އެމްޑީޕީގެ ކެނޑިޑޭޓުންނަށް ވެށިފަހި މާލެ ފްލެޓްތަކަށް ޔަޤީންކަން ދެނީ!

ކުރީގެ ރައީސް މުހައްމަދު ނަޝީދުގެ ސަރުކާރުގައި ހިންގި ވެށިފަހި މާލެ ޕްރޮގްރާމްގެ ދަށުން ފްލެޓް ލިބުމުގެ ޝަރުތުތައް ހަމަވިނަމަވެސް، ފްލެޓް ނުލިބުނު ފަރާތްތަކަށް ފްލެޓް ހޯދައިދޭނެކަމަށް މަޖިލިސް އިންތިޚާބުގައި ވާދަކުރާ އެމްޑީޕީގެ ކެނޑިޑޭޓުން ވައުދުވާން ފަށައިފިއެވެ.

ނަމަވެސް ސަރުކާރުން ރަސްމީ ޕޮލިސީއެއްގެ ސިފައިގައި ވެށިފަހި މާލެ ޕްރޮގްރާމަށް ކުރިމަތިލައި ފްލެޓް ނުލިބުނު ފަރާތްތަކަށް، ފްލެޓްދޭން ނިންމިކަން އެނގިފައެއް ނުވެއެވެ.

މިހާރު ނޫހުން ރިޕޯޓްކުރާ ގޮތުގައި ވެށިފަހި މާލެ ޕްރޮގްރާމަށް ކުރިމަތިލީ މީހުންގެ ތެރެއިން ފްލެޓް ނުލިބި އެންމެ ދަތި ހާލުގައި ދިރިއުޅެމުންދާ 4،000 މީހުންގެ ލިސްޓެއް އެމްޑީޕީގެ ކެމްޕޭން އޮފީސްތަކުގައި ގެންގުޅެއެވެ.

އަދި މި ލިސްޓްގައިވާ ފަރާތްތަކުގެ ކައިރިން ކެނޑިޑޭޓުން ފްލެޓްދޭނެކަމަށްބުނެ ވައުދުވަމުންދާކަމަށް އެނޫހުން ވަނީ ބުނެފައެވެ.

ފާހަގަކޮށްލެވޭ ގޮތުގައި ވެށިފަހި މާލެ މަޝްރޫއުން ފްލެޓް ނުލިބި ތިބި މީހުންނަށް ޚާއްސަ ބައްދަލުވުމެއް ބާއްވަން އެމްޑީޕީން ވަނީ ނިންމާފައެވެ. އެ ބައްދަލުވުން އޮތީ މާދަމާ ރޭ 9:00 ދަރުބާރުގޭގައެވެ.