ގެއްލުމަކަށްފަހު، ދެވަނަ ކުއާޓަރުގައި އެމްޓީސީސީއަށް ފައިދާވެއްޖެ

ފުރަތަމަ ކުއާޓަރުގައި ގެއްލުމަކަށްފަހު، ދެވަނަ ކުއާޓަރުގައި އެމްޓީސީސީއަށް 27.9 މިލިއަން ރުފިޔާގެ ފައިދާއެއް ލިބިއްޖެއެވެ.

ސަރުކާރާއި ރައްޔިތުން ހިއްސާވާ ކުންފުނި، އެމްޓީސީސީން ނެރެފައިވާ ދެވަނަ ކުއާޓަރުގެ މާލީބަޔާނަށް ބަލާއިރު، މި ކުއާޓަރުގައި އެކުންފުންޏަށް ވަނީ 490 މިލިއަން ރުފިޔާގެ އާމްދަނީއެއް ލިބިފައެވެ. މި ކުއާޓަރުގައި ވިއްކުމަށް ކުރި ހަރަދުތަކަށް 417.6 މިލިއަން ރުފިޔާ ލިބިފައިވާއިރު، ޖުމްލަ ފައިދާ އުޅެނީ 72.7 މިލިއަން ރުފިޔާގައެވެ.

ދެވަނަ ކުއާޓަރުގައި ވިޔަފާރި ހިންގައިގެން ލިބުނު ލިބުނު ފައިދާ 49.7 މިލިއަން ރުފިޔާގައި އުޅޭއިރު، ޓެކްސްއަށް ކަނޑުމުގެ ކުރިން ފައިދާ އުޅެނީ 32.9 މިލިއަން ރުފިޔާގައެވެ. އެމްޓީސީސީއަށް ދެވަނަ ކުއާޓަރުގައި 27.9 މިލިއަން ރުފިޔާ ލިބުނުއިރު، ފުރަތަމަ ކުއާޓަރުގައި އެކުންފުންޏަށް ވަނީ 19.6 މިލިއަން ރުފިޔާގެ ގެއްލުމެއް ލިބިފައެވެ.

ދެވަނަ ކުއާޓަރ ނިމުނުއިރު އެމްޓީސީސީން 313 މަޝްރޫޢުއެއް ކުރިއަށްގެންދިޔައިރު އޭގެތެރެއިން 9 މަޝްރޫޢުއެއްގެ މަސައްކަތް ނިންމައި، 64 މަޝްރޫޢުއެއްގެ މަސައްކަތް ވަނީ ފަށާފައެވެ. ދެވަނަ ކުއާޓަރުގައި އެމްޓިސީސީއަށް 35 މަޝްރޫޢުގެ މަސައްކަތް ހަވާލުކޮށްފައިވާއިރު، އެ މަސައްކަތްތަކުގެ ޖުމްލަ އަގު 1.42 ބިލިއަން ރުފިޔާއަށް އަރައެވެ.

ދެވަނަ ކުއާޓަރ ނިމުނުއިރު އެމްޓީސީސީގައި މަސައްކަތްކުރާ މުއައްޒަފުންގެ އަދަދު 4،130 އަށް އަރާއިރު، މީގެ ތެރެއިން ދިވެހި މުއައްޒަފުންގެ އަދަދަކީ 2،463 އެވެ. އަދި ބިދޭސީ މުއައްޒަފުންގެ އަދަދަކީ 1،667 އެވެ.