ބައެއް އިސް އޮފިޝަލުންގެ ފޯންކޯލްތައް ޗައިނާއިން އަޑު އަހައިފި: އެމެރިކާ

އެމެރިކާގެ ސިޔާސީ ބައެއް އިސް އޮފިޝަލުންގެ ފޯނުކޯލުތަކެއް ޗައިނާއިން އަޑު އަހައިފިކަމަށް އެމެރިކާއިން ތުހުމަތުކޮށްފިއެވެ.

ދާދިފަހުން އެމެރިކާގެ ބައެއް ޓެލެކޮމް ކުންފުނިތައް ހެކްކޮށްގެން ބައެއް ކޯލުތައް އަޑުއެހި މައްސަލައެއް ފެންމަތިވެފައި ވަނިކޮށް ޗައިނާއަށް މި ތުހުމަތުކުރީ އެމެރިކާގެ ޤައުމީ ސަލާމަތާއި ބެހޭ މުޝީރުގެ ނައިބު، އޭން ނޫބާގަރއެވެ. އޭނާ މިހެން ވިދާޅުވީ ބަޙްރައިންގެ މަނާމާގައި ކުރިއަށްދިޔަ ސަލާމަތީ ކަންކަމާ ބެހޭ ކޮންފަރެންސެއްގެ ހަވާސާގައި ނޫސްވެރިންނާއި ވާހަކަ ދައްކަވަމުންނެވެ.

އެމެރިކާގެ ގިނަ ރައްޔިތުންތަކެއްގެ ފޯނުކޯލުތަކާ ބެހޭ ގިނަ މައުލޫމާތުތަކެއް ހެކަރުން ހޯދާފައިވާނެކަމަށް ބެލެވޭއިރު، މިފަހަރު ހެކަރުން ޓާގެޓް ކުރީ ސީދާ ވަކި ބަޔަކަށް ކަމަށް އޭނާ ތުހުމަތުކުރައްވައެވެ. އެހެންނަމަވެސް ހެކަރުންގެ ޓާގެޓަކަށްވީ ސީދާ ކޮން ބައެއްކަމެއް އޭނާ ހާމައެއް ނުކުރައްވައެވެ.

ޗައިނާއިން ވަނީ މި ތުހުމަތުތައް ދޮގުކޮށްފައެވެ. އެގައުމުން ބުނީ ސައިބަރ ޙަމަލާތަކަކީ އެގައުމުން ކުށްވެރިކުރާ ކަމެއްކަމަށާއި، އެފަދަކަމެއްގައި އެއްވެސް ސިފައެއްގައި ބައިވެރިވުމެއް ނޯންނާނެ ކަމަށެވެ.

ސޯލްޓް ޓައިފޫންގެ ނަން ދީފައިވާ މި ސައިބަރ ހަމަލާތަކާ ގުޅުވައި މިދިޔަ އޮކްޓޫބަރު މަހު ނިއުޔޯކް ޓައިމްސްއިން ބުނީ ޗައިނާގެ ހެކަރުން ޑޮނަލްޑް ޓްރަމްޕްގެ އަރިސް ބައެއް މީހުންނާއި ބައިޑެން ސަރުކާރުގެ އިސް އޮފިޝަލުންގެ ފޯނުކޯލުތައް އަޑު އަހާފައިވާކަމަށެވެ. ހެކަރުން ވަނީ އެމެރިކާގެ ޓެލެކޮމް 8 ކުންފުންޏެއް ހިމެނޭހެން ބައިނަލްއަގްވާމީ ޓެލެކޮމް އިންޑަސްޓްރީގެ ގިނަ ކުންފުނިތަކެއް ހެކްކޮށްފައިކަމަށް އެމެރިކާއިން ތުހުމަތުކުރެއެވެ. އޭގެ ތެރޭގައި ވެރައިޒަން، އޭ.ޓީ. އެންޑް ޓީ އަދި ޓީ މޮބައިލް އާއި ލުމެން ހިމެނެއެވެ.