އައްޑޫ ވޯޓު: ތިން ގަޑިއިރު ވީއިރު ވޯޓުލީ އެންމެ 12 އިންސައްތަ މީހުން

އައްޑޫ މީދު އާއި ހުޅުދޫ އަދި ފޭދޫގައި ވަކިވަކި ރަށު ކައުންސިލްތައް އުފެއްދުމާ މެދު އެ ތިން ރަށުގެ ރައްޔިތުންގެ ފެންނަ ނުފެންނަ ގޮތް ބެލުމުގެ ވޯޓުގައި، ތިން ގަޑިއިރު ވީއިރު ވޯޓު ލާފައިވަނީ އެންމެ 12.42 އިންސައްތަ މީހުން ކަމަށް އިލެކްޝަންސް ކޮމިޝަން (އީސީ)ގެ ތަފާސް ހިސާބުތަކުން ދައްކަައިފިއެވެ.

ޖުމްލަ 9،576 މީހަކަށް ވޯޓު ލުމުގެ ޙައްގު ލިބިފައިވާ މި ވޯޓުގައި، އީސީގެ ހިސާބުތަކުން ދައްކާ ގޮތުން ހެނދުނު 11:00 ޖެހިއިރު ވޯޓު ލާފައިވަނީ 1،189 މީހުންނެވެ. އެއީ ފިރިހެން 534 މީހުންނާއި އަންހެން 655 މީހުންނެވެ.

އީސީގެ ހިސާބުތަކުން ދައްކާ ގޮތުން، މި އިންތިހާބުގައި ވޯޓުލާން ނުކުންނަ މީހުންގެ އަދަދު ވަރަށް މަދެވެ. އެގޮތުން 10 ޖެހިއިރު ވޯޓު ލައިފައިވަނީ 695 މީހަކެވެ.

އެ ހިސާބުގެ ޕެޓާނުން ދައްކާ ގޮތުން، މެންދުރު އަދި ހަވީރުގެ ވަގުތުތަކުގައި ވޯޓުލާން ނުކުންނާނެ މީހުންގެ އަދަދު އިތުރުވާނެ ކަމަށް ބެލެވެއެވެ.

މި އިންތިހާބުގައި ފޭދޫން 4,355 މީހަކަށް ވޯޓު ލެވޭއިރު، ހުޅުދޫން 2،874 މީހަކަށް އަދި މީދޫން 2,347 މީހަކަށް ވޯޓު ލުމުގެ ހައްގު ލިިބެއެވެ.

މި އިންތިހާބަށް މާލެ އާއި މީދު އާއި ހުޅުދޫ އަދި ފޭދޫގައި 18 ވޯޓު ފޮށި ބަހައްޓައިފައިވެއެވެ. އެއީ ހުޅުދޫގައި ތިން ފޮށި، މީދޫގައި ތިން ފޮށި، ފޭދޫގައި ފަސް ފޮށި އަދި މާލޭގައި ދިރިއުޅޭ އެ ތިން ރަށުގެ މީހުންނަށް ހަތް ވޯޓު ފޮއްޓެވެ.

މާލޭގައި ވޯޓު ފޮށިތައް ބަހައްޓާފައި ވަނީ ކަލާފާނު ސްކޫލްގައެވެ.  ވޯޓުލުން ކުރިއަށްދާނީ މިއަދު ހަވީރު 04:00 ޖެހުމާއި ހަމައަށެވެ.