ޕެޕަރ ސްޕުރޭ ބޭނުން ކުރީ އެންމެ ކުޑަ މިންވަރަށް: ފުލުހުން

އިންދިރ ގާނދީ މެމޯރިއަލް ހޮސްޕިޓަލް ތެރޭގައި ޕެޕާރ ސްޕްރޭ ބޭނުންކޮށްފައިވަނީ އެހާލަތުގައި އެ ސްޕްރޭ ބޭނުންކުރާ އެންމެ ކުޑަ މިންވަރަށް ކަމަށް ފުލުހުން ބުނެފިއެވެ.

ޝަރީއަތް ނިމެންދެން ފުލުހުން ހައްޔަރުކޮށްފައިވާ ކުރީގެ ރައީސް ޔާމީން އަބްދުލްހައްޔޫމު މިއަދު އައިޖީއެމްއެޗް ހޮސްޕިޓަލަށް ގެންދިއުމާއި އެކު އެބޭފުޅާއަށް ތާއީދު ކުރައްވާ ފަރާތްތަކުން ވަނީ ހޮސްޕިޓަލުގެ ތެރެއަށް ވަދެ އަޑުގަދަކޮށް މުޒާހަރާކޮށްފައެވެ. އެކަން ކޮންޓްރޯލްކޮށް ހަމަޔަކަށް އެޅުވުމަށް ފުލުހުން ވަނި ޕެޕަރ ސްޕްރޭ ބޭނުންކޮށްފައެވެ.

ފުލުހުން ހޮސްޕިޓަލުގެ ތެރޭގައި ޕެޕަރ ސްޕްރޭ ބޭނުންކުރުމާއި ގުޅިގެން ޕީޕީއެމަށް ނިސްބަތްވާ ފަރާތްތަކުން ފުލުހުންނަށް އަމާޒްކޮށް ފާޑުކިޔާ ވަކިވަކި ފުލުހުންގެ މައުލޫމާތާއި ފޮޓޯ އާންމުކޮށްފައިވެއެވެ.

އެކަމާއި ގުޅިގެން ފުލުހުން ނެރުނު ނޫސްބަޔާނެއް ގައި ބުނެފައިވަނީ ހޮސްޕިޓަލްތަކަކީ އެއްވެ އުޅުމުގެ ގާނޫނުގައި އެއްވެ އުޅުމަށް މަނާތަނެއް ކަމަށެވެ.

އަދި ރައީސް ޔާމީނަށް ތާއީދު ކުރާ ފަރާތްތަކުން ހޮސްޕިޓަލްގެ "ކާޑިއޮލޮޖީ ސެންޓަރު"ގެ ތެރެއަށް ވަންނަން މަސައްކަތް ކުރި ކަމަށާއި ފުލުހުން ތަކުރާރުކޮށް އެސަރަހައްދަށް ގިނަ އަދަދެއްގެ ބަޔަކު އެއްފަހަރާ ނުވަނުމަށް އެންގުމުންވެސް ނުކިޔަމަންތެރިކަން ދައްކާ އަޑުގަދަކޮށް، ގަދަކަމުން ހޮސްޕިޓަލް ތެރެއަށް ވަދެގަތުމަށް އުޅުމުން އެކަން ހުއްޓުވައި ކޮންޓްރޯލް ކުރުމަށް ޕެޕާ ސްޕްރޭ ބޭނުންކުރަން ޖެހުނު ކަމަށް ފުލުހުން ބުނެފައިވެއެވެ .އަދި އެސަރަހައްދުގައި ހިންގަން އުޅުނު ހަމަނުޖެހުން ކޮންޓްރޯލް ކުރުމަށްޓަކައި ފުލުހުން ޕެޕާ ސްޕްރޭ ބޭނުން ކޮށްފައިވާނީ އެހާލަތުގައި ބޭނުން ކުރަން ޖެހުނު އެންމެ ކުޑަ މިންވަރަށް ކަމަށް ވެސް ފުލުހުންގެ ބަޔާނުގައި ބުނެފައިވެއެވެ.

އަދި ހޮސްޕިޓަލް ފަދަ ސިއްޚީ ޚިދުމަތްދޭ ތަންތަނުގެ ތެރޭގައި އެއްވެ އަޑުގަދަކޮށް ހަމަނުޖެހުމަށް މަގުފަހިވާ ފަދަ ކަންތައްތައް ކުރުމަކީ އެތަންތަނުގެ ތިބޭ ބަލި މީހުންނަށާއި،ޚިދުމަތް ފޯރުކޮށްދޭ ފަރާތްތަކަށްވެސް ދަތި އުނދަގޫވެ، ޚިދުމަތް ދިނުމަށް ހުރަސް އެޅޭ ކަމެއް ކަމަށްވެސް ފުލުހުން ބުނެފައިވެއެވެ.

އަދި އެއްވެ އުޅުން މަނާ ސަރަހައްދުތަކަށް އެއްވެ، އެއްވެސް ފަރާތަކުން އަޑުގަދަކޮށް ހަޅޭނުލެއްވުމަށްވެސް ފުލުހުން އެދިފައިވެއެވެ.

ފުލުހުންގެ ބަޔާނުގައި އިތުރަށް ބުނެފައިވަނީ، ފުލުހުން ބާރުގެ ބޭނުންކުރާ ހާލަތްތަކުގައި ބާރު ބޭނުން ކުރެވުނު ގޮތް ރިވިއުކުރުމަށް އެކުލަވާލެވިފައިވާ "ޔޫސް އޮފް ފޯސް ރިވީއު ކޮމެޓީ" އިން މިއަދުގެ ހާދިސާގައި ވެސް ފުލުހުން ބޭނުންކުރި ބާރާއި އެބާރު ބޭނުންކުރެވުނު ހާލަތު ދިރާސާކޮށް ބަލާނެކަމަށެވެ.