ބުޅާމަހުން ކާބޯތަކެތި ތައްޔާރުކުރިކަމުގެ ހެތްކެއް ނުފެނުނު: ފުލުހުން

ބުޅާ މަސް އަޅައިގެން ކާބޯތަކެތި ހެދިކަމުގެ އެއްވެސް ކަހަލަ ހެތްކެއް ފެނިފައި ނުވާކަމަށް މޯލްޑިވްސް ޕޮލިސް ސަރވިސްއިން ހާމަކޮށްފިއެވެ.

ބުޅާމަސް ބޭނުންކޮށްގެން ކާބޯތަކެތި ތައްޔާރުކުރާކަމަށް ތުހުމަތު ކުރެވިގެން ބަންގްލަދޭޝްގެ ރައްޔިތެއްކަމަށްވާ އަރަފާތު ހޮސައިން ހޯދުމަށް އިމިގްރޭޝަނުން ނޯޓިން ނެރެފައިވަނީ މިއަހަރުގެ އޮގަސްޓްމަހުގެ 19 ވަނަ ދުވަހުއެވެ. އޭނާގެ މައްޗަށް އޭރު ކުރެވުނު ތުހުމަތަކީ މާލޭގެ އެކި ސަރަހައްދުން ބުޅާ ހިފައި، އޭނާ ދިރިއުޅެމުންއަންނަ ތަނުގައި ބުޅާ ކަތިލުމަށްފަހު، އޭގެ މަހުން ކާބޯތަކެތި ހެދުމެވެ. މިކަން ބައެއް އާއްމުން ވަނީ ސަރުކާރުގެ ކަމާބެހޭ ފަރާތްތަކުގެ ސަމާލުކަމަށް ގެނެސްފައެވެ. އެހެންކަމުން އިމިގްރޭޝަނާއި ފުލުހުން ވަނީ އަރަފާތު ހޯދުމުގެ މަސައްކަތްކޮށް އެންމެފަހުން އޭނާ ހައްޔަރުކޮށް ފުލުހުންގެ ބެލުމުގެ ދަށަށް ގެންގޮސްފައެވެ.

މި މައްސަލަ ބެލުމަށްފަހު ފުލުހުން މިއަދު ބުނީ، ބުޅާމަސް އަޅައިގެން އަރަފާތު ކާބޯތަކެތި ތައްޔާރުކުރިކަމުގެ އެއްވެސް ހެތްކެއް ލިބިފައި ނުވާކަމަށެވެ. އަދި އޭނާގެ މައްޗަށް ޖިނާއީ ތަހުގީގެއް ހިންގޭވަރަށް ހެތްކާއި ގަރީނާވެސް ލިބިފައި ނުވާކަމަށް ފުލުހުން ބުންޏެވެ. އެހެންކަމުން ފުލުހުން ވަނީ އޭނާގެ ތަހުގީގް ނިންމާލާފައެވެ.

މި މައްސަލައިގައި ހައްޔަރުކުރި އަރަފާތު ވަނީ މިދިޔަމަހުގެ ތެރޭގައި ޑީޕޯޓްކޮށްފައެވެ.

އިމިގްރޭޝަނުން ޤަވާޢިދާ ޚިލާފަށް އުޅޭ ބިދޭސީން ހޯދުމުގެ މަސައްކަތުގެ ތެރެއިން، މުޑުދާރުކޮށް ކާބޯތަކެތި ތައްޔާރުކޮށް ވިއްކާ ތަންތަނުން ގިނަ އަދަދެއްގެ ބިދޭސީން ވަނީ ހައްޔަރުކޮށްފައެވެ. މީގެ ތެރޭގައި ގިނަ އަދަދެއްގެ މީހުން ވަނީ ރާއްޖެ ނާދެވޭގޮތަށް ފޮނުވާލާފައެވެ.