ރުމޭނިޔާގެ މުފްތީއާއި އެކު މިނިސްޓަރ ޝާހިދު ރޯދަވީއްލަވައިފި
ރުމޭނިޔާއަށް މިހާރު ކުރައްވަމުން ގެންދަވާ ރަސްމީ ދަތުރުފުޅުގެ ތެރެއިން ފޮރިން މިނިސްޓަރ އަބްދުﷲ ޝާހިދު، އެގައުމުގެ އިސް މުފްތީއާއި ބައްދަލުކުރައްވައިފިއެވެ.
މި ބައްދަލުވުން އޮތީ ބުޗަރެސްޓްގައި ހުންނަ ހުންޗިއާރް-ކެރޮލް މިސްކިތުގައެވެ. މުފްތީ ޔޫސުފް މުރާތް ވަނީ މިނިސްޓަރ ޝާހިދުގެ ޝަރަފުގައި ރޯދަވީއްލުމެއްވެސް ދެއްވާފައެވެ.
މި ރޯދަ ވީއްލުމާއި އެކު މިނިސްޓަރ ވަނީ އެ މިސްކިތުގައި މަޣްރިބް ނަމާދުގެ އަޅުކަންވެސް އަދާކުރައްވާފައެވެ.
ވޮއިސްއަށް މައުލޫމާތު ދެއްވަމުން ފޮރިން މިނިސްޓްރީގެ ކޮމިއުނިކޭޝަން ޑިރެކްޓަރ މިއުވާން މުހައްމަދު ވިދާޅުވީ އީޔޫ ކައުންސިލްގެ ރިޔާސަތު ބަލަހައްޓަމުންދާ ރުމޭނިއާ ސަރުކާރުގެ އިސް އޮފިޝަލުންނާއި އެކު ބޭއްވި ބައްދަލުވުންތަކުގައި ދެޤައުމުގެ ގުޅުމާއި ބެހޭ ގޮތުން ކުރައްވާ މަޝްވަރާތަކުގެ އިތުރުން އީޔޫއާއި ގުޅުން ހުރި އެހެން މަޝްވަރާތައް މިނިސްޓަރ ކުރެއްވިކަމަށެވެ.
"އެގޮތުން އީޔޫއިން ރާއްޖެއަށް އިންވެސްޓްމަންޓްތައް ގެނައުމާއި، ދިވެހި މަސްވެރިކަމުގެ ބާވަތްތަކުން ނަގާ 24 އިންސައްތަ ޑިއުޓީ ކުޑަކުރުމުގެ އިތުރުން ޔޫރަޕަށް ދާން ނަގަން ޖެހޭ ވިސާއާއި ގުޅޭ ގޮތުން މަޝްވަރާކުރައްވައި، އެކަންކަމުގައި ރާއްޖެއަށް ފަސޭހަތަކެއް ލިބޭތޯ މިނިސްޓަރ މަޝްވަރާކުރެއްވި"، މިއުވާން ވިދާޅުވިއެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
