ފަތުރާ ދޮގު ހަބަރުތަކުގެ ސަބަބުން، ދައުލަތަށްވެސް ގެއްލުން ލިބިފައި އެބަހުރި: ރައީސް

ދޮގު ޚަބަރުފެތުރުން ދިވެހި މުޖުތަމަޢުގައި މޫލާފައިވާކަމަށާއި، ފަތުރާ ދޮގުހަބަރުތަކުގެ ސަބަބުން ބައެއް ފަހަރަށް ދިވެހި ދައުލަތަށްވެސް ގެއްލުންތައް ލިބިފައި އެބަހުރިކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ.

ރާއްޖެ އިސްލާމްވި ދުވަހުގެ ރަސްމީ ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ ދޮގުހެދުމުގެ ގެއްލުން އެތައް ގޮތަކުން ބޮޑުކަމަށާއި، އޭގެ ގެއްލުން އެތައް ޖީލަކަށް ދެމިގެންދާކަމަށެވެ.

ރައީސް ވިދާޅުވީ، ހަމައެކަނި ދޮގުހެދުމާއި، ދޮގު ޚަބަރުފެތުރުމަށް ބަލައިލިޔަސް، އެ ދެއްކެނީ އަދުގެ ދިވެހި މުޖުތަމަޢުގައި މޫލައިފައި އޮތް ބޮޑު ހަލާކެއްގެ ވާހަކަކަމަށެވެ. ލިބޭ ވަގުތީ ދުނިޔެވީ މަންފާއަކަށްޓަކައި، ދޮގާއި، އާޑަފުރައްސާރަޔާއި، ނެތިނުބައިކިޔުމުގެ ބާޒާރުގައި، އެތައް ބަޔަކު އަވަދިނެތި އެބައުޅޭކަމަށް މިއަދުގެ ޖަލްސާގައި ރައީސްަ ވަނީ ވިދާޅުވެފައެވެ.

ކުޑަ ލާރިކޮޅަކަށް މިފަދަ ދަށު ދަރަޖައިގެ ޢަމަލުތައް ހިންގޭއިރު، އެ ކުރެވެނީ ކިހާ ނުބައިކަމެއްކަން އަދި އެކަމަކީ މުޖުތަމަޢަށް ލެވޭ ކިހާވަރެއްގެ ނުބައި ޒަހަރެއްކަން އެ މީހުން ހަމަ ނުދަންނަނީތޯ ރައީސް ޑރ.މުޢިއްޒު ވަނީ ސުވާލު އުފައްދަވާފައެވެ.

"މި ބާވަތުގެ ޖަރީމާތަކުގެ ތެރެއިން ހަމައެކަނި ދޮގުހެދުމާއި، ދޮގު ޚަބަރުފެތުރުމަށް ބަލައިލިޔަސް، އެ ދެއްކެނީ އަދުގެ ދިވެހި މުޖުތަމަޢުގައި މޫލައިފައި އޮތް ބޮޑު ހަލާކެއްގެ ވާހަކަ. ދޮގާއި، އާޑަފުރައްސާރަޔާއި، ނެތިނުބައިކިޔުމުގެ ބާޒާރުގައި، އެތައް ބަޔަކު އަވަދިނެތި އެބައުޅޭ. ލިބޭ ވަގުތީ ދުނިޔެވީ މަންފާއަކަށް. ކުޑަ ލާރިކޮޅަކަށް މިފަދަ ދަށު ދަރަޖައިގެ ޢަމަލުތައް ހިންގޭއިރު، އެ ކުރެވެނީ ކިހާވަރެއްގެ ނުބައިކަމެއްކަން ވަޒަންކޮށްލުމުގެ ހެޔޮ ވިސްނުން ހަމަ ނާންނަނީބާ؟"

ރައީސް ޑރ.މުޢިއްޒު ވިދާޅުވިއެވެ.

ދޮގު ވާހަކަތަކުން މުޅި ޤައުމުގެ އަޚްލާޤީ ފޭރާން އިންދިރާސްކޮށްލުމަކީ ބޮޑު ޚިޔާނާތެއްގެ ގޮތުގައި ސިފަކުރައްވަމުން ރައީސް ޑރ.މުޢިއްޒު ވިދާޅުވީ، މިފަދަ ކޮންމެ ކަމަކުން އުފެދޭ ވޭނާއި ކެކުޅުން، އެތައް ޒަމާނަކަށް، އެތައް ޖީލަކަށް ދެމިގެންދާ ކަމަށާއި، ވަކިވަކި މީހުންނަށް ގެއްލުން ލިބޭ ފަދައިން، ވަކިވަކި އާއިލާތަކަށް ގެއްލުން ލިބޭކަމަށެވެ.

ހަމައެއާއިއެކު، ބައެއްފަހަރަށް ފަތުރާ ދޮގު ޚަބަރުތަކުގެ ސަބަބުން، މުޅި ދިވެހި ދައުލަތަށް، އޭގެ އިންތިހާ ގެއްލުން ފޯރާފައިހުރިކަން ރައީސް ޑރ.މުޢިއްޒުގެ ވާހަކަފުޅުގައި އެމަނިކުފާނު ވަނީ ފާހަގަކުރައްވާފައެވެ.

މިއާއިއެކު، ރައީސް ޑރ.މުޢިއްޒު ވަނީ  رَسُوْلُ اللهِ صَلَّى اللهُ عَلَيْهِ وَسَلَّمَ ދުނިޔެއަށް ގެނެސްދެއްވި މޫރިތި، ރިވެތި އަޚްލާޤީ ސިފަފުޅުތަކުން ނަމޫނާ ލިބިގަނެ،  އަނެކުންނަށް، އަނެކުންގެ ހިތަށް ފިނިކަމާއި ހަމަޖެހުން ގެނެސްދޭ ފުރިހަމަ މުއުމިނަކަށް ވުމަށް އެދިވަޑައިގެންފައެވެ.