އިސްލާމީ ވުޒާރާއަކީ ހަމައެކަނި ޚުތުބާ ލިޔާ ތަނެއްގެ ގޮތުގައި އޮތް އޮތުން މާޒީވެއްޖެ: ވަޒީރު

އިސްލާމީ ކަންތައްތަކާ ބެހޭ ވުޒާރާއަކީ ހަމައެކަނި ޚުތުބާ ލިޔާ ތަނެއްގެ ގޮތުގައި އޮތް އޮތުން މާޒީވެގޮސްފި ކަމަށް އެ ވުޒާރާގެ ވަޒީރު ޑރ. މުޙައްމަދު ޝަހީމް އަލީ ސަޢީދު ވިދާޅުވެއްޖެއެވެ.

ވަޒީރު މިފަދައިން ވިދާޅުވީ ކީރިތި ޤުރުއާން ކިޔެވުމުގެ 37 ވަނަ ޤައުމީ މުބާރާތުގެ ނިންމުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ. ވަޒީރު ވިދާޅުވީ، މިއަދު ފެށިގެން މިދަނީ ކީރިތި ޤުރުއާން ކިޔެވުމުގެ ޤައުމީ މުބާރާތުގެ މުޅިން އައު އުފާވެރި ތާރީޚީ ޞަފްޙާއެއް ކަމަށާއި ކީރިތި ޤުރުއާނާއި އިސްލާމީ ދާއިރާއިން މިއަދު އަޅުގަނޑުމެން ދެކެމުން މިދަނީ ވަރަށް އުފާވެރި ދުވަސްތަކެއް ކަމަށެވެ.

ރާއްޖޭގެ އިސްލާމްވިތާ 900 އަހަރު މިއަންނަ އަހަރު ފުރޭއިރު އެ އަހަރަކީ އިސްލާމީ ރޮނގުން ފާހަގަކޮށްލެވޭ އަހަރަކަށް ވެގެންދާނެ ކަން ވަޒީރު ފާހަގަކުރެއްވި އެވެ. އެ ގޮތުން މިއަންނަ އަހަރުގެ ރަމަޟާން މަހުގެ 27 ވިލޭރޭ ބޭއްވޭ ޙާފިޡުންގެ ދަސްވެނިވުމުގެ ރަސްމިއްޔާތުގައި 50 އަށްވުރެ ގިނަ ޙާފިޡުން ދަސްވެނިވާނެ ކަމަށް އަންދާޒާ ކުރެވޭ ކަމަށް ވެސް ވަޒީރު ވިދާޅުވި އެވެ.

އަދި މި ސަރުކާރުގެ އަމާޒަކީ މި ދައުރުގެ ތެރޭގައި 500 ޙާފިޡުން އުފެއްދުންކަމަށް ވަޒީރު ވިދާޅުވިއެވެ.

މީގެ އިތުރުން އެ ވުޒާރާއަށް އިޝާރަތްކުރައްވަމުން ވަޒީރު ވަނީ އިސްލާމީ ކަންތައްތަކާ ބެހޭ ވުޒާރާއަކީ ހަމައެކަނި ޚުތުބާ ލިޔާ ތަނެއްގެ ގޮތުގައި އޮތް އޮތުން މާޒީވެގޮސްފިކަމަށާއި، އެ ވުޒާރާއަކީ މާ ފުޅާ ދާއިރާއެއްގައި މަސައްކަތް ކުރަމުންދާ ތަނެއް ކަމަށް ވިދާޅުވެފައެވެ.

އެގޮތުން މި ސަރުކާރުން ޢިމާރާތް ކުރުމަށް ނިންމާ މަސައްކަތް ކުރަމުންދާ ކީރިތި ޤުރުއާނަށް ޚާއްސަ ވަޤުފް ޢިމާރާތާއެކު މި ސަރުކާރުގެ އަމާޒަކީ ސަރުކާރުން ޤާއިމް ކުރާ ފަންޑުތަކުގެ އެހީގައި ރާއްޖޭގެ ހުރިހާ ރަށެއްގައި ކީރިތި ޤުރުއާން ހިލޭ ކިޔެވޭނެ ނިޒާމެއް ޤާއިމް ކުރުންކަމަށް ކަމަށް ވެސް ވަޒީރު ވިދާޅުވިއެވެ.

އަދި ޤުރްއާނު މުބާރާތުން ވަނަތައް ހޯދާ ފަރާތްތަކަށް ރައީސް ދެއްވާ އިނާމުތައް އިތުރުކުރަން ނިންމެވުމާއި ގުޅިގެން އެކަމަށް ތަޢުރީފުކުރައްވައި ވަޒީރު ވަނީ  ކީރިތި ޤުރުއާން ކިޔެވުމުގެ ޤައުމީ މުބާރާތުގެ ރަންވަނަތަކަށް ދާ ބައިވެރިންނަށް ރައީސުލްޖުމުހޫރިއްޔާ ދެއްްވާ ޚާއްސަ އިނާމެއްގެ ގޮތުގައި ބޭނުން ޤައުމަކުން ބޭނުން ރޮނގަކުން ޕީއެޗްޑީއާއި ހަމައަށް ކިޔެވޭނެ މަގުފަހިކޮށްދެއްވުމަކި ރައީސް ފަހިކޮށްދެއްވި ވަރަށް ރަނގަޅު ފުރުސަތެއްކަމަށާއި ކީރިތި ޤުރުއާން ކިޔެވުމުގެ 37 ވަނަ ޤައުމީ މުބާރާތް ބޭއްވިގެން މިދިޔައީ ސީދާ ދަޢުލަތުގެ މާލިއްޔާތުން ޚަރަދުކުރެވިގެން ކަމަށް ވިދާޅުވެފައެވެ،