުމެއް ނުހިނގަ ވަރަށް އަމާން އޮމާންކޮށެވެ. މި ހަރަކާތަށް ފުލުހުންގެ ފުރިހަމަ އެއްބާރުލުން ލިބިގެންދިޔައިރު، މިއީ ސަރުކާރާ ދެކޮޅަށް ޝުއޫރު ފާޅުކުރުމުގެ ގޮތުން ކުރިއަށްގެންދިޔަ ހިނގާލުމެއް މިހާ ސުލްހަވެރިކަމާއެކު ނިންމާލި ފުރަތަމަ ފަހަރެވެ.

ރާއްޖޭގައި ސިޔާސީޕާޓީތައް މީގެ ކުރިން ބޭއްވި މިފަދަ ގިނަ އެއްވުންތައް ނިމޭއިރު ޕެޕަސްޕްރޭ ޖަހައި ފުލުހުންގެ ބެލުމުގެ ދަށަށް އެއްވުމުގެ ބައިވެރިން ގެންދަންޖެހެއެވެ. ނަމަވެސް މިރޭގެ ހިނގާލުމުގައި ބައިވެރިވި އެއްވެސް މީހެއްގެ ފަރާތަކުން އެފަދަ އަމަލެއް ފެނިގެން ނުދާކަން ފާހަގަކޮށްލެވެއެވެ. ހިނގާލުން ކުރިއަށްދިޔައިރު ފުލުހުންނާއި ސިފައިންވެސް ދިޔައީ ގްރީން ޒޯންތަކުގައި ހަރަކާތްތެރިވަމުންނެވެ.

އެމްޑީޕީން މިރޭގެ އެއްވުން ކުރިއަށްގެންގޮސްފައިވަނީ ސަރުކާރުން ޤާނޫނު އަސާސީއަށް ގެނައި އިސްލާހުތަކާއި، ވެރިކަމަށް އައިސް ސަރުކާރުން ރައްޔިތުންނަށްވީ ވައުދުތައް ފުއްދަމުން ނުދާކަމަށްބުނެ އެކަމާ ޝުއޫރު ފާޅުކުރުމުގެ ގޮތުންނެވެ. މިރޭ ކުރިއަށްދިޔަ ހިނގާލުމުގައި އެމްޑީޕީގެ ގިނަ އަދަދެއްގެ މެމްބަރުންނާއި އެޕާޓީގެ ލީޑަރޝިޕްގެ ބޭފުޅުން ބައިވެރިވިއެވެ.