ބްރިޖްމަތީ ހިނގި އެކްސިޑެންޓުގައި އަނިޔާވި މީހުން ހޮސްޕިޓަލަށް ގެންގޮސްދިނީ ދާހިލީ ވަޒީރުގެ ކާރުކޮޅުގައި
ލިޔުންތެރިޔާ
އަބްދުﷲ ހުސައިން
މިއަދު އިރުއޮއްސުނުފަހުން ސިނަމާލެ ބްރިޖްމަތީ ހިނގި އެކްސިޑެންޓެއްގައި އަނިޔާވި މީހުން ދާހިލީ ވަޒީރު އަލީ އިހްސާނުގެ ކާރުކޮޅުގައި ހޮސްޕިޓަލަށް ގެންގޮސްދީފިއެވެ.
ފުލުހުން ބުނީ 18:35 ހާއިރު ބްރިޖްގައި ދެ ސައިކަލެއް ޖެހި އެކްސިޑެންޓެއް ހިނގާފައިވާކަމުގެ މައުލޫމާތު އެ އިދާރާއަށް ލިބިފައިވާކަމަށެވެ. މި އެކްސިޑެންޓުގައި އެކެއްގެ މޫނުމަތިން ފަލައިގެން ގޮސްފައިވާއިރު، އަނެއް މީހާގެ ގައިގެ އެކި ތަންތަނުން ވަނީ މަށައިގެން ގޮސްފައެވެ.
ފުލުހުން ބުނީ އެކްސިޑެންޓްގައި އަނިޔާވި މީހުން ހޮސްޕިޓަލަށް ގެންގޮސްދީފައިވަނީ ދާހިލީ ވަޒީރު އަލީ އިހްސާންގެ ކާރުކޮޅުގައެވެ. ވިޑިއޯއިން ފެންނަ ގޮތުގައި އަނިޔާވި މީހުން ކާރަށް އެރުވުމުގައި ދާހިލީ ވަޒީރު އަލީ އިހްސާން އަމަލީގޮތުން އުޅުއްވާތަން ފެނެއެވެ.
އެގޮތުން ކާރު ދޮރުހުޅުވައިދިނުމަށްފަހު އަވަހަށް ކާރަށް އެރުމަށް އިރުޝާދު ދެއްވާތަން ފެނެއެވެ.
ވަޒީރުގެ ކާރުކޮޅުގައި އެމީހުން ގެންގޮސްފައިވަނީ ހުޅުމާލެ ހޮސްޕިޓަލަށެވެ.
ފުލުހުން ބުނީ ދެ ސައިކަލަށްވެސް އެކިވަރުގެ ގެއްލުންވެފައިވާކަމަށާއި އެ އެކްސިޑެންޓްގެ މައްސަލަ ފުލުހުން ބަލަމުން އަންނަ ކަމަށެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
