އަޅުގަނޑުމެން މި ފެށި އިގްތިޞާދީ އެޖެންޑާއިން ރާއްޖެ ދާނީ މައްޗަށް ކަމަށް އައިއެމްއެފްއިން ބުނި: ރައީސް

ރައީސުލްޖުމްހޫރިއްޔާ ޑރ މުހައްމަދު މުޢިއްޒުގެ މި ސަރުކާރުގެ އިގްތިސާދީ އެޖެންޑާގެ ސަބަބުން ރާއްޖެ ދާނީ ކުރިއަށް ކަމަށް އައިއެމްއެފްގެ މެނޭޖިން ޑިރެކްޓަރ ވިދާޅުވެފައިވާ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރައީސް މުޢިއްޒު އައްޑޫ ސިޓީއަށް މިހާރު ކުރައްވަމުންގެންދަވާ ދަތުރުފުޅުގެ ތެރެއިން މަރަދޫ އަދި މަރަދޫފޭދޫ ރައްޔިތުންނާއި ބައްދަލު ކުރައްވާ ވާހަކަފުޅު ދައްކަވަމުން ވިދާޅުވީ، މިދިޔަ 5 އަހަރު ނިމުނުއިރު 120 ބިލިއަން ރުފިޔާގެ ބޮޑު ދަރަންޏެއް އޮތްއިރު ރާއްޖޭގެ އިޤްތިޞާދީ ޙާލަތު އޮތީ މިއިން ޒަމާނަކު ނުވެއްޓޭހާ ބޮޑު އަނދަވަޅަކަށް ވެއްޓިފައި ކަމަށެވެ.

120 ބިލިއަން ރުފިޔާގެ ބޮޑު ދަރަންޏެއް، މިއި ޒަމާނަކު ރާއްޖޭގެ އިގްތިސޯދީ ހާލަތު ނުވެއްޓޭހާ ބޮޑު އަނދަވަޅަކަށް ވެއްޓިފައި އޮތީ، އެތައް ސަތޭކަ ބިލިއަން ރުފިޔާގެ ލޯނު ކޮންމެ އަހަރަކު ނަގަމުން ދިޔައީ

ރައީސުލްޖުމްހޫރިއްޔާ ޑރ މުހައްމަދު މުޢިއްޒު

ރައީސް ވިދާޅުވީ ސަރުކާރާއި ހަވާލުވިއިރު ރާއްޖޭގެ އިގްތިސާދު އޮތް ހާލަތުން އަރައިގަންނަން ވަރަށް އުނދަގޫ ފިޔަވަޅު ތަކެއް އަޅަންޖެހޭ ކަމަށެވެ. އަދި ކެންޕެއިންގެ ތެރެއިންވެސް އެމަނިކުފާނުގެ އިގްތިޞާދީ ޓީމުން، ރާއްޖޭގެ އިގްތިސާދު ވަރަށް ރަނގަޅަށް ދިރާސާ ކުރެއްވި ކަމަށާ، އެ ދިރާސާގެ މައްޗަށް ބަލައި، އަޅަންޖެހޭ ފިޔަވަޅުތައް އެ ޓީމުން ކަނޑައެޅުއްވިކަން ރައީސް ފާހަގަކުރެއްވިއެވެ.

އެގޮތަށް ކަނޑައެޅި އިގްތިޞާދީ އެޖެންޑާ އިއުލާން ކުރީ. އިއުލާން ކޮށްގެން، އެ އިގްތިސާދީ އެޖެންޑާގެ މަތިން ފުރަތަމަ ދުވަހުން ފެށިގެން ފަށައިގެން މިއަދާއި ހަމައަށް މިއައީ. އެއީ އަޅުގަނޑުމެން އަމިއްލައަށް ފެށި އިގްތިސާދީ އެޖެންޑާއެއް.

ރައީސުލްޖުމްހޫރިއްޔާ ޑރ މުހައްމަދު މުޢިއްޒު

ރައީސް މުޢިއްޒު ވިދާޅުވީ، އެމަނިކުފާނުގެ އިގްތިސާދީ އެޖެންޑާގެ ތެރެއިން، އަދި އެމަނިކުފާނު ވެވަޑައިގެންނެވި ވަޢުދުފުޅުތަކުގެ ތެރެއިން އެންމެ އުނދަގޫ އެއް ވަޢުދުފުޅަކީ ފައިސާ ޗާޕުކުރުން ހުއްޓާލުން ކަމަށެވެ. އެހެންނަމަވެސް، އެކަން ހުއްޓާ ނުލި ނަމަ، ރާއްޖެ އިތުރަށް އިގްތިސާދީ އަނދަވަޅަށް ވެއްޓި، ރައްޔިތުންގެ ބޮލަށް ޖެހޭ ދަރަނި މަތިވަމުންދާނެ ކަމަށެވެ. އެހެންކަމުން، އުނދަގޫ ނަމަވެސް އެ ވަޢުދު ފުއްދަވާފައިވާނެ ކަމަށާ، އެކަން އައިއެމްއެފް އިން ވެސް ބަލައިގެންފައިވާ ކަމަށެވެ.

އައިއެމްއެފްގެ މެނޭޖިންގ ޑިރެކްޓަރ އަޅުގަނޑާއި ބައްދަލު ކުރައްވާފައިވެސް ދެންނެވީ އެވާހަކަ. އަޅުގަނޑުމެން އަމިއްލައަށް ނިންމައިގެން މިފެށި އިގްތިސާދީ އެޖެންޑާއިން ރާއްޖެ ދާނީ އެންމެ ދިމާލަކަށޭ. އެއީ މައްޗަށޭ. އެހެން ހަމަ ލަފްޒީ މާނާގައި ވިދާޅުވީ. މާނަ އަކީ އިގްތިސާދު ދާނީ މައްޗަށޭ.

ރައީސުލްޖުމްހޫރިއްޔާ ޑރ މުހައްމަދު މުޢިއްޒު

އެހެންކަމުން ރައީސް މުޢިއްޒު ވަނީ، މި ސަރުކާރުގެ އިގްތިސާދީ އެޖެންޑާއަށް އިތުބާރު ކޮށް، އެއާއިގެން ކުރިއަށް ދިޔުމަށް ސަރުކާރަށް ފުރުސަތު ދެއްވުމަށް އެދިވަޑައިގެންފައެވެ.