އިންތިހާބުގެ ކެމްޕެއިނަށް ނިކުންނައިރު އެންމެ ބާރުގަދަ ހަތިޔާރު އޮތީ އެމްޑީޕީ އަތުގައި: ޝާހިދު
ލިޔުންތެރިޔާ
އަބްދުﷲ ހުސައިން
ކުރިއަށްއޮތް ލޯކަލް ކައުންސިލް އިންތިހާބަށް ނިކުންނައިރު އެންމެ ވަރުގަދަ ހަތިޔާރު އޮތީ އެމްޑީޕީގެ އަތުގައިކަމަށް އެ ޕާޓީގެ ރައީސް ޢަބްދުﷲ ޝާހިދު ވިދާޅުވެއްޖެއެވެ.
މާލެސިޓީގެ މެނިފެސްޓޯ އިފްތިތާހުކުރުމަށް ރޭ ބޭއްވި ޖަލްސާގައި ވާހަކަދައްކަވަމުން ޝާހިދު ވިދާޅުވީ. އެމްޑީޕީ ފިޔަވައި އެހެން ޕާޓީތަކުގެ ފިކުރުގައި އޮންނަނީ ވޯޓު ގަނެގެން ކަންކަން ކުރުމުގެ ނިޔަތް ކަމަށާއި، ނަމަވެސް އެމްޑީޕީގެ ފިކުރަނީ ފެށުނީއްސުރެ ރައްޔިތު މީހާ ގާތަށްގޮސްގެން ހަޤީގަތް އޮޅުން ފިލުވައިދީގެން ވޯޓު ހޯދުންކަމަށެވެ.
ޝާހިދު ވިދާޅުވީ އެމްޑީޕީން 2008 ވަނަ އަހަރުން ފެށިގެންވެސް މަސައްކަތް ކުރަމުން އައިސްފައިވަނީ މި ރޫހުގައި ކަމަށާއި، އެޕާޓީއާ އެހެން ޕާޓީއާ ތަފާތުވަނީ އެހެންވެގެން ކަމަށެވެ.
އަޅުގަނޑުމެންނާ ވާދަކުރައްވާ ބޭފުޅުން ޕީއެންސީގެ ބޭފުޅުން ކަމުގައިވިޔަސް އަދި އެހެން ބޭފުޅުން ކަމުގައިވިޔަސް. ވާދަކުރައްވާ ބޭފުޅުންގެ ފިކުރުގައި މުޅިންވެސް އޮންނަނީ ތިމަންނަވެންނަށް ވޯޓު ގަނެވޭނެ. ތިމަންނަމެންނަށް ވަޒީފާގެ ބިރު ދައްކައިގެން ވޯޓު މަޖުބޫރު ކުރެވޭނެ. އެމްޑީޕީއަކީ ވޯޓު ގަންނަ ބައެއް ނޫން. އެމްޑީޕީއަކީ ވޯޓަށް މަޖުބޫރު ކުރާ ބައެއް ނޫން. އެމްޑީޕީގެ ވިސްނުމުގައި އޮންނަނީ ރައްޔިތު މީހާގެ ކައިރިއަށް ގޮސް ހަގީގަތް އޮޅުންފިލުވައިދީގެން ވޯޓުހޯދުން
އެމްޑީޕީގެ ރައީސް ޢަބްދުﷲ ޝާހިދު
ޝާހިދު ވިދާޅުވީ އެމްޑީޕީގެ ފަރާތުން ލޯކަލް ކައުންސިލް އިންތިހާބަށް ކުރިމަތިލާފައި ތިއްބެވި ކެނޑިޑޭޓުންނަކީ އާދަޔާ ހިލާފު ހިތްވަރުގަދަ ކެންޑިޑޭޓުންތަކެއް ކަމަށެވެ. އެގޮތުން މިއަދުގެ ސިޔާސީ މާހައުލުގައި ބިރުދެއްކުމާއި އިންޒާރުކުރުމާއި ވަޒީފާގެ ފިއްތުންތަކާއި ރިޝްވަތުގެ މުޑުދާރު އަމަލުތަކުގެ ކުރިމަތީގައި ބޯ ނުލަނބައި ކެންޑިޑޭޓުން ނިކުމެވަޑައިގެން ތިއްބެވީ ސަބަބެއް އޮވެގެކަމަށް ޝާހިދު ވިދާޅުވިއެވެ.
ޝާހިދު ވިދާޅުވީ މާލެއަށް މި ދިޔަ 10 އަހަރު ދުވަހުގެ ތެރޭގައި ގެނެވިފައިވާ އިސްލާހީ ހުރިހާ ކަމެއްގެ ހަގީގީ މޭސްތިރިއަކީ، އެމްޑީޕީ ތަމްސީލް ކުރައްވާ މާލެސިޓީގެ މޭޔަރު ކަމަށެވެ. އެގޮތުން މާލެސިޓީގައި ގުޔާއި ނަޖިހާ ގުޅިގެން ހެދިފައި އޮންނަ ކޯރުތަކުގެ ތެރޭގައި ސިޔާސީ ވެރިން ނުކުމެ ނާޗަރަންގީ ކުޅުނު ޒަމާން ނިމުމަކަށް ގެނައީ އެމްޑީޕީން ކަމަށާއި، މާލެ ބަދަލުކޮށްލަން މާލޭގެ ވިންދު ބަދަލުކޮށްލާނީ އެމްޑީޕީން ކަމަށެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
