މިއަންނަ އަހަރު އަދި އަޟްހާ ޢީދަށް ދިއްލާ ރަށްތައް މިއައްވުރެ ގިނަ ކުރާނަން: ރައީސް ޑރ.މުޢިއްޒު

މިއަންނަ އަހަރު އަދި އަޟްހާ ޢީދަށް ދިއްލާ ރަށްތައް މިއައްވުރެ ގިނަ ކުރައްވާނެ ކަމަށް ރައީސުލްޖުމްހޫރިއްޔާ ޑރ.މުހައްމަދު މުޢިއްޒު ވިދާޅުވެއްޖެއެވެ.

ރޭގައި، ރައީސް ޑރ.މުޢިއްޒުގެ ރިޔާސީ ވައުދުފުޅުގައިވާ ފަދައިން ފިތުރު ޢީދަށް މުޅި ރާއްޖެ ދިއްލާލުމުގެ ހަރަކާތް ފެށުމުގެ ގޮތުން ބޭއްވި ރަސްމިއްޔާތުގައި ވާހަކަފުޅު ދައްކަވަމުން އެމަނިކުފާނު ވިދާޅުވީ ވަރަށް ގިނަ ރަށްރަށުން ޢީދު ލައިޓް ހަރުކުރުމަށް އެދެމުންދާ ކަމަށާއި، ސަރުކާރުގެ ކެރިފޯރުންތެރިކަން ހުރި މިންވަރަކުން ރަށްތައް އިތުރުކުރާނެ ކަމަށެވެ.

" މިހާރުވެސް ވަރަށް ގިނަ ރައްތަކުން ރިކުއެސްޓް އާދޭ އެ ރަށްތަކުގައި ޢީދު ލައިޓް ހަރުކޮށްދިނުމަށް. އިރާދަކުރެއްވިއްޔާ ސަރުކާރުގެ ކެރިފޯރުންތެރިކަން ހުރި މިންވަރަކުން، މިއަންނަ އަހަރަށް އަދި އަޟްހާ ޢީދަށް ރަށްތައް މިއައްވުރެ ގިނަ ކުރާނަން. އެހެންވީމަ ކުޑަކުދިން، ޢާއިލާތަކުން ޢީދުގެ އުފަލުގައި ބައިވެރިވެ ޢީދު އޭގެ ފުރިހަމަ ގޮތުގައި ފާހަގަ ކުރައްވަވާ."

ރައީސް ޑރ.މުޢިއްޒު ވިދާޅުވިއެވެ.

ރައީސް ޑރ.މުޢިއްޒު ވިދާޅުވީ، ހިޔާލު ތަފާތުވުންތަކެއް ހުރިނަމަވެސް ރާއްޖޭގެ ހުރިހާ ރައްޔިތުންވެސް އެކުގައި، އެއްބައެއްގެ ގޮތުގައި ޢީދު ފާހަގަކުރަން އެމަނިކުފާނު ބޭނުންފުޅުވާ ކަމަށާއި، ރާއްޖޭއަކީ ސައްތައިން ސައްތަ އިސްލާމީ ޤައުމަކަށްވާއިރު ޢީދުގެ އުފަލުގައި ބައިވެރިވެ ޢީދުގެ އުފާ ފާޅުކުރަން ޖެހޭ ކަމަށެވެ.

ޢީދަށް ރަށްތައް ދިއްލުމަށްވެސް ނިންމެވީ މިފަދަ ސަބަބުތަކަށްޓަކައި ކަން ފާހަގަކުރައްވާ ރައީސް ޑރ.މުއިއްޒު ވިދާޅުވީ، މިއަހަރު ރާއްޖޭގެ ހުރިހާ ސިޓީތަކާއި އަތޮޅުތަކުގެ ވެރިކަން ކުރާ ރަށްތައް ދިއްލުމަކީ އުފާ ކުރައްވާކަމެއް ކަމަށާއި އަންނަ އަހަރު މިއަށް ވުރެ ގިނަ ރަށްތައް ދިއްލާލުމަށް ގަސްތުކުރައްވާކަމަށެވެ.

ރައީސް ޑރ.މުޢިއްޒުގެ ވައުދުފުޅުގެ ދަށުން ރާއްޖޭގެ ސިޓީ ތަކާއި އަތޮޅު ކައުންސިލް ހިމެނޭ ރަށްތަކުގެ އިތުރުން މާލެ އާއި ހުޅުމާލެ ވެސް ވަނީ ޢީދާއި ގުޅޭ ކުލަ ބޮކި ތަކުން ޒީނަތްތެރިކޮށް، ދިއްލާލާފައެވެ.