އައްމަޓީގެ ޕާސްޕޯޓު ދޫކޮށްލުމަށް ކުރި އަމުރު ސުޕްރީމް ކޯޓުން ބާތިލްކޮށްފި

ސީލައިފް ގްލޯބަލްގެ ވެރިމީހާ އަހުމަދު މޫސާ މުހައްމަދު (އައްމަޓީ) ގެ ޕާސްޕޯޓު ވަގުތީ ގޮތުން ދޫކޮށްލުމަށް ހައި ކޯޓުން ކުރި އަމުރު ސުޕްރިމް ކޯޓުން ބާތިލު ކޮށްފިއެވެ.

މައިބަދައިގެ އޮޕަރޭޝަނެއް ކުރަން ކަމަށް ބުނެ އައްމަޓީގެ ފަރާތުން ހުށައެޅުމުން ވަގުތީ ގޮތުން ޕާސްޕޯޓް ދޫކޮށްލުމަށް ކްރިމިނަލް ކޯޓުން ނިންމީ މިދިޔަ އަހަރުގެ ޑިސެމްބަރު މަހުގެ 6 އިން އެމަހުގެ 25 އާއި ހިސާބަށެވެ. މި މައްސަލަ ހައި ކޯޓުން ނިންމި އިރު އޮތީ މި މުއްދަތު ހަމަވެފައެވެ. އެހެންކަމުން ހައި ކޯޓުގެ ނިންމުމާއި މެދު ހިތްހަމަނުޖެހޭ ކަމަށް ބުނެ ޕީޖީ އޮފީހުން ވަނީ މިދިޔަ އަހަރުގެ ޑިސެންބަރު މަހުގެ 27 ވަނަ ދުވަހު މައްސަލަ އިސްތިއުނާފް ކުރުމަށް ސުޕްރީމް ކޯޓަށް ހުށައަޅާފައެވެ.

މިއަދު ކުރިއަށް ދިޔަ މި މައްސަލައިގެ އަޑުއެހުމުގައި ސުޕްރީމް ކޯޓުން އައްމަޓީގެ ޕާސްޕޯޓު ބާތިލުކުރުމަށް ނިންމައި ކުރި ހުކުމުގައި ބުނީ ކްރިމިނަލް ކޯޓުން އައްމަޓީގެ ޕާސްޕޯޓު ދޫކުރުމަށް ނިންމި ނިންމުމަށް ހައި ކޯޓުން ތާއީދު ކޮށްފައިވަނީ ގާނޫނީ އުސޫލު ތަކާއި ޚިލާފަށް ކަމަށާއި، އަދި މައްސަލަ ނިމިފައިވަނީ ޕާސްޕޯޓު ދޫކޮށްލުމަށް ނިންމި ތާރީހު ހަމަވެފައި އޮއްވާ ކަމަށް ވާތީ، އަމުރު ގެ ބާރު ވަނީ ކެނޑިފައި ކަމަށެވެ. އަދި ކޯޓަށް އެއްބާރުލުން ދެމުން ދިޔުމާއި ފިލުމުގެ އިހުތިމާލު ކްރިމިނަލް ކޯޓުން ގުޅުވި ގޮތެއް ވެސް ސާފު ނުވާ ކަމަށް ވެސް ކޯޓުން ކުރި ހުކުމުގައި ވަނީ ބުނެފައެވެ.

މިފަދައިން ނިންމާފައިމިވަނީ މި މައްސަލަ ބެއްލެވި ފަނޑިޔާރު އައިޝާ ޝުޖޫން މުހައްމަދާއި ފަނޑިޔާރު ހުސްނުއްސުއޫދު އަދި ފަނޑިޔާރު މަހާޒު އަލީ ޒާހިރު ގެ އިއްތިފާގުންނެވެ.

އައްމަޓީގެ މައްޗަށް ވަނީ ހުޅުމާލޭގައި ފްލެޓްތަކެއް އަޅަން، އެޑްވާންސަށް އެ ފުލެޓް ގަންނަން ބޭނުންވާ މީހުން އަތުން ފައިސާނަގާ، އެ ފައިސާއަށް ހިޔާނާތްތެރިވިކަމުގެ ދައުވާ ކޮށްފައެވެ. އައްމަޓީގެ މައްޗަށް ހިޔާނާތުގެ 42 ދައުވާއެއް ވަނީ ކޮށްފައިވީނަމަވެސް މިހުރިހާ ދައުވާއަކަށް އޭނާ ވަނީ އިންކާރު ކޮށްފައެވެ.