ވާހަކަދައްކައިގެން މައްސަލަތައް ހައްލުކުރުމަކީ މުހިންމުކަމެއް- ދިވެހި ޚާރިޖިއްޔާ

އިންޑިޔާއާއި ޕާކިސްތާނުގެ ދެމެދުގައި މިހާރު އުފެދިފައިވާ ނުތަނަވަސްކަން ހައްލުކުރުމަށް، ދެފަރާތުންވެސް ވާހަކަދެއްކުމަކީ މުހިންމުކަމެއްކަމަށް ދިވެހި ޚާރިޖިއްޔާއިން ބުނެފިއެވެ.

ދިވެހި ޚާރިޖިއްޔާއިން މިހެން ބުނެފައިވަނީ މި މައްސަލައާއި ގުޅިގެން މިރޭ ނެރުނު ބަޔާނެއްގައެވެ.

އެބަޔާނުގައި ބުނެފައިވަނީ ދިވެހިރާއްޖެއިން ހުރިހާ ބާވަތެއްެގެ ނިރުބަވެރިކަން އެންމެ ހަރުކަށި އިބާރާތުން ކުށްވެރިކުރާކަމަށާއި އެގޮތުން ބޯޑަރ ހުރަސްކޮށްދޭ ނިރުބަވެރި ހަމަލާ ފަދަ ކަންކަމުގައި، ގައުމުތަކުން އެގައުމުގެ ފަސްގަނޑުގައި ގާއިމްވެތިބޭ ނިރުބަވެރި ޖަމާއަތްތަކާއި ދެކޮޅަށް ހަރުކަށި ފިޔަވަޅު އެޅުމަށް ގޮވާލާކަމަށެވެ.

އަދި ބައިނަލްއަގްވާމީ ފަރާތްތަކާއި، ވަކިން ޚާއްސަކޮށް އަވަށްޓެރި ގައުމުތަކާއި ގުޅިގެން ނިރުބަވެރިކަމާއި ދެކޮަޅަށް ރާއްޖެއިން އަބަދުވެސް މަސައްކަތް ކުރާނެކަމުގެ ޔަގީންކަން ތަކުރާރުކޮށް އަރުވާކަމަށް މި ބަޔާނުގައި ވަނީ ފާހަގަކޮށްފައެވެ.

މި ބަޔާން ނިންމާލަމުން ދިވެހި ޚާރިޖިއްޔާއިން ވަނީ ދެފަރާތުންވެސް ސުލްހަވެރިކަން އިސްކޮށް، ސަރަހައްދުގެ ސަލާމަތާއި ރައްކާތެރިކަން ކަށަަވަރުކޮށްދިނުމަށް ގޮވާލާފައެވެ.

ފާހަގަކޮށްލެވޭ ގޮތުގައި ދިވެހިރާއްޖެއަކީ ފެށުނީއްސުރެ، ޖައްމޫ ކަޝްމީރުގެ މައްސަލައިގައި އިންޑިޔާއާއި ޕާކިސްތާނުން މަޝްވަރާގެ މޭޒަށް އައުމަށް ގޮވާލަމުންދާ ގައުމެކެވެ.