ދެ އަހަރުތެރޭ 67،000 ޝަހީދުން، ހަނގުރާމަ ހުއްޓާލަން ދެ ފަރާތުން އެއްބަސްވެއްޖެ

ހައްދުފަހަނައަަޅާފައިވާ އިޒްރޭލުން ފަލަސްތީނުގެ ޣައްޒާގައި ހިންގަމުންދާ ގަތުލްއާންމު ހުއްޓާލާ ހަމާސްއާއެކު ކުރަމުން އައި ހަނގުރާމަ ނިމުމަކަށް ގެންނަން އިޒްރޭލާއި ހަމާސް އިން ނިންމާ އެކަން ރަސްމީކޮށް އިއުލާނު ކޮށްފި އެވެ.

އަނިޔާވެރި، އިންސާނިއްޔަތާއި ހިލާފު އެތައް ޖަރީމާއެއް ހިންގި މި ހަނގުރާމަ ނިމުމަކަށް ގެންނަން މި އެއްބަސްވީ އެމެރިކާގެ ރައީސް ޓްރަންޕް ހުށައެޅުއްވި ޕްލޭނެއްގެ ދަށުންނެވެ. ހަނގުރާމަ ހުއްޓާލަން ހަމާސްއާ އިޒްރޭލުން ވެސް އެއްބަސްވެއްޖެކަން ފުރަތަމަ އިއުލާނު ކުރީ ވެސް ޓްރަންޕެވެ.

އޭގެ ފަހުން ހަމާސްއާ އިޒްރޭލުން ވެސް ވަނީ އެކަން އިއުލާނު ކޮށްފަ އެވެ. މިއީ ފިޔަވަހިތަކަކަށް ބަހާލައިގެން މުޅި ހަނގުރާމަ ހުއްޓާލަން ދެ ފަރާތުން އެއްބަސްވެފައިވާ ޕްލޭނެކެވެ.

މި އެއްބަސްވުމުގެ ދަށުން ޣައްޒާގެ ބޮޑު ސަރަހައްދަކުން ޔަހޫދީ އަނިޔާވެރި ސިފައިން ފައިބާން ޖެހޭނެ އެވެ. އަދި ހަމަލާ ބަދަލު ކުރުން ހުއްޓާލާނެ އެވެ.

މީގެ އިތުރުން ކުށެއް ނެތި އިޒްރޭލުގެ ޖަލުތަކުގައި ބަންދުކޮށްފައިވާ އެތައް ހާސް ބަޔަކު މިނިވަން ކުރަން ޖެހެ އެވެ. އޭގެ ތެރޭގައި އިޒްރޭލުން ހިންގި ޝަރީއަތްތަކުގައި ކުށްވެރިވެ ދިގު މުއްދަތުގެ ޖަލު ހުކުމްތައް އިއްވާފައިވާ ފަލަސްތީނުގެ ރައްޔިތުން ވެސް ހިމެނެ އެވެ.

މި އެއްބަސްވުމުގެ ދަށުން މަރުހަލާތަކަކަށް ބަހާލައިގެން ހަމާސްގެ ބެލުމުގެ ދަށުގައި ތިބި ޔަހޫދީން މިނިވަން ކުރަން ޖެހެ އެވެ. އެގޮތުން ހަމާސްގެ ބެލުމުގެ ދަށުގައި މިހާރު ތިބި އެންމެންނާއި މަރުވެފައިވާ މީހުންގެ ހަށިތައް ވެސް ހިމެނެ އެވެ.

އޮކްޓޫބަރު 7، 2023 ގެ ދިފާއު ހަމަލާގެ ފަހުން ވަރަށް ބޮޑަށް މަސްރަހު ގޯސްވުމަށް ފަހު ހަމަލާތައް ބަދަލުކުރުން ހުއްޓާލިއިރު ފަލަސްތީނުގެ 67،000 ވުރެ ގިނަ މީހުން / ކުދީން ވަނީ ޝަހީދުވެފަ އެވެ.

ހަނގުރާމަ ހުއްޓާލުމުގެ އިއުލާނާއެކު ފަލަސްތީނާއި ޚާއްސަކޮށް ޣައްޒާގައި ގެންދަނީ އުފާފާޅު ކުރަމުންނެވެ.