ހުޅުމާލޭގައި ބާރުސްޕީޑްގައި ދިޔަ ކާރެއް، ސައިކަލެއްގައި ޖެހި ހިނގި އެކްސިޑެންޓެއްގައި ޒުވާނަކު ނިޔާވެއްޖެ

ހުޅުމާލޭ ސެންޓްރަލް ޕާކް ކައިރީގައި ރޭ ހިނގި ނުރައްކާތެރި އެކްސިޑެންޓެއްގައި ޒުވާނަކު ނިޔާވެއްޖެއެވެ.

ފުލުހުން ބުނީ، ބާރު ސްޕީޑުގައި ދުއްވަމުން ދިޔަ ކާރެއް ސައިކަލަކާ ޖެހި އެކްސިޑެންޓެއް ހިނގާފައިވާ ކަމަށް ރިޕޯޓް ކޮށްފައިވަނީ ރޭ ދަންވަރު 2:48 ހާއިރު ކަމަށެވެ.

އަދި މި އެކްސިޑެންޓްގައި ޖެހުނު ސައިކަލް ދުއްވަން އިން ފަރާތަށް ހުޅުމާލޭ ހޮސްޕިޓަލުގައި ފަރުވާ ދެމުން ދަނިކޮށް ނިޔާވެފައިވާ ކަމަށް ހޮސްޕިޓަލުން ފުލުހުންނަށް މަޢުލޫމާތު ދީފައިވާ ކަމަށާ، ނިޔާވި ފަރާތަކީ 23 އަހަރުގެ ދިވެހި ފިރިހެނެއް ކަމަށް ބުނެފައިވެއެވެ.

ފުލުހުން އިތުރަށް ބުނީ، މި އެކްސިޑެންޓްގައި ހިމެނޭ ކާރު ދުއްވަން އިން ފަރާތް ހައްޔަރުކޮށްފައިވާ ކަމަށާ އެއީ 26 އަހަރުގެ ދިވެހި ފިރިހެނެއް ކަމަށެވެ.

މި އެކްސިޑެންޓްގެ މައްސަލަ ފުލުހުން ގެންދަނީ ތަޙުޤީޤު ކުރަމުންނެވެ.

މައުލޫމާތު ލިބޭ ގޮތުގައި އެކްސިޑެންޓުގައި ނިޔާވެފައިވަނީ ކަރެކްޝަންސްގެ މުވައްޒަފެކެވެ.

ހުޅުމާލޭގައި މިފަދަ އެކްސިޑެންޓްތައް އިތުރުވަމުން ދާތީ، ދުއްވާ އެއްޗެހި ބާރު ސްޕީޑުގައި ނުދުއްވުމަށާއި ޓްރެފިކް ގަވާއިދުތަކަށް ފުރިހަމައަށް ޢަމަލުކުރުމަށް ފުލުހުން ވަނީ އާންމުންނަށް އިލްތިމާސްކޮށްފައެވެ.

ބުދަ ދުވަހުގެ ރޭ މާލޭގައި ބޮޑުތަކުރުފާނުމަގާއި ކޮއިމަލާ ހިނގުން ގުޅޭ ކަންމަތީގައި ނުރައްކާތެރި އެކްސިޑެންޓެއް ވަނީ ހިނގާފައެވެ. އެ އެކްސިޑެންޓުގައި އަނިޔާވި 21 އަހަރުގެ ޒުވާނާއަށް އައިޖީއެމްއެޗްގައި ފަރުވާދެމުންދާއިރު ހާލު ސީރިއަސް ކަމަށް މައުލޫމާތު ލިބެއެވެ.