މިފަހަރުގެ ހައްޖު ވެގެންދާނީ ދިވެހިންނަށް އެންމެ އިންތިޒާމުތައް ރަނގަޅު ފަހަރަށް: ރައީސް

މިފަހަރުގެ ހައްޖު މޫސުން ވެގެންދާނީ ދިވެހިންނަށް މިހާތަނަށް އެންމެ އިންތިޒާމުތައް ރަނގަޅު ފަހަރަށްކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

މައްކާ ރޫޓް އިނީޝިއޭޓިވްސްގެ ސަބަބުން ދިވެހި ހައްޖުވެރިންނަށް ލިބުނު ލުއިފަސޭހަކަމާ ގުޅޭގޮތުން އެކްސްގައި ކުރެއްވި ޕޯސްޓެއްގައި ރައީސް މުއިއްޒު ވިދާޅުވީ، މައްކާ ރޫޓް އިނީޝިއޭޓިވްގައި ބައިވެރިވުމުގެ ފުރުޞަތު މިހާތަނަށް ލިބުނު 8 ޤަައުމުގެ ތެރޭގައި ދިވެހިރާއްޖެ ހިމެނުމަކީ، ވަރަށް ބޮޑު އުފަލެއް، އަދި ޝަރަފެއްކަމަށެވެ.

ރާއްޖެއިން މި އަހަރު ޙައްޖަށް ދިޔަ ފުރަތަމަ 235 ޙައްޖުވެރީންނަށް ސަޢޫދީ ސަރުކާރުން ވަނީ، ވަރަށް ހޫނު މަރްޙަބާއަކާ އެކު، ވަރަށް ފުރިހަމަ މެހެމާންދާރީއެއް އަދާކޮށްފައެވެ. ރައީސް ވަނީ ޙައްޖުވެރީން އެއާޕޯޓުގައި ގިނަވަގުތު މަޑު ކުރަން ނުޖެހި، ދަތުރު ފޮށި ތަންމަތި އަމިއްލައަށް އުފުލަން ނުޖެހި، ބޮޑެތި ލުއިތަކެއް ވަނީ ލިބިފައިވާކަން ފާހަގަކުރައްވާފައެވެ.

އެކްސްގައި ކުރެއްވި މި ޕޯސްޓްގައި ރައީސް ވިދާޅުވީ، މި ފަހަރުގެ މުޅި ޙައްޖު ދަތުރުވެސް ދިވެހި ޙައްޖާޖީންނަށް މިފަދަ އެތައް ލުޔެއް ލިބި، ޚިދުމަތުގެ ފެންވަރުވެސް ރަނގަޅު ވާނޭކަމަށެވެ. އެގޮތުން މިފަހަރަކީ ޙައްޖުވެރީންނަށް އެންމެ ލުއި، އެންމެ އިންތިޒާމު ރަނގަޅު ޙައްޖު މޫސުމަށް ވާނޭކަމަށް ރައީސް ވިދާޅުވިއެވެ.

އުންމީދަކީ ކުރިމަގުގައި މިއަށްވުރެވެސް ކަންކަން ފަހިވުން

ރައީސް ޑރ.މުއިއްޒު ވިދާޅުވިއެވެ

ރާއްޖެއިން މިފަހަރު ހައްޖަށްދާ މީހުންގެ ފުރަތަމަ ގްރޫއްޕް ފުރާފައިވަނީ، އިއްޔެއެވެ. ދެވަނަ ގްރޫޕް މިއަދު ޖިއްދާއަށް ގޮސްފައިވާއިރު، އެ ދަތުރުގައި ބޭނުންކޮށްފައިވަނީ ރައްޖޭގެ ޤައުމީ އެއާލައިނުގެ ބޯޓެކެވެ. ހައްޖުވެރިންނަށް ލުއިފަސޭހަކޮށްދިނުމުގެ ގޮތުން ސަރުކާރުން ވަނީ ގިނަ ހިދުމަތްތަކެއް ތައާރަފްކޮށްފައެވެ. އޭގެ ތެރޭގައި މައްކާރޫޓް އިނީޝިއޭޓް ފާހަގަކޮށްލެވެއެވެ. މައްކާ ރޫޓު އިނީޝިއޭޓިވްއަކީ ހައްޖުވެރިން އަމިއްލަ ޤައުމުން ފުރުމުގެ ކުރިން، ދެ ޤައުމުގެ އިމިގްރޭޝަނުން ކުރަންޖެހޭ ކަންކަން އަމިއްލަ ޤައުމުގެ އެއަރޕޯޓްގައި ތިބެ ނިންމައިގެން ފުރުމެވެ. ނަތީޖާއަކީ ޖިއްދާގެ އެއާޕޯޓްގެ އިމިގްރޭޝަންގައި ޙައްޖުވެރިން މަޑުކުރަން ނުޖެހި ހޮޓަލަށް ދެވޭގޮތަށް ކަންކަން އިންތިޒާމް ވެގެން ދިއުމެވެ.