އީރާނު ސަފީރަށް ނަޝީދުގެ ރައްދު: ”ހަނދާންވަނީ މައުމޫނުގެ ދައުރުގައި މުޒާހަރާ ކުރުމުން ކުރެއްވި ތުހުމަތު“

އީރާނުގެ މަގުތަކުގައި ކުރިއަށްދާ މުޒާހަރާތަކާ ގުޅިގެން ރާއްޖޭގެ ކުރީގެ ރައީސް މުޙައްމަދު ނަޝީދު ދެއްކެވި ވާހަކަފުޅުތަކަށް، ލަންކާއަށް ކަނޑައަޅުއްވާފައި ހުންނަވާ އީރާނުގެ ސަފީރު ދެއްވި ރައްދަށް ރައީސް ނަޝީދު އަނެއްކާވެސް ރައްދު ދެއްވައިފިއެވެ.

އީރާނުގެ ރައްޔިތުން އެ ގައުމުގައި ދިރިއުޅުމުގެ އަގުބޮޑުވުމާ ދެކޮޅަށް ކުރަމުންދާ މުޒާހަރާތަކަށް ތާއީދުކުރައްވައި މިމަހު 11 ވަނަ ދުވަހު ރައީސް ނަޝީދު އެކްސްގައި ވަނީ ޕޯސްޓެއް ކުރައްވާފައެވެ. އެޕޯސްޓުގައި ނަޝީދު ވިދާޅުވެފައިވަނީ އީރާނުގެ ރައްޔިތުންނަކީ މުސްލިމް އަޚުންނާއި އުޚުތުން ކަމަށާއި، ބައިނަލްއަޤުވާމީ މުޖުތަމަޢުން ތިބެންވާނީ ސަރުކާރު ހިމާޔަތްކުރުމުގެ ބަދަލުގައި ރައްޔިތުންނާއެކު ކަމަށެވެ.

ނަޝީދުގެ މި ވާހަކަފުޅުތަކަށް ރައްދު ދެމުން ލަންކާގައި ހުންނަ އީރާނުގެ އެމްބަސީގެ އެކްސް އެކައުންޓުން ބުނެފައިވަނީ، ޖޫން 2025 ގައި ހިނގި 12 ދުވަހުގެ ހަނގުރާމައިގައި ޒަޔަނިސްޓު އިސްރާއީލުން އީރާނުގެ ސިޓީތަކަށާއި އާންމުންނަށް ދިން ހަމަލާތަކުގައި އެތައް ހާސް ބަޔަކު ޝަހީދުވެފައިވާ ކަމަށެވެ.

އަދި އެމެރިކާގެ އެހީތެރިކަމާއެކު ދޭ މި ހަމަލާތަކުގެ ބޭނުމަކީ އީރާނުގެ މަގުތަކުގައި ހަމަނުޖެހުން އުފެއްދުން ކަމަށާއި، މޮސާޑާ ގުޅުންހުރި ޓެރަރިސްޓުން މިސްކިތްތަކާއި ހޮސްޕިޓަލްތަކަށް ގެއްލުން ދެމުންދާ ކަމަށްވެސް އެމްބަސީން ބުންޏެވެ. މި ނުރައްކާތެރި ހާލަތުގައި ނަޝީދު ހުންނެވީ ކޮން ފަރާތެއްގައިތޯވެސް ސަފީރު ވަނީ ސުވާލު ކުރައްވާފައެވެ.

ސަފީރުގެ މި ސުވާލުތަކަށް ރައްދު ދެއްވަމުން ރައީސް ނަޝީދު މިއަދު ވިދާޅުވީ، އީރާނުގެ ކަންކަމުގެ ތެރެއަށް އެމެރިކާއިން ވަނުމާ ދެކޮޅު ކަމަށާއި، ނަމަވެސް މަގުތަކަށް ނުކުމެ ތިބި ޒުވާން މުޒާހަރާވެރިންނަށް ތާއީދުކުރައްވާ ކަމަށެވެ.

މީގެ އިތުރުން ނަޝީދު ވިދާޅުވީ، އީރާނު ސަރުކާރުގެ މި ވާހަކަތަކުން އެމަނިކުފާނަށް ހަނދާންވަނީ ރާއްޖޭގެ މާޒީ ކަމަށެވެ.

”ކުރީގެ ރައީސް މައުމޫނު ޢަބްދުލްޤައްޔޫމްގެ ދައުރުގައި އިސްލާހީ މަސައްކަތަށް އެކްޓިވިސްޓުން މަގުތަކަށް ނުކުމެ މުޒާހަރާ ކުރުމުން، އެއީ ކްރިސްޓިއަން މިޝަނަރީންގެ އެހީގައި ކުރާ ކަމެއް ކަމަށް ރައީސް މައުމޫނު ތުހުމަތު ކުރެއްވި“ ކަމަށް ނަޝީދު ވިދާޅުވިއެވެ.

ރައީސް ނަޝީދު އިތުރަށް ފާހަގަކުރެއްވި ގޮތުގައި، ރައްޔިތުން އުފުލާ އަޑަކީ އެމީހުން ތަހައްމަލު ކުރަމުންދާ އަނިޔާވެރިކަމާއި އަނިޔާތަކެވެ. އަދި އީރާނުގެ ޒުވާނުން އެމީހުންގެ ހައްގުތަކަށްޓަކައި ކުރާ މަސައްކަތުގައި އެމަނިކުފާނު ހުންނެވީ އެ ޒުވާނުންނާއެކު ކަމަށް މިފަހަރުވެސް ވިދާޅުވެފައިވެއެވެ.