ފިނޮޅަށް ދިޔަ ފަހުން ގެއްލުނު މީހާ ހޯދަން ބޮޑު ސަރަޙައްދެއް ބަލައިފި

ކ. ހުވަފެންފުށި ދެކުނުން ހިއްކާފައިވާ ފިނޮޅަކަށް ޕިކްނިކް ދަތުރެއްގައި ގޮސް އުޅެނިކޮށް ގެއްލުނު 43 އަހަރުގެ ތަސްލީމް މުޙައްމަދު (މ. އަސަރީ ހަނދާން) ފެނޭތޯ ބޮޑު ސަރަޙައްދެއް ބެލިއިރުވެސް އަދިވެސް ނުފެނި ވާކަމަށް އެމްއެންޑީއެފުން މަޢުލޫމާތު ދީފިއެވެ.

އެމްއެންޑީއެފުން ބުނިގޮތުގައި މިހާތަނަށް ފިނޮޅު ވަށައިގެން 5،000 އަކަފޫޓުގެ ސަރަޙައްދެއް ބަލާފައިވެއެވެ. މީގެ އިތުރުން، ފިނޮޅު ކައިރިން ކަނޑުގެ އަޑިން ޑައިވްކޮށްގެން 3،000 އަކަފޫޓުގެ ސަރަޙައްދެއްވެސް ބަލާފައިވާކަމަށް އެމްއެންޑީއެފުން މަޢުލޫމާތު ދިނެވެ.

ތަސްލީމް އެންމެ ފަހުން ފެނިފައިވަނީ ބުރާސްފަތި ދުވަހުގެ ހެނދުނު 10:00 އާއި 11:00 އާ ދެމެދުގައި ކަމަށް އޭނާއާއެކު ދަތުރުގައި ދިޔަ މީހުން ބުނެފައިވެއެވެ. ނަމަވެސް، އޭނާ ގެއްލުނީ މޫދަށް ކަމެއް މިހާތަނަށް ކަށަވަރެއް ނުވެއެވެ. މި ސަބަބަށްޓަކައި، މި އޮޕަރޭޝަން ލީޑްކުރަނީ ފުލުހުންނެވެ.

ފުލުހުންގެ ފަރާތުން ވަނީ ތަސްލީމްއާ ގުޅޭ އެއްވެސް މަޢުލޫމާތެއް ލިބިފައިވާ ފަރާތްތަކުންނާއި، އެ ފިނޮޅަށް ބުރާސްފަތި ދުވަހާއި އޭގެ ކުރީ ދުވަހު ދަތުރު ކުރި ފަރާތްތަކުން ހިންމަފުށި ޕޮލިސް ސްޓޭޝަނަށް (9794639) ގުޅައި މަޢުލޫމާތު ދިނުމަށް އެދިފައެވެ.

އެމީހާ ހޯދުމުގެ މައްސަލަތް ހުއްޓައިނުަލައި އަދިވެސް ދަނީ ކުރިއަށެވެ.