އެމްޑީއެންއަށް ފިޔަވަޅު ނޭޅުމުން ގައުމީ ދުވަހުގެ ޖަލްސާ ބޮއިކޮޓް ކުރަނީ!

މޯލްޑިވްސް ޑިމޮކްރަސީ ނެޓްވޯކުން ނެރުނު ރިޕޯޓާއި ގުޅިގެން އެ ޖަމްެއިއްޔާއާއި މެދު ފިޔަވަޅު އަޅާފައި ނުވާތީ ގައުމީ ދުވަހުގެ ޖަލްސާ ބޮއިކޮޓްކުރުމަށް ނިޝާން އިއްޒުއްދީންގެ އިއްޒަތުގެ ވެރިޔާ އޮނަރަބަލް އުމަރު ޒާހިރު ނިންމަވައިފިއެވެ.

މިކަން އެބޭފުޅާ ވަނީ ރާއްޖޭގެ އޮންލައިން މީޑިޔާއެއްކަމުގައިވާ "އަވަސް"އާއި ވާހަކަދައްކަވަމުން ކަށަވަރުކޮށްދެއްވާފައެވެ.

ކުރީގެ ރައީސް މައުމޫންގެ ސަރުކާރުގައި އިސް މަގާާމުތަކެއް ފުރުއްވި އުމަރު ޒާހިރު ވިދާޅުވީ ގައުމީ ދުވަހުގެ ޖަލްސާއަށް ވަޑައިނުގަތުމަށް އެބޭފުޅާ ނިންމަވާފައިވަނީ އެމްޑީއެން ރިޕޯޓާއި މެދު ސަރުކާރުން މިހާތަނަށް އެކަށީގެންވާ ފިޔަވަޅުތަކެއް އަޅުއްވާފައިނުވާތީއެވެ.

އެބޭފުޅާ އިތުރަށް ވިދާޅުވީ އެމްޑީއެންގެ މައްސަލައަކީ ދީނީ ބޮޑު މައްސަލައެއްކަމަށާއި އެފަދަ މައްސަލައަކަށް ސަރުކާރުން ވަރަށް އަވަސް ފިޔަވަޅުތަކެއް އަޅުއްވަންޖެހޭކަމަށެވެ. ނަމަވެސް އެ ޖަމިއްޔާއަށް ފިޔަވަޅު އެޅުމުގައި ފެއިލްވެފައިވާ މަންޒަރު ފެންނަމުންދާ ކަމަށް އުމަރު ޒާހިރު ވިދާޅުވިއެވެ.

"އެހެންވީމަ މިރޭގެ ޖަލްސާ މި 'ބޮއިކޮޓް' ކުރަނީ"، އެބޭފުޅާ ވިދާޅުވިއެވެ.

ފާާހަގަކޮށްލެވޭ ގޮތުގައި އުމަރު ޒާހިރަކީ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހުގެ ކެމްޕެއިން ހަރަކާާތްތަކުގައިވެސް ބައިވެރިވެވަޑައިގެންނެވި ފަރާާތެކެވެ. އެބޭފުޅާ ވަނީ ސަރުކާރުގެ ކޯލިޝަނުން އިންތިޚާބުގެ ދުވަސްވަރު ކާނިވާ ސަރަހައްދުގައި ބޭއްވި ބޮޑު އެއްވުމެއްގައި ވާހަކަފުޅުވެސް ދައްކަވާފައެވެ.

ފޮޓޯ: ވަން އޮންލައިން