ވެރިކަމަށް 533 ދުވަސް: އާރަށަށް ވަޑައިގަތީ 116 ފަހަރު، 85 ފަހަރު ވަޑައިގަތީ ފުޓްބޯޅަ ކުޅެން

ރައީސުލްޖުމްހޫރިއްޔާ ޑރ. މުހައްމަދު މުއިއްޒު, އާރަށަށް ވަޑައިގަންނަވާ މިންވަރު އިތުރު ކަމަށް ބުނާ ވާހަކަތަކަށް ތަފާސް ހިސާބުން އެމަނިކުފާނު މިއަދު ޖަވާބު ދެއްވައިފި އެވެ.

ނޮވެންބަރު 17, 2023 ގައި ފެށުނު ރައީސް މުއިއްޒުގެ ވެރިކަމަށް މިއަދަަށް 533 ދުވަސްވީ އެވެ. އެމަނިކުފާނު ވިދާޅުވި ގޮތުގައި މި މުއްދަތުގައި އެމަނިކުފާނު އާ ރަށަށް ވަޑައިގެންނެވީ 116 ފަހަރު އެވެ.

އާންމު ގޮތެއްގައި ހަފްތާއަކު ތިން ދުވަހު ވަޑައިގަންނަވަ އެވެ. ރައީސް ވިދާޅުވީ 116 ފަހަރުގެ ތެރެއިން 85 ފަހަރު ވަޑައިގެންނެވީ ފުޓްބޯޅަ ކުޅުއްވުމަށެވެ. އެމަނިކުފާނަކީ ވަރަށް ބޮޑަށް ފުޓްބޯޅަ ކުޅުއްވާ ހިތްޕުޅުވާ ބޭފުޅެއް ކަމަށް ވިދާޅުވި އެވެ. އެހެން ކަމުން ހުސް ވަގުތުގައި ފުޓްބޯޅަ ކުޅުއްވަން ވަޑައިގަންނަވާ ކަމުގައި ވިދާޅުވި އެވެ. އާ ރަށަށް ވަޑައިގަންނަވަނީ އެ ރަށުގައި ފެންވަރު ރަނގަޅު ފުޓްސަލް ދަނޑެއް އޮތުމުން ކަމަށް ވިދާޅުވި އެވެ.

އަދި މާލޭގެ ފުޓްސަލް ދަނޑަކަށް ކުޅެން ވަޑައިނުގަންވަނީ ސެކިއުރިޓީއާ ޓްރެފިކާއި އެހެން ކަންކަމަށް ބަލާއިރު އާރަށަށް ވަޑައިގަތުން ރަނގަޅު ކަމަކަށްވުން ކަމަށެވެ.

އެއި ރަނގަޅު ސިއްހަތެއްގައި ހުންނެވުމަށް ވެސް މުހިންމު ކަމެއް ކަމުގައި ވިދާޅުވި އެވެ. އަދި ވިދާޅުވީ ފުޓްބޯޅަ ކުޅުއްވަން ވަޑައިގަންނަވާ ރޭރޭ އާ ރަށުގައި ހޭދަ ކުރައްވަނީ ތިން ހަތަރު ގަޑިއިރު ކަމަށެވެ.

އަދި އާއިލާއާއެކު 31 ފަހަރު އެ ރަށަށް ވަޑައިގެންފައިވާ ކަމަށް ވިދާޅުވި އެވެ.

ލޯންޗުތަކުގެ ތެލުގެ ހަރަދަށް 8 ލައްކަ ރުފިޔާ

ރައީސް ވިދާޅުވީ އެ ދަތުރުތަކުގެ ތެލުގެ ހަރަދު ވެސް އެމަނިކުފާނު އޮޅުންފިލުވާފައިވާ ކަމަށެވެ. އެމަނިކުފާނު ވަޑައިގަންނަވާތީ ރަސްމީ ލޯންޗުކޮޅުގެ އިތުރުން ސެކިއުރިޓީ ދެ ލޯންޗުކޮޅު ދަތުރުކުރާ ކަމުގައި ވިދާޅުވި އެވެ.

މިހާތަނަށް އާރަށަށް ކުރެއްވި 116 ދަތުރަށް ތިން ލޯންޗުގެ ތެލަށް ހަރަދުވެފައި ވަނީ 8 ލައްކަ 44 ހަތަރު ހާސް ރުފިޔާ ކަމުގައި ވިދާޅުވި އެވެ.

އެ މައުލޫމާތު ސިފައިން މެދުވެރިކޮށް ހޯއްދެވީ ވީހާވެސް ހާމަކަން ބޮޑު ގޮތެއްގައި މައުލޫމާތު ހިއްސާ ކުރެއްވުމަށް ކަމަށް ރައީސް ވިދާޅުވި އެވެ.

ރިޔާސީގަނޑުވަރުގެ ފަރިއްކޮޅަށް ބޮޑު ހަރަދެއް: ބޮޑު ދޮގެއް

ރައީސް ވިދާޅުވީ ރިޔާސީގަނޑުވަރު މުލިއާގޭގެ ފަރިއްކޮޅަށް ބޮޑު ހަރަދެއް ހިނގާ ކަމަށް ބުނެ ފަތުރަމުން ދަނީ ދޮގު ހަބަރެއް ކަމަށެވެ. އަދި މުލިއާގެއަށް ގަންނަ ކާބޯތަކެތީގެ ބިލްތަކެއް ކަމަށް ބުނެ ފަތުރަމުން ދަނީ އުފައްދާފައިވާ ލިޔުންތަކެއް ކަމަށެވެ.

ރައީސް ވިދާޅުވީ މިދިޔަ އަހަރު މުލިއާގޭގެ ކާބޯތަކެއްޗަށް ހަރަދުކޮށްފައި ވަނީ 5 ލައްކަ 63 ހާސް ރުފިޔާ ކަމަށެވެ. އަދި މި އަހަރުގެ މިހާތަނަށް ހަރަދު ކޮށްފައިވަނީ ލައްކައެއްހާ ރުފިޔާ ކަމަށެވެ.

އެ ހުރިހާ ކަމަކަށް ހިނގާފައިވާ ހަރަދުގެ ސީދާ ތަފްސީލު އެމަނިކުފާނު ދެއްވި އެވެ.

ރައީސް ވަނީ އެމަނިކުފާނާއި ގުޅުވާ އެއްވެސް އަސާސެއް ނެތް އެފަދަ ދޮގުތައް ފަތުރަމުންދާތީ އެކަމާއި ކަންބޮޑުވުން ފާޅު ކުރައްވާފަ އެވެ.