މާދަމާ ވޯޓް ލިސްޓުތަކުގައި ސޮއިކުރަން ފަށާނެ

އެޕްރީލް މަހުގެ 6 ވަނަ ދުވަހު ބޭއްވުމަށް ހަމަޖެހިފައިވާ ރައްޔިތުންގެ މަޖިލީހުގެ އިންތިހާބަށް ކުރިމަތިލާފައިވާ ކެންޑިޑޭޓުންގެ ފަރާތުން ވޯޓުލާ މީހުންގެ މައުލޫމާތު ހިމެނޭ ލިސްޓްތަކުގައި ސޮއިކުރުން މާދަމާއިން ފެށިގެން ކުރިއަށް ގެންދަން އިލެކްޝަންސް ކޮމިޝަނުން ނިންމައިފިއެވެ.

އިލެކްޝަންސް އިން ބުނެފައިވާ ގޮތުގައި ބާޖަމާލުއްދީން އިމާރާތުގައި ޤާއިމްކޮށްފައިވާ އިންތިޚާބާ ބެހޭ މަރުކަޒުގައި މާދަމާ ހެނދުނު 8:30 އިން ފެށިގެން ވޯޓާސް ލިސްޓުތަކުގައި ސޮއިކުރުން ކުރިއަށް ގެންދާނެ ކަމަށެވެ.

އެގޮތުން މާޗް 24 އަދި 25 ވަނަ ދުވަހު ވެސް ހެނދުނު 8:30 އިން ފެށިގެން ރޭގަނޑު 10:30 އަށް ސޮއިކުރުން ކުރިއަށް ގެންދާނެއެވެ. އަދި މާޗް މަހުގެ 26 ވަނަ ދުވަހު ހެނދުނު 8:30 އިން ހަވީރު 3 އާއި ހަމައަށް ވެސް ސޮއިކުރުން ކުރިއަށް ގެންދާނެއެވެ.

މިފަހަރުގެ ރައްޔިތުންގެ މަޖިލިސް އިންތިޚާބުގައި 264،589 މީހުންނަށް ވޯޓު ލުމުގެ ހައްޤު ލިބިފައިވެއެވެ. އަދި ރާއްޖެ އާއި ރާއްޖެ އިން ބޭރުގައި 501 ވޯޓު ފޮށި ބަހައްޓާނެއެވެ.

އިލެކްޝަންސް އިން ބުނެފައިވާ ގޮތުގައި މަޖިލިސް އިންތިޚާބުގައި ކޮންމެ ވޯޓު ފޮއްޓަކަށް ގިނަވެގެން ވޯޓުލާނީ 1،000 މީހުން ކަމަށެވެ.

މަޖިިލިސް އިންތިޚާބުގެ ކެމްޕެއިން ވަރަށް ފޯރީގައި ކުރިއަށް ގެންދާއިރު މިފަހަރުގެ އިިންތިޚާބުގައި އެންމެ ގިނަ ކެންޑިޑޭޓުން ވާދަ ކުރައްވަނީ އެމްޑީޕީގެ ޓިކެޓުގައެވެ.