ފުލުހުންގެ ބޮޑީ ކެމް ގަންނަން ބިޑު ކެންސަލްކޮށް، ބަޔަކަށް 66 މިލިއަން ރުފިޔާ ދިން މައްސަލައެއް

ފުލުހުންނަށް ބޭނުންވާ ބޮޑީ ވޯން ކެމެރާ ނުވަތަ ބޮޑީ ކެމެރާ ގަތީ ބިޑަށް ލުމަށްފަހު ކެންސަލްކޮށް، ސިންގަލް ސޯސް ޕްރޮކިއުމަންޓް އުސޫލުގެ ދަށުން ބަޔަކަށް 66 މިލިއަން ރުފިޔާ ދީގެން ކަމަށް މިއަދުގެ މާލިއްޔަކު ކޮމެޓީގައި ބުނެފިއެވެ.

ކޮމިޝަނާ އޮފް ޕޮލިސް (ސީޕީ)ގެ މަގާމުގައި މުހައްމަދު ހަމީދު ކުރިން ހުންނެވިއިރު ހިންގި މި މުއާމަލާތާއި ގުޅޭ ގޮތުން މިއަދުގެ މާލިއްޔަތު ކޮމެޓީގެ ސަބް ކޮމެޓީގައި ވާހަކަފުޅު ދައްކަވަމުން މަޖިލީހުގެ ނައިބު ރައީސް އަޙްމަދު ނާޒިމް ވިދާޅުވީ، ކޮމިޝަނަރުކަމުގައި ހަމީދު ހުންނެވިއިރު ފުލުހުންނަށް ބޮޑީ ވޯން ކެމެރާ ގަންނަން ހަވާލުކުރީ ސިންގަލް ސޯސް ޕްރޮކިއުމަންޓް އުސޫލުގެ ދަށުން ކަމަށާއި، އެ މަސައްކަތް އެ ކުންފުންޏާއި ހަވާލުކުރި 66 މިލިއަން ރުފިޔާއަށް ކަމަށް ވެސް ނާޒިމް ވިދާޅުވިއެވެ.

އެ މުއާމާލާތުގައި ޝައްކުތަކެއް ހުރެގެން އެ މައްސަލަ ބެލި ކަމާށާއި، އެކަމުގައި އެއްވެސް މައްސަލައެއް ނެތް ކަމަށް ކުރިން ކަނޑައަޅައިފައިވީ ނަމަވެސް އެ މައްސަލަ އަނެއްކާ ވެސް ފެންމަތިވީ އޭރު އެ ބޮޑީ ކެމްތައް ގަންނަން ހަވާލުކުރި ކުންފުނީގެ މަގާމަކަށް، ފުލުހުންގެ މަގާމުން ރިޓަޔާކުރެއްވުމަށް ފަހު އޭރުގެ ސީޕީ ހަމީދު ވަޑައިގެންނެވުމުންނެވެ.

އެހެންވީމާ އެ މަގާމުގައި ހުންނެވިއިރު އެވާޑްކުރި ކޮންޓްރެކްޓެއް ލިބުނު ކުންފުންޏަކަށް ވަޒީފާއަށް ވަޑައިގެން އެ ޕްރޮޑަކްޓްތައް ޕްރޮމޯޓްކުރުމުގައި އުޅުއްވާތީ ހުށަހަޅާފައި އޮތް މައްސަލައެއް މި މައްސަލައަކީ

ރައްޔިތުންގެ މަޖިލީހުގެ ނައިބު ރައީސް އަޙްމަދު ނާޒިމް

ނާޒިމް ވަނީ އެހެންކަމުން އެ މުއާމަލާތުގައި ޕްރޮފެޝަނަލް މިސްކޮންޑަކްޓް ނޫނީ މޯރަލް އިޝޫސް ހުރި ކަމަށް ބެލެވޭ ކަމަށް ފާހަގަކުރައްވައި، އެކަމަކީ  ގާނޫނު ތަންފީޒުކުރާ އިދާރާތަކުން އިތުރަށް ބަލަންޖެހޭ މައްސަލައެއް ކަމަށް ވިދާޅުވެފައެވެ.

ކުރީގެ ސީޕީ ހަމީދު، ދިވެހި ފުލުހުންގެ ޚިދުމަތުން ޝަރަފުވެރިކަމާއި އެކު ރިޓަޔާކުރެއްވީ 2023 ވަނަ އަހަރުގެ ނޮވެމްބަރު މަހުގެ 15 ވަނަ ދުވަހުއެެވެ. ފުލުހުންގެ ޚިދުމަތަށް ބޮޑީ ކެމް ތައާރަފްކޮށްފައިވަނީ 2022 ވަނަ އަހަރުގެ ފެބްރުވަރީ މަހުގެ ތެރޭގައެވެ.