ދެ ހަފްތާގެ ރެއިޑަކަށްފަހު އިސްރާއީލު ސިފައިން، ޣައްޒާގެ އަލް ޝިފާ ހޮސްޕިޓަލުން ނުކުމެއްޖެ

​​ދެ ހަފްތާގެ އޮޕަރޭޝަނަކަށް ފަހު ނިރުބަވެރި އިސްރާއީލުން، ޣައްޒާގެ އަލް ޝިފާ ހޮސްޕިޓަލުގައި ތިބި ސިފައިން އަނބުރާ ގެންގޮސްފިއެވެ.

ނިރުބަވެރި އިސްރާއީލު ސިފައިން އުތުރުގެ ޣައްޒާ ސިޓީގައި ހުންނަ އެންމެ ބޮޑު ހޮސްޕިޓަލް ފާސްކުރަން ފަށާފައިވަނީ، މަރޗް 18 ވަނަ ދުވަހު، ހޮސްޕިޓަލުގެ އެ ކޮމްޕްލެކްސްއަކީ ހަމާސްއިން ބޭސްއެއްގެ ގޮތުގައި ބޭނުން ކުރަމުން ދިޔަ މަރުކަޒެއް ކަމަށް ބުނެއެވެ. މިއަދުގެ ވަގުތެއްގައި އިސްރާއީލު ސިފައިން އަލް ޝިފާ ހޮސްޕިޓަލުން ނުކުމެފައިވަނީ ދެ ހަފްތާ ވަންދެން ހޮސްޕިޓަލުގައި ރެއިޑް ކުރުމަށް ފަހުގައެވެ.

"ޝިފާ ހޮސްޕިޓަލް ސަރަހައްދުގައި ސިފައިން ވަނީ އޮޕަރޭޝަނަލް އެކްޓިވިޓީ ނިންމާފައި އެ ސަރަހައްދުން ނުކުމެފައި،"

އިސްރާއީލުގެ އަސްކަރިއްޔާއިން ބުންޏެވެ.

ހަމާސްގެ ގިނަ ހަނގުރާމަވެރިން މަރާލާފައިވާ ކަމަށް އިސްރާއީލުން ބުނާއިރު، އޭގެ ތެރޭގައި ސީނިއާ އޮޕަރޭޓިވުން ވެސް ހިމެނޭތީ، ދެ ހަފްތާއަށް ދެމިގެން ދިޔަ މި ރޭޑު، އިސްރާއީލުގެ އަސްކަރިއްޔާއިން ސިފަކޮށްފައިވަނީ ޣައްޒާގައި ހިންގި ހަނގުރާމައިގެ އެންމެ ކާމިޔާބު އެއް އޮޕަރޭޝަންގެ ގޮތުގައެވެ. ތަރުޖަމާނަކު ބުނި ގޮތުގައި "ހަނގުރާމަވެރިން" ކަމަށް ޝައްކު ކުރެވޭ 900 އެއްހާ މީހުން ހައްޔަރުކޮށްފައިވެއެވެ.

އިސްރާއީލުގެ އަސްކަރިއްޔާއިން ބުނާގޮތުގައި ހޮސްޕިޓަލަށް ފާސްކުރީ، އާންމުންނާއި ބަލިމީހުންނާއި މެޑިކަލް ޓީމުތަކަށް ގެއްލުން ދިނުމެއް ނެތިއެވެ.

ނަމަވެސް، އޮންލައިންކޮށް ދައުރުވަމުން ދާ ވީޑިއޯ ފޫޓޭޖުތަކުން ފެންނަ ގޮތުގައި، ހޮސްޕިޓަލަށް ވަނީ ބުލްޑޯޒަރުތަކުން ވަރަށް ބޮޑަށް ގެއްލުންދީފައެވެ. އަދި މެޑިކަލް މަސްދަރުތަކުން ރިޕޯޓުކޮށްފައިވާ ގޮތުގައި އަލްޝިފާ ހޮސްޕިޓަލުގެ، ކޮމްޕްލެކްސްގެ ތެރެއިންނާއި ވަށައިގެންވާ މަގުތަކުން އެތައް ސަތޭކަ ހަށިގަނޑެއް ފެނިފައިވެއެވެ.

އާދީއްތަ ދުވަހު ދުނިޔޭގެ ސިއްހަތު ޖަމިއްޔާގެ ވެރިޔާ ޓެޑްރޯސް އަދަނޮމް ގެބްރެއިސަސް ވިދާޅުވީ އިސްރާއީލުން އަލް ޝިފާ ހޮސްޕިޓަލް ވަށާލަން ފެށިފަހުން 21 ބަލިމީހަކު މަރުވެފައިވާ ކަމަށެވެ.

“މިތަނުގައި ދިރިއުޅުމެއް ނެތް. ކޮމްޕްލެކްސް އޮތީ ހަލާކުވެފައި، އަލުން ދިރުވައި ނުލެވޭނެ ވަރަށް. އަޅުގަނޑުމެންނަށް ފެންނަ ފެނުމުގައި އޮކިއުޕޭޝަން ފޯސްތަކުން ގަސްތުގައި ސިއްހީ ދާއިރާއަށް އަމާޒުކޮށްގެން ޣައްޒާ ސިޓީގެ އެންމެ ބޮޑު މެޑިކަލް ކޮމްޕްލެކްސް ހަލާކުކޮށްލީ.”

އަލްޖަޒީރާގެ ނޫސްވެރިޔާ، އިސްމާއިލް އަލް ޣޫލް ރިޕޯޓް ކުރިއެވެ.

މި ރެއިޑަށް ފަހު، އަލް ޝިފާ ހޮސްޕިޓަލުގައި ހިންގައިފައިވާ ލޭއޮހޮރުވުންތައް ތަޙްޤީގު ކުރުމަށް، ހަމާސްއިން ވަނީ އިންޓަނޭޝަނަލް ކްރިމިނަލް ކޯޓު، އައިސީސީ އަށް ގޮވާލާފައެވެ.

ނިރުބަވެރި އިސްރާއީލުން، އޮކްޓޯބަރު މަހުންފެށިގެން މެދުކެނޑުމެއްނެތި، ވައިގެ މަގުންނާއި، ބިމާއި ކަނޑުން ދެމުންދާ ވަރުގަދަ ހަމަލާތަކުން، ޝަހީދުވި މީހުންގެ އަދަދު 32،845 އަށް އަރާފައިވާއިރު، 75،000 އަށްވުރެ ގިނަ މީހުން ވަނީ ޒަޚަމްވެފައެވެ. ފަލަސްތީނުގެ ސިއްހީ ވުޒާރާއިން ހާމަކުރެއްވި ގޮތުގައި ވޭތުވެ ދިޔަ 24 ގަޑިއިރުގެ ތެރޭގައިވެސް 63 މީހުން ޝަހީދުވެ، 94 މީހުން ވަނީ ޒަޚަމްކޮށްލާފައެވެ.