ހާލުގައި ޖެހިފައި ތިބި އިންޑިއާގެ މަސައްކަތްތެރިން އަނބުރާ ގައުމަށް ގެންދަނީ

ކޮންސްޓްރަކްޝަންގެ މަސައްކަތަކަށް ރާއްޖެ ގެނެސް ހާލުގައި ޖެހިފައި ތިބި އިންޑިއާގެ އޮޑިއާއަށް ނިސްބަތްވާ މަސައްކަތްތެރިން އަނބުރާ ގައުމަށް ގެންދިޔުމަށް ނިންމާފައިވާކަމަށް ރާއްޖޭގައި ހުންނަ އިންޑިއާގެ ހައި ކޮމިޝަނުން ހާމަކޮށްފިއެވެ.

ކޮންސްޓްރަކްޝަން މަސައްކަތް ކުރާ އަމިއްލަ ކުންފުންޏަކުން ރާއްޖެ ގެނައި ކަމަށް ބުނާ އެ މީހުންގެ ހާލަތު ކިޔައިދީ، އެނބުރި ގައުމަށް ގެންގޮސްދޭން އިންޑިއާ ސަރުކާރުގައި އެދޭ ވީޑިއޯއެއް ވަނީ އާއްމުވެފައެވެ.

މިއާއިއެކު، ރާއްޖޭގައި ހުންނަ އިންޑިއާ ހައި ކޮމިޝަނާ ހަވާލާދީ 'އިންޑިއަން އެކްސްޕްރެސް' ނޫހުން ރިޕޯޓްކުރާ ގޮތުގައި، މި މަސް ނިމުމުގެ ކުރިން އެ މީހުންނަށް ނުދީ ހުރި މުސާރަ ހަމަޖައްސައި ވަރަށް އަވަހަށް އަނބުރާ އިންޑިއާއަށް ގެންދާނެއެވެ.

އެ ނޫހުން ރިޕޯޓްކުރި ގޮތުގައި، އެމީހުންނަކީ އައްޑޫ ގަން އިންޓަނޭޝަނަލް އެއާޕޯޓްގެ މަސައްކަތަކަށް ރެނާޓަސް ކުންފުނިން ގެނައި މަސައްކަތްތެރިންނެވެ.

ޖުމުލަ 196 އިންޑިއާ މަސައްކަތްތެރިން ތިބި އިރު، އެއިން އޮޑިއާއަށް ނިސްބަތްވާ 35 މަސައްކަތްތެރިންނާއި ޓަމިލް ނާޑޫއަށް ނިސްބަތްވާ ހަތަރު މަސައްކަތްތެރިން ހިމެނޭކަމަށާއި، މިދިޔަ ޖޫން މަހު ރާއްޖެ ގެނައި އޮއިޑާއަށް ނިސްބަތްވާ މަސައްކަތްތެރިން މި މަހު 5 ގައި ވަޒީފާއިން ވަކިވެފައިވާކަމަށް ވެސް އެ ނޫހުން ރިޕޯޓްކުރެއެވެ.