ކުދި ޖަޒީރާ ޤައުމުތަކަކީ އުފެއްދުންތެރިކަމުގެ މިސާލެއްގެ ގޮތުގައި ދައްކަންޖެހޭ: ރައީސް މުޢިއްޒު

ސިޑްސްގެ ޤައުމުތަކުން އިސްނަގައި، ކުދި ޖަޒީރާ ޤައުމުތަކަކީ އުފެއްދުންތެރިކަމާއި ވިލުންތެރިކަމުގެ މިސާލެއްގެ ގޮތުގައި ދައްކަންޖެހޭ ކަމުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ.

އެ މަނިކުފާނު މިފަދައިން ވިދާޅުވީ ހަތަރުވަނަ އިންޓަރނޭޝަނަލް ކޮންފަރެންސް އޮން ސްމޯލް އައިލެންޑް ޑިވެލޮޕިންގ ސްޓޭޓްސް (ސިޑްސް) ގެ ޕްލެނަރީ ސެޝަންގައި ދިވެހިރާއްޖޭގެ ޤައުމީ ބަޔާން އިއްވަވައިދެއްވަމުންނެވެ.

މި ބަޔާން އިއްވަވައިދެއްވަމުން ރައީސުލްޖުމްހޫރިއްޔާ ދެއްކެވި ވާހަކަފުޅުގައި، މިވަގުތަކީ ތަރައްޤީގެ މަގުގައި ކުރިމަތިވާ ދަތިތަކާ ކުރިމަތިލުމަށް ކުދި ޖަޒީރާ ޤައުމުތަކުން އަމިއްލަ ޤާބިލުކަން ގަބޫލުކުރަން ފަށަންވީ ވަގުތުކަމުގައި ވިދާޅުވިއެވެ.

އަޅުގަނޑުމެންގެ ނާޒުކުކަމަކީ އަޅުގަނޑުމެންގެ ވެއްޓުން ކަމުގައި ދެކިގެން ނުވާނެ. އެއީ އަޅުގަނޑުމެންގެ ބުންވަރު އާލާކުރަން ލިބޭ ހިތްވަރެއް ކަމުގައި ދެކެން ޖެހޭ.

ރައީސުލްޖުމްހޫރިއްޔާ ޑރ މުހައްމަދު މުޢިއްޒު

ރައީސުލްޖުމްހޫރިއްޔާގެ ވާހަކަފުޅުގައި ބައިނަލްއަޤްވާމީ މުޖުތަމަޢުގެ ފަރާތުން ސިޑްސްގެ ޤައުމުތަކުން އެއްބާރުލުން ހޯދިދާނެ ތިން ގޮތެއް ވިދާޅުވެދެއްވިއެވެ.

އެގޮތުން ފާހަގަ ކުރެއްވި ފުރަތަމަ ކަމަކީ ބައިނަލްއަޤްވާމީ މުޖުތަމަޢުން ތަރައްޤީވަމުން އަންނަ ކުދި ޖަޒީރާ ޤައުމުތަކަށް ކްރެޑިޓް އިތުރުކުރުމަށާއި ދަރަނީގެ ޚަރަދުތައް ކުޑަކުރުމަށް މަގުފަހިކޮށްދިނުމެވެ. ރައީސް ވިދާޅުވީ، ދޭދޭ ގުޅުންތައް ޤާއިމުކޮށްފައިވާ ފަރާތްތަކުން، ރިޓްރެކްޓިވް ފައިނޭންސިންގ ހިމެނޭ މާލީ އީޖާދީ ހައްލުތައް އިތުރުކޮށްދޭންޖެހޭ ކަމަށެވެ.

ދެވަނަ ކަމަކަށް ރައީސުލްޖުމްހޫރިއްޔާގެ ވާހަކަފުޅުގައި އެމަނިކުފާނު ފާހަގަކުރެއްވީ، އ.ދ. ގެ ނިޒާމާއި ބައިނަލްއަޤްވާމީ ތަރައްޤީގެ ޖަމާޢަތްތަކާއި އަމިއްލަ ވިޔަފާރިތަކަށް ހަރަދުކުރާ ފަރާތްތަކުން، ތަރައްޤީވަމުން އަންނަ ކުދި ޖަޒީރާ ޤައުމުތަކަށް އެހީތެރިކަން ފޯރުކޮށްދިނުމުގައި، ޙިއްޞާކުރެވިފައިވާ އަދި، ގުޅި ލާމެހިފައިވާ ވިސްނުމެއް ގެންގުޅެން ޖެހޭކަމަށެވެ.

ފަހު ކަމަކަށް ރައީސުލްޖުމްހޫރިއްޔާ ފާހަގަކުރެއްވީ، ސިޑްސްގެ ޤައުމުތަކުން އެކި މަސައްކަތްތަކުގައި އިސް ދައުރުތަކެއް އަދާކުރުމެވެ. އެގޮތުން އިންވެސްޓްމަންޓްތައް އިތުރުކޮށް، މުއައްސަސާތަކުގެ ހިންގުން ހަރުދަނާކޮށް، ސަރުކާރުތަކުގެ ހިންގުމުގައި ނަޒާހަތްތެރިކަމާއި ޖަވާބުދާރީކުރުންވެސް ހަރުދަނާކުރަންޖެހޭކަމަށެވެ.

ރައީސުލްޖުމްހޫރިއްޔާ އިތުރަށް ވިދާޅުވީ ސިޑްސްގެ ގައުމުތަކުގެ ގޮވާލުންތަކަށް އެކަށީގެންވާ ގޮތެއްގައި އިޖާބަ ލިބޭނީ ބައިނަލްއަޤްވާމީ މުޖްތަމައުގައި ބާރުވެރި ފަރާތްތަކަކަށް ސިޑްސް ވެގެންކަމަށެވެ. އަދި އެގޮތުން އދގެ ސަލާމަތީ މަޖިލީހާއި، އިކޮނޮމިކް އަދި ސޯޝަލް ކައުންސިލްފަދަ އދގެ ބާރުގަދަ ގުނަންތަކުން ޖާގަ ހޯދުމަށް ރާއްޖެއިން މަސައްކަތްކުރަމުންދާކަމަށް އެމަނިކުފާނު ވިދާޅުވިއެވެ.

ރައީސުލްޖުމްހޫރިއްޔާ ވިދާޅުވީ ސިޑްސްގެ ގައުމުތަކަކީ ސައިޒުގެ ގޮތުން ކުދި ގައުމުތަކެއް ނަމަވެސް، ޤައުމުގެ ސައިޒަކީ އެ ޤައުމެއްގެ މުސްތަޤްބަލް ކަނޑައަޅާ މިންގަނޑެއް ނޫންކަމަށެވެ. އަދި މުސްތަޤްބަލާއި ގުޅޭގޮތުން ގޮތް ނިންމައި، ކަންކަން ބަދަލުކުރުމުގެ ބާރު ޤައުުމުތަކަށް އޮންނާނެކަންވެސް ރައީސުލްޖުމްހޫރިއްޔާ ފާހަގަކުރެއްވިއެވެ.

ސިޑްސްގެ މި ކޮންފަރެންސަކީ ކޮންމެ ދިހަ އަހަރަކުން އެއްފަހަރު ކުރިއަށްގެންދާ ކޮންފަރެންސެކެވެ. ސިޑްސް4 ގެ މި އަހަރުގެ ޝިއާރަކީ "ޗާރޓިންގ ދަ ކޯސް ޓުވާޑްސް ރިސިލިއަންޓް ޕްރޮސްޕަރިޓީ" އެވެ. މި ޝިއާރާ އެއްގޮތަށް މި އަހަރުގެ ސިޑްސް ކޮންފަރެންސްގައި ތިމާވެށީގެ ގޮތުން ނާޒުކު އަދި ކުދި ޤައުމުތަކަށް ފާގަތިކަމާއި، ވިލުންތެރިކަން ހާސިލްކުރުމަށް މަގުކޮށައިދިނުމަށް މުހިންމު މަސައްކަތްތަކެއް ކުރެއްވުމަށް ވަނީ ނިންމަވާފައެވެ.