ޕީއެންސީއަށް ހުއްދަ ނުދޭ މައްސަލަ މިނިވަން މުއައްސަސާތަކުގެ ކޮމެޓީއަށް!
ޕީޕަލްސް ނޭޝަނަލް ކޮންގްރެސް ޕާޓީ އުފެއްދުމަށް ދޭންޖެހޭ ހުއްދަ ދިނުމުގައި އިލެކްޝަންސް ކޮމިޝަނުން ލަސްކުރަމުންދާ ކަމަށްބުނެ، އީސީގެ މައްސަލަ މިނިވަން މުއައްސަސާތަކުގެ ކޮމެޓީއަށް ހުށައެޅުމަށް، ޕީޕީއެމްއިން ނިންމައިފިއެވެ.
މައުލޫމާތު ލިބިފައިވާ ގޮތުގައި ޕީޕީއެމްގެ ޕީޖީ ގްރޫޕުން މިއަދު މަޖިލީހުގެ ރައީސް ގާސިމް އިބްރާހިމްއާއި އެކު ބޭއްވި ބައްދަލުވުމުގައިވެސް ވަނީ މިކަމުގެ ވާހަކަތައް ދެކެވިފައެވެ. އެގޮތުން މަޖިލީހުގެ މިނިވަން މުއައްސަސާތަކުގެ ކޮމެޓީގެ މުގައްރިރު ބަދަލުކުރުމާއި މެދު ވާހަކަދެކެވުނުކަން ޕީޕީއެމްގެ ޕީޖީ ލީޑަރ އަހުމަދު ނިހާން ހުސައިން މަނިކްވެސް ވަނީ މީޑިޔާތަކަށް ޔަގީންކޮށްދެއްވާފައެވެ.
ނިހާން ވިދާޅުވީ އީސީގެ ފަރާތުން ފޯމްތައް ބަލައި ފާސް ކުރަމުން ދަނީ މީގެ ކުރިން އެކަން ނުކުރާހާ މިންވަރަކަށް ކަމަށެވެ.
އެގޮތުން ކޮންމެ ފޯމެއްގެ ހެކިވެރިޔާއަށްވެސް ގުޅައި، އެ ހެކިވެރިޔާ ފޯނު ނުނަގައިފި ނަމަ އެ ފޯމެއް ބާތިލުކުރާ ކަން ނިހާން ވަނީ ފާހަގަކުރައްވާފައެވެ.
އަދި މިއީ ޖެއްސުމުގެ އަމަލެއްކަމަށާއި އީސީއިން ގަސްތުގައި ކޮންގްރެސް ޕާޓީއަށް ދަތިކުރަމުންދާކަމަށްވެސް އެބޭފުޅާ ވިދާޅުވިއެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
