މަޚުލޫފްގެ ފާޑުކިޔުންތަކަށް އަދާލަތު ޕާޓީން ރައްދުދީފި
ރައްޔިތުންގެ މަޖިލީހުގެ އިންތިޚާބުގައި ވައިކަރަދޫ ދާއިރާއަށް އަދާލަތު ޕާޓީން ވާދަކުރާ ހުސައިން ޘަގީފް އިހުސާނަށް ޔޫތް މިނިސްޓަރ އަހުމަދު މަޚުލޫފް ވިދާޅުވަމުންދާ ފާޑުކިޔުންތަކަށް އަދާލަތު ޕާޓީން ރައްދުދީފިއެވެ.
އަދާލަތު ޕާޓީން މަޚުލޫފަށް ރައްދު ދީފައިވަނީ ޓްވިޓަރ މެދުވެެރިކުރައްވައެވެ.
އެ ޕާޓީން ބުނީ ޘަގީފަކީ ނިމިދިޔަ ރިޔާސީ އިންތިޚާބުގައި ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ހޮއްވެވުމަށް ބުރަ މަސައްކަތްތަކެއް ކުރެއްވި ޒުވާން ލީޑަރެއް ކަމަށެވެ.
އަދި ފަރުދެއްގެ އާއިލާ މީހުންގެ ސިޔާސީ ފިކުރަށް ބިނާކޮށް ތަފާތުކުރުމުގެ ބޯދާ ވިސްނުމަކީ އެޕާޓީގެ ފިކުރެއް ނޫންކަމަށްވެސް ވަނީ ބުނެފައެވެ.
މިރޭ އޮތް ކެމްެޕެއިން ބައްދަލުވުމެއްގައި މަޚުލޫފްވަނީ ޘަގީފްގެ އާއިލާގެ މެންބަރެއްކަމުގައިވާ އަހުސަންއަށާއި އަދި ބައެއް މީޑިޔާތަކަށް ފާޑުވިދާޅުވެފައެވެ.
އެގޮތުން އަދާލަތު ޕާޓީގެ ލީޑަރ ޝައިޚް އިމްރާން ޖަލުގައި އަނިޔާވެރިކަން ތަހައްމަލްކުރަމުންދިޔަ އިރުގައި ޘަގީފްގެ ބޭބެ އަހުސަން ދިޔައީ ޕީޕީއެމްގެ ރަނިންގްމޭޓް ޑރ.ޝަހީމަށް ކެމްޕެއިން ކުރައްވަމުންކަމަށް ވަނީ ފާހަގަކުރައްވާފައެވެ.
"ވަގުތު ނޫހާއި ވޮއިސްއެމްވީ އާއި މިހުރިހާ އެއްޗެއްގައި މިހިންގާ ހުރިހާ ނުބައި ޖަރީމާއެއް ހިންގަނީ އަހުސަންކަން އަޅުގަނޑުމެންނަށް ނޭނގިގެން ނޫޅެން"، މިނިސްޓަރ މަޚުލޫފް ވިދާޅުވިއެވެ.
މިނިސްޓަރ މަޚުލޫފް މިހެން ވިދާޅުވިނަމަވެސް ވޮއިސް.އެމްވީ ނޫހުގައި އަހުސަންގެ އެއްވެސް ހިއްސާއެއް ނޯންނަކަން ފާހަަގަކޮށްލަމެވެ. އަދި މި ނޫހަކީ މިހާތަނަށް މަޖިލިސް އިންތިޚާބާއި އެހެނިހެން ސިޔާސީ އަދި އިޖްތިމާއީ ކަންކަމުގައިވެސް ކަމުގެ ދެފުށް ފެންނަ ގޮތަށް ޚަބަރުތައް ގެނެސްދޭން މަސައްކަތް ކުރާ، އަދި ކުރާނެ ނޫހެއްކަން އެންމެހާ ކިޔުންތެރިންނަށް ޔަގީންކޮށް އަރުވަމެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
