ރާއްޖެއަކީ އަގުހުރި ރަހުމަތްތެރިއެއް، ރައްޔިތުންގެ މަންފާއަށް ދެގައުމުން މަސައްކަތް ކުރާނެ: މޯދީ

ރާއްޖެ އަކީ އިންޑިއާގެ އަގުހުރި ރަހުމަތްތެރިއެއް ކަމަށާއި، ރައްޔިތުންގެ މަންފާއަށް ދެގައުމުން ވެސް މަސައްކަތްކުރާނެ ކަމަށް އިންޑިއާގެ ބޮޑުވަޒީރު ނަރެންދްރަ މޯދީ ވިދާޅުވެއްޖެއެވެ.

މޯދީ މިފަދައިން ވިދާޅުވީ، އިންޑިއާގެ 78 ވަނަ މިނިވަން ދުވަހުގެ ތަހުނިޔާ އަރިސްކުރައްވަމުން ރައީސް ޑރ.މުޙައްމަދު މުޢިއްޒު އެކްސްގައި ކުރެއްވި ޕޯސްޓަށް ޝުކުރު އަދާކުރައްވަމުންނެވެ.

އެ މުނާސަބަތާއި ގުޅިގެން އިންޑިޔާގެ ރައީސް ދްރައުޕަދީ މުރުމު އަދި މޯދީ އަށް މަރުހަބާ ދަންނަވަމުން ރައީސް ޑރ.މުޢިއްޒު ކުރެއްވި ޕޯސްޓްގައި ވިދާޅުވީ، ރާއްޖެއާއި އިންޑިޔާއާ ދެމެދު އޮތް ގުޅުމަކީ ދުވަސްވީ ގުޅުމެއް ކަމަށާއި، މި ގުޅުން ވަނީ ރާއްޖެއާއި މުޅި ސަރަޙައްދުގެ ތަރައްޤީއާއި ކުރިއެރުމަށް މަގުފަހިކޮށްދޭ ގުޅުމަކަށް ވެފައި ކަމަށެވެ.

ކުރިއަށް އޮތްތަނަށް ބަލާއިރު، ދެ ޤައުމުގެ ދެމެދުގައި އޮތް މި ބަދަހި ގުޅުން އިތުރަށް ވަރުގަދަވެ، ދެ ޤައުމަށް ވެސް ފައިދާ ކުރާނެ ކަމަށާއި، ދެ ޤައުމުން ޙާޞިލުކުރަން ބޭނުންވާ ލަނޑުދަނޑިތައް ޙާޞިލުކުރުމަށް މަގުފަހިވެގެންދާނެ ކަމުގެ ޔަޤީންކަން އޮތް ކަމަށް ވެސް ރައީސް ޑރ.މުޢިއްޒު ވިދާޅުވިއެވެ.

މިކަމާއި ގުޅިގެން، މޯދީ އެކްގައި ކުރެއްވި ޕޯސްޓްގައި ވަނީ އިންޑިއާގެ މިނިވަން ދުވަހުގެ ތަހުނިޔާ ފޮނުއްވީތީ ރައީސް ޑރ.މުޢިއްޒުއަށް ޝުކުރު އަދާކުރައްވާފައެވެ. ރާއްޖެ އަކީ އަގުހުރި ރަހުމަތްތެރިޔެއް ކަމަށް އިންޑިއާއިން ދެކޭ ކަމަށް ވިދާޅުވެފައެވެ.

ހަމައެއާއިއެކު، މޯދީ ވިދާޅުވީ، އިންޑިއާ އާއި ރާއްޖެއިން ވެސް ދެގައުމުގެ ރައްޔިތުންގެ މަންފާ އަށް މަސައްކަތް ކުރަމުންދާނެ ކަމަށެވެ.

އިންޑިއާގެ މިނިވަންދުވަހަކީ 1947 ވަނަ އަހަރުގެ އޮގަސްޓްމަހު އިނގިރޭސިންގެ އަޅުވެތިކަމުގެ ދަށުން އެޤައުމަށް މިނިވަންކަން ލިބުނު ދުވަހެވެ. އިންޑިއާގެ މިނިވަން ދުވަހުގެ ގޮތުގައި ކޮންމެ އަހަރެއްގެވެސް އޮގަސްޓްމަހުގެ 15 ވަނަ ދުވަސް ފާހަގަކުރާއިރު، އެޤައުމުގެ މިނިވަންކުރެއްވި ބާނީ އަކީ މަހަތުމާ ގާންދީއެވެ.