ބޭރުގައި ކިޔަވަންތިބޭ ކުދިންނަށް ފައިސާ ޖަމާވުން ލަސްވާ މައްސަލަ ހައްލުކޮށްދޭނަން: ރައީސް ޑރ.މުއިއްޒު
ލިޔުންތެރިޔާ
އަބްދުﷲ ހުސައިން
ރާއްޖެއިން ބޭރުގައި ކިޔަވަންތިބޭ ކުދިންނަށް ފައިސާ ޖަމާވުން ލަސްވާ މައްސަލަ ހައްލުކޮށްދެއްވާނޭކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
އިނގިރޭސިވިލާތަށް ކުރެއްވި ދަތުރުފުޅުގައި އެޤައުމުގައި ދިރިއުޅެމުންދާ ދިވެހި ދަރިވަރުންނާއި ބައްދަލުކޮށް، ވާހަކަދައްކަވަމުން ރައީސް ޑރ.މުއިއްޒު ވިދާޅުވީ، ބޭރުގައި ކިޔަވާ ކުދިންނަށް ސަރުކާރުގެ އިދާރާތަކުގެ ސަބަބުން ކުރިމަތިވާ ދަތިތައް އެމަނިކުފާނަށް އެނގިވަޑައިގަންނަވާ ކަމަށާއި، އެ ކަންކަން ހައްލުކުރުމަށް މަސައްކަތް ކުރަމުންދާކަމަށެވެ. ކިޔަވާ ކުދިންގެ ލޯން ފައިސާ އާއި ޓިއުޗަންފީ ލިބުން ލަސްވުމާއި، އަދި ސަރުކާރުގެ ކަމާބެހޭ އިދާރާތަކުން އެކިކަންކަމުގައި ޖަވާބުލިބުން ލަސްވުން ފަދަ މައްސަލަތަކަކީ ބޭރުގައި ކިޔަވާކުދިންނަށް ކުރިމަތިވާ މައްސަލައެއްކަމަށް ރައީސް ފާހަގަކުރެއްވިއެވެ. މިގޮތުން އެމަނިކުފާނުވެސް އިނގިރޭސިވިލާތުގައި 12 އަހަރު ކިޔަވަން ހުންނެވިކަމަށާއި އެމަނިކުފާނަށްވެސް އެކަން ވަރަށްރަނގަޅަށް އެނގިވަޑައިގަންނެވާކަމަށް ވިދާޅުވިއެވެ.
އެގޮތުން ހަޔަރ އެޑިއުކޭޝަނަށް ފޮނުވާ މެއިލްތަކަށް ޖަވާބުނުލިބި ލަސްވުމަކީ ދަރިވަރުންގެ އެންމެބޮޑަށް ޝަކުވާ އަންނ ައެއް މައްސަލަކަމަށާއި، ސަރުކާރުގެ ނިޒާމުގެ ތެރެއިން އެ މައްސަލަތައް ހައްލުކޮށްދެއްވާނޭކަމަށް ރައީސް ވިދާޅުވިއެވެ. ހަމައެކަނި އިނގިރޭސިވިލާތް ނޫނަސް އެހެން ޤައުމުތަކުގައި ކިޔަވަންގޮސްތިބި ދަރިވަރުންނަށް ކުރިމަތިވާ މިފަދަ މައްސަލަތައް އެއް ހަމަޔަކުން ހައްލުކޮށްދެއްވާނޭކަމަށް ރައީސް ވިދާޅުވިއެވެ.
މި ބައްދަލުކުރެއްވުމުގައި ރައީސްޑރ.މުއިއްޒު ވިދާޅުވީ، އިނގިރޭސިވިލާތުގައި ކިޔަވަންތިބޭ ކުދިން ބޭނުންކުރަމުން އައި އިމާރާތް 9 ރޯޒްމޮންޓް އެވެނިއު އަލުން މޯލްޑިވްސް ސްޓޫޑެންޓްސް އެސޯސިއޭޝަނާ ހަވާލުކުރައްވާފައިވާކަމަށެވެ. އެތަނަކީ މީގެ ކުރިން ދިވެހި ކުދިން ހެޔޮއަގުގައި ކިޔަވަންތިބޭ ދިވެހި ސަރުކާރުގެ ތަނެކެވެ. ނަމަވެސް ފަހުން އެތަން ވަނީ އިނގިރޭސިވިލާތުގައި ހުންނަ ދިވެހި ހައިކޮމިޝަނުގެ ބޭނުމަށް ނަގާފައެވެ. މި ބައްދަލުވުމުގަައި ރައީސް ޑރ. މުއިއްޒު ވަނީ، މޯލްޑިވްސް ސްޓޫޑެންޓްސް އެސޯސިއޭޝަނަށް މާލީ އެހީދެއްވަން ފައްޓަވާފައިވާކަންވެސް އިއުލާނުކުރައްވާފައެވެ.
ރައީސް ޑރ.މުއިއްޒު އިނގިރޭސިވިލާތަށް ކުރެއްވި ރަސްމީ ދަތުރުފުޅު މިހާރު ވަނީ ނިންމަވާލައްވާފައެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
