އަންހެނަކު ރަހީނު ކުރުން: ފިރިހެން މީހާ ހައްޔަރު ކޮށްފައިހުއްޓާ ހާލު ދެރަވެގެން އަނެއްކާވެސް އައިޖީއެމްއެޗަށް

ރޭ މާލޭގައި އަންހެނަކު ރަހީނުކޮށް ބިރުދެއްކި ފިރިހެންމީހާ ހައްޔަރު ކޮށްފައި ވަނިކޮށް ހާލު ދެރަވެގެން އަނެއްކާވެސް ފަރުވާއަށް އައިޖީއެމްއެޗަށް ގެންގޮސްފިއެވެ.

ރޭ މާލޭގެ ގެއެއްގައި އަންހެނަކު ރަހީނުކޮށް ބިރުދެއްކުމަށްފަހު އެ ފިރިހެން މީހާ މަސައްކަތް ކުރީ، އަންހެން މީހާ ގޮވައިގެން ފިލާށެވެ.

އެގޮތުން އަންހެން މީހާގެ ކަރުގައި ވަޅި ޖައްސައިގެން ސައިކަލަކަށް އަރުވައި، ސައިކަލު ދުއްވަން އަންހެން މީހާއަށް މަޖުބޫރުކުރުވިއެވެ. ނަމަވެސް، އެ ސަރަހައްދުން އޭނާ ދިޔުމުގެ ކުރިން ފުލުހުން ވަނީ ސައިކަލުގެ ފަހަތުގައި ފިރިހެން މީހާ އިންދާ ބާރުގެ ބޭނުން ކޮށްގެން އޭނާ ބިންމައްޗަށް ވައްޓާލައިފައެވެ.

މި މައްސަލާގައި ރަހީނު ކުރެވުނު އަންހެން މީހާއަށް އައިޖީއެމްއެޗްގައި ފަރުވާ ދެމުންދާއިރު، އޭނާގެ ހާލު ރަނގަޅު ކަމަށާ، އަދި ފިރިހެން މީހާގެވެސް ހާލު ރަނގަޅު ކަމަށް ފުލުހުން ވަނީ ކުރިން މައުލޫމާތު ދީފައެވެ.

މިރޭ ފުލުހުން ބުނީ، ފިރިހެން މީހާއަށް އޭޑީކޭގައި ފަރުވާ ދިނުމަށްފަހު ދޫކޮށްލުމުން އޭނާ ހައްޔަރު ކުރެވުނު ކަމަށެވެ.

އެހެންނަމަވެސް، ހައްޔަރު ކޮށްފައި ހުއްޓާ އޭނާ ހޮޑުލާތީ އަނެއްކާވެސް އައިޖީއެމްއެޗަށް ގެންގިސްފައިވާ ކަމަށާ، އޭނާގެ ހާލަތު އިތުރަށް ބެލުމަށްޓަކައި މިވަގުތު ބާއްވާފައި އޮތީ އައިޖީއެމްއެޗްގެ އޮބްޒަވޭޝަންގައި ކަމަށް ފުލުހުން ބުނެފައިވެއެވެ.