ކާނުތައް ސާފުކުރުމުގެ މަސައްކަތް ފެށުން: ހަ މަހުން ހުރިހާ ކާނެއް ސާފު ކުރެވޭނެ
ލިޔުންތެރިޔާ
އަހުމަދު ހަމީދު އާދަމް
މާލެ ސިޓީގެ މަގުތަކުގެ ކާނުތައް ސާފުކުރުމުގެ މަސައްކަތް މިއަދު ފަށާފައިވާއިރު އެ މަސައްކަތް ކުރިއަށް އޮތް ހަ މަސްތެރޭ މުޅީން ނިންމާލެވޭނެ ކަމަށް ސިޓީސްތަކާއި އިދާރާ ދާއިރާތައް ހިންގުމާއި ބެހޭ މިނިސްޓްރީން ބުނެފި އެވެ.
ކާނުތައް ސާފުކުރުމުގެ މަސައްކަތް މިނިސްޓްރީން ފެށީ ވާރޭ ވެހިއްޖެ ނަމަ މާލޭގައި، ފެންބޮޑުވާ މައްސަލަ ހައްލު ކުރުމުގެ ގޮތުންނެވެ. މިއަދުގެ ހަރަކާތް ފެށުމަށް ފަހު މަސައްކަތް ކުރިއަށްދާ ގޮތް ބެއްލުމަށް ވަޑައިގެން ނޫސްވެރީންނާއި ވާހަކަ ދައްކަވަމުން މިނިސްޓަރު އާދަމް ޝަރީފް އުމަރު ވިދާޅުވީ މިއަދު ފެށި މަސައްކަތް ނިންމާލާނީ މާލޭގެ މަގުތަކުގެ ހުރިހާ ކާނުތަކެއް ސާފު ކުރުމަށް ފަހު ކަމަށެވެ.
އަދި މިއަދުގެ ހަރަކާތް ސިލްސިލާ ގޮތެއްގައި ކުރިއަށް ގެންގޮސް ކުރިއަށް އޮތް ހަ މަސް ދުވަސްތެރޭ ހުރިހާ ކާނުތަކެއް ސާފުކޮށް ނިންމުމަށް އަމާޒު ހިފާފައިވާ ކަމަށް ވިދާޅުވި އެވެ.
ބޯކޮށްވާރޭވެހޭ ކޮންމެ ދުވަހަކު މާލޭގެ ބޮޑު ބައެއްގައި ފެންބޮޑުވެ އެވެ. ފެންބޮޑުވުމުގެ އެއް ސަބަބަކީ ކާނުތައް ފުރިފައިވުމެވެ.
ބައެއް ސަރަހައްދުތަކުގެ ކާނުތައް ސާފުނުކުރާތާ ވަރަށް ގިނަ ދުވަސްވެއްޖެ އެވެ. މަގުތަކަށް ކުނިއެޅުން އިތުރުވުމުގެ ސަބަބުން ވަރަށް ގިނަ މަގުތަކުގައި ކާނުތައް ވަނީ ފުރިފަ އެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
