ފެނަކައިން ނުއަގުގައި ދޯންޏެއް ކުއްޔަށް ހިފި ކަމަށް ދެކެވޭ ވާހަކަތައް ދޮގުކޮށްފި

ފެނަކައިން ނުއަގުގައި ދޯންޏެއް ކުއްޔަށް ހިފި ކަމަށް ދެކެވޭ ވާހަކަތައް އެކުންފުނިން ދޮގުކޮށްފިއެވެ.

ފެނަކައަށް ނުއަގުގައި ދޯންޏެއްހިފި ކަމަށް ސޯޝަލް މީޑިއާގައި ދެކެވެމުންދާ ވާހަކަތަކާއި ގުޅިގެން އެ ކުންފުނިން ނެރުނު ނޫސްބަޔާނެއްގައި ބުނީ، އެފަދަ ވާހަކަތައް ދައްކަނީ އެ ކުންފުނިން އެކި ތާރީހުތަކުގައި ތަފާތު ބޭނުންތަކަށް ކޮށްފައިވާ މުއާމަލާތްތަކެއްގެ ލިޔެކިޔުންތަކުން ބައެއް ނަކަލުކޮށްގެން އެއީ އެއް ކަމަކަށް ކޮށްފައިވާ އެއް މުއާމަލާތެއް ކަމަށް ދައްކަން މަސައްކަތްކުރުމަށް ކަމަށެވެ.

ފާއިތުވި 7 މަސް ދުވަހުގެ ތެރޭގައި ކުންފުނީގެ އަދުގެ މެނޭޖްމެންޓުން ކުންފުނީގެ ޕްރޮކިއުމަންޓް މުއާމަލާތްތައް ހަރުދަނާކޮށް، ކުންފުންޏަށް ހިދުމަތް ފޯރުކޮށްދޭ ފަރާތްތަކާއި ކުންފުނިން ހިދުމަތް ފޯރުކޮށްދެމުންދާ ފަރާތްތަކުގެ އިތުބާރު އަލުން ހޯދަމުންދާ ދިއުމަށް ހުރަސް އަޅައި، ހަގީގަތް އޮޅުވާލައި ފިތުނަވެރި ވާހަކަތަކާއި އަޑުތައް ބޭނުންކޮށްގެން ކުންފުނީގެ ސާފުވަމުންދާ ނަން ކިލަނބު ކުރުމަށް ބައެއް ފަރާތްތަކުން ކުރަމުންދާ ނާތަހުޒީބު މަސައްކަތްތަކެއްކަން ފާހަގަކޮށް ފެނަކައިން ބުނީ، މިއީ ވަރަށް ޒިންމާދާރުކަން ކުޑަ، ދި މިނިވަން ނޫސްވެރިކަމުގެ ނިވަލުގައި ތިބެ، މުޖްތަމައު ފަސާދަ ކުރުމަށް ރޭވިގެން ހިންގާ ސިލްސިލާގެ ތެރެއިން ބޮޅެއްކަމަށެވެ.

ފެނަކައިން ބުނީ، އެ ކުންފުންޏަކީ ރާއްޖޭގެ 157 ރަށުގައި ފެނާއި ނަރުދަމާ އަދި ކަރަންޓުގެ އަސާސީ ހިދުމަތްތައް ފޯރުކޮށްދެމުންދާ ކުންފުންޏަކަށްވެފައި، ހިދުމަތްތަކަށް ބޭނުންވާ އެންމެ އަސާސީ ތަކެތި ވެސް ރަށްރަށުން ލިބެން ނުހުންނައިރު، ރަށްރަށުގެ ރައްޔިތުންނަށް މެދުކެނޑުމެއް ނެތި އިތުބާރާއެކު އެހިދުމަތްތައް ފޯރުކޮށްދިނުމަށް ކޮންމެހެން ފޮނުވަން ޖެހޭ ގިނަ އަދަދެއްގެ ތަކެތި މާލޭން އެރަށްރަށަށް އަދި އެއް ރަށުން އަނެއް ރަށަށް ފޮނުވުމަކީ ކުންފުނީގެ ދުވަހުން ދުވަހަށް ކުރެވޭ މުހިންމު މަސައްކަތުގެ ތެރެއިން ބައެއް ކަމަށެވެ.

ފެނަކައިން އިތުރަށް ބުނީ، މިފަދަ ފިތުނަ ފަސާދަ އުފެއްދުމުގެ މައިގަނޑު އެއް ސަބަބަކީ  ފާއިތުވިތަނުގައި ވަކި ދަތުރުތަކަށް ދޯނި ފަހަރު ނަގައި، އެވްރެޖް ގޮތެއްގައި 7 މިލިއަން ރުފިޔާ މަހެއްގެ މައްޗަށް ދަތުރުފަތުރަށް ހަމަޖައްސައި، އެ ކަމުން ނާޖައިޒު ފައިދާތަކެއް ބަޔަކު ނަގާފައި އޮތްއޮތުން ނިމުމަކަށް ގެނެސް، ކުންފުންޏަށް އެންމެ ފައިދާ ހުރި ގޮތުގައި އެއް ކުރެވެން ހުންނަ ދަތުރުތައް އެއްކޮށް، ގިނަ ދަތުރުތައް ކުރަން ޖެހުނަސް ހަރަދު ބޮޑުވެގެން ނުދާނެކަން ކަށަވަރު ކުރެވެނިވި ގޮތަކަށް ކުންފުނީގެ ތާރީހުގައި އެންމެ ކުޑަ އަގުގައި، ކުންފުނީގައި ކަނޑައަޅާފައިވާ ގަވައިދުތަކާއި އުސޫލުތަކުގެ ތެރެއިން ކުންފުނީގެ އަދުގެ މެނޭޖްމަންޓުން އެކަން ހަރުދަނާކޮށް އިންތިޒާމު ކުރަމުންދާ ދިއުން، ކުރިން އެކަންކަމުން ނާޖައިޒު ފައިދާ ހޯދި އަދި ހޯދައިދިން ފަރާތްތަކުން ދަތި އިހްސާސްތަކަކަށް ވުން ކަމަށެވެ.

ފެނަކައިން ވަނީ ރައީސް ޑރ.މުޢިއްޒު ކަނޑައަޅުއްވާފައިވާ ދެފުށް ފެންނަ ހަރުދަނާ އިންތިޒާމުތަކުގެ ތެރެއިން ރައްޔިތުންނާއި ގާތުން، ރައްޔިތުންނަށް ފައިދާ ހުރި ގޮތުގައި ހިދުމަތް ދިނުމުގައި ސިޔާސަތު ތަންފީޒު ކުރުމުގައި ސާބިތުކަމާއި އެކީ ކުރިއަށްދާނެ ކަމުގެ ޔަގީންކަން ދީފައެވެ.