އަސާސީ މުދާ އެތެރެކުރަން އިންޑިއާއިން ކޯޓާ އިތުރުކޮށްދީފި

މި އަހަރާއި އަންނަ އަހަރަށް ރާއްޖެއަށް ބޭނުންވާ އަސާސީ މުދާ އެތެރެކުރުމަށް އިންޑިއާއިން ދީފައިވާ ކޯޓާ އިތުރުކޮށްދީފިއެވެ.

ރާއްޖޭގައި ހުންނަ އިންޑިއަ ހައިކޮމިޝަނުން ބުނެފައިވަނީ، މިއީ ރާއްޖެޢ އިންޑިއާއާ ދެމެދު 1981ގައި ހަދާފައިވާ 'އެގްރިމެންޓް އޮން ޓްރޭޑް ކޯޕަރޭޝަން'ގެ ދަށުން މިހާތަނަށް ކޯޓާ އެންމެ ބޮޑަށް އިތުރުކުރި ފަހަރުކަމަށެވެ. އެގޮތުން ޚާއްޞަ އަގުތަކެއްގައި ރާއްޖެއަށް ބޭނުންވާ އަސާސީ މުދާ ލިބޭނެކަމަށްވެސް ހައިކޮމިޝަނުން ވަނީ ބުނެފައެވެ.

އަސާސީ މުދަލުގެ ގޮތުގައި އިންޑިޔާއިން ޢާންމުގޮތެއްގައި ރާއްޖެއަށް އެތެރެކުރަނީ ފިޔާ، ހަނޑޫ، ހަކުރު، ފުށް، އަލުވި، ބިސް އަދި މުގެވެ. މި ބާވަތްތަކުގެ ކޯޓާއަށްވަނީ 5 އިންސައްތަ އިތުރުކޮށްދީފައެވެ. މީގ އިތުރުން ހިލައާއި ހިލަވެލީގެ ކޯޓާއަށް ވަނީ 25 އިންސައްތަ އިތުރުކޮށްދީފައެވެ.

އިންޑިޔާއިން ކޯޓާ އިތުރުކޮށްދީފައިވާ ގޮތުގެ ތަފްޞީލް

■ ބިސް: 428 މިލިއަން

■ އަލުވި: 21،000 މެޓްރިކް ޓަނު

■ ފިޔާ: 36،000 މެޓްރިކް ޓަނު

■ ހަނޑޫ: 124،000 މެޓްރިކް ޓަނު

■ ފުށް: 109،000 މެޓްރިކް ޓަނު

■ ހަކުރު: 64،000 މެޓްރިކް ޓަނު

■ މުގު: 224 މެޓްރިކް ޓަނު

■ ހިލަ: އެއް މިލިއަން މެޓްރިކް ޓަނު

■ ހިލަވެލި: އެއް މިލިއަން މެޓްރިކް ޓަނު

މިކަމާ ގުޅިގެން ރާއްޖޭގެ ފޮރިން މިނިސްޓަރު މޫސާ ޒަމީރު ވަނީ ޝުކުރުގެ މެސެޖެއް ޕޯސްޓް ކުރައްވާފަ އެވެ.

މިނިސްޓަރު ޒަމީރުގެ އެ ޕޯސްޓާ ގުޅުވާލައްވައި އިންޑިޔާގެ އެކްސްޓާނަލް އެފެއާޒް މިނިސްޓަރު ޑރ. އެސް ޖައިޝަންކަރު މަރުހަބާ ވިދާޅުވުމާއެކު އަބަދު ވެސް "ނޭބަހުޑް ފަސްޓް" ޕޮލިސީގެ ދަށުން އިންޑިއާ އަވައްޓެރިންނާއެކު ދެމި އޮންނާނެ ކަމަށް ވިދާޅުވެފައި ވެއެވެ.