ސްވައިޕް މެދުވެރިކޮށް ފައިސާ ހަރަދު ކުރެވޭވަރު ބެލުމުގެ ނިޒާމެއް އޮތުމަކީ ލިބުނު ލުޔެއް: އިޙްސާން

ސްވައިޕް މެދުވެރިކޮށް ފައިސާ ހަރަދު ކުރެވޭ މިންވަރާއި، އެ ޚަރަދުކުރެވޭ ކަންކަން ބެލުމުގެ ނިޒާމެއް އޮތުމަކީ ލިބުނު ބޮޑު ފަސޭހައެއް ކަމަށް ދާޙިލީ ސަލާމަތާ ފަންނިއްޔާތާ ބެހޭ ވަޒީރު ޢަލީ އިޙްސާން ވިދާޅުވެއްޖެއެވެ.

އައްޑޫއަށް ސްވައިޕް ތަޢާރަފް ކުރުމަށް ބޭއްވި ރަސްމިއްޔާތުގައި ވާހަކަދައްކަވަމުން އިހްސާން ވިދާޅުވީ، ފަސޭހަކަމާއެކު ފައިސާގެ މުޢާމަލާތް ކުރެވޭނެ މަގެއް އޮތުމަކީ ދިވެހި ކޮންމެ ރައްޔިތަކަށްވެސް ފައުދާ ކުރާނެ ކަމެއް ކަމަށެވެ.

އަދި ހަމައެހެންމެ އަމިއްލަ ފައިސާ ޚަރަދުކުރެވޭ ގޮތް ޓްރެކް ކުރެވޭނެ ގޮތެއް އޮތުމަކީވެސް ގިނަ ލުއިތަކެއް ލިބިގެންދާނެ ކަމެއް ކަމަށެވެ.

އަޅުގަނޑުމެންގެ އަމިއްލަ ފައިސާ ޓްރެކް ކުރެވޭނެ ނިޒާމެއް އޮތުމަކީވެސް ވަރަށް މުހިންމު ކަމެއް. ވަރަށް ގިނަ ފަހަރަށް މުޅި މުސާރަ ހުސްވެގެންދާއިރުވެސް، މި ދިޔައީ ކޮން އެއްޗަކަށް ކަމެއްވެސް ބައެއް މީހުންނަކަށް ނޭނގެ. މި ވޮލެޓް (ސްވައިޕް) ގެ ތެރޭގައި އެބަހުރޭ، މީހާގެ އެކްސްޕެންސްތައްވެސް ޓްރެކްކުރެވޭ ގޮތަށް. ކެޓަގަރައިޒް ކުރެވޭގޮތަށް. އަދި ކުރިއަށް އޮތްތާ އެމީހާ ފައިނޭންޝިއަލީ އެމީހާ ޕްލޭން ކޮށްގެން މީހާގެ މާލީ ހާލަތު ބެލެހެއްޓޭނެ ގޮތްވެސް އެބައޮތް. އެހެންވީމާ މިފަދަ ފުރިހަމަ ނިޒާމެއް އެކުލެވިގެން އައުމަކީ އަޅުގަނޑުމެން ވަކިވަކި ފަރުދުންވެސް ފައިނޭންޝިއަލް ޑިސިޕްލިންވެސް ކުރިއަށް އޮތްތާނގައި ހިފެހެއްޓުމަށް ބާރުއެޅިގެންދާނެ ކަމެއް

ދާޙިލީ ސަލާމަތާ ފަންނިއްޔާތާ ބެހޭ ވަޒީރު ޢަލީ އިޙްސާން

މިއާއެކު ވަޒީރު ވަނީ ސްވައިޕް އާއެކު ވިޔަފާރިވެރިންނަށާއި، އަމިއްލަ ފަރުދުންނަށް ލިބިދާނެ އެހެން ފައިދާ ތަކާއި ލުއިތަކުގެ މައްޗަށް އަލިއަޅުވާލައްވާފައެވެ.

އެގޮތުން ވިދާޅުވީ، ފަސޭހަކަމާއެކު، އެމީހެއްގެ ފައިސާ ފަސޭހައިން ލިބުމާއި، އެ ލިބޭ ފައިސާ ފަސޭހަކަމާއެކު އޮޑިޓް ކުރެވޭނެ ގޮތްތައް ހުރުމަކީ ހިސާބުކިތާބު ބެލެހެއްޓުމަށް މުހިންމު ކަމެއް ކަމަށެވެ.

ހަމައެއާއެކު ޑިޖިޓަލް ކޮމާސްއަށް، ގްރޯތްއަށް ބަލާ ބޭފުޅުންނަށް ކުރިއަށް އޮތް ތާންގައި އައު އޭރިއާ ތަކަކަށް ވިޔަފާރި ފުޅާ ކުރުމަށް މިއޮތީ ވަރަށް ފުރިހަމަ ގޮތެއް ބީއެމްއެލްއިން ހޯދައިދެއްވާފައި

ދާޙިލީ ސަލާމަތާ ފަންނިއްޔާތާ ބެހޭ ވަޒީރު ޢަލީ އިޙްސާން

ވަޒީރު އިތުރަށް ވިދާޅުވީ، ދައުލަތުގެ އިގްތިޞާދަށް ބަލާއިރު، ފައިނޭންޝިއަލީ އިނޮވޭޓިވް ވާނެ މާގިނަ ގޮތްތަކެއް ނޯންނަ ކަމަށެވެ. ނަމަވެސް، ސްވައިޕް އަކީ ދައުލަތުގެ ފައިނޭންޝިއަލް ސިސްޓަމްވެސް އިނޮވޭޓް ކޮށްދިން ވޮލެޓެއް ކަން އިހްސާން ފާހަގަކުރެއްވިއެވެ.

އެހެންކަމުން ސްވައިޕް އަކީ ވަކިވަކި ފަރުދުންނަށާއި، ކުންފުނި ތަކަށާއި ވިޔަފާރިތަކަށްވެސް ވަރަށް މުހިންމު ވޮލެޓެއް ކަމަށް އިހްސާން ވިދާޅުވިއެވެ.