އާ ރެކޯޑެއް؛ އެއްދުވަހު 8،900 ފަތުރުވެރިން

މިއހަރުގެ މިހާތަނަށް 236730 ފަތުރުވެރިން ރާއްޖެއަށް ޒިޔާރަތްކޮށްފައިވާއިރު މި މަހުގެ 3 ވަނަ ދުވަހު 8900 ފަތުރުވެރިން ރާއްޖެއައިސް ކޮވިޑުގެ ފަހުން އެއްދުވަހު އެންމެ ގިނަ ފަތުރުވެރިން އައި ދުވަހަކަށް އެދުވަސް ވެއްޖެއެވެ. މިއީ ތާރީހީ ރެކޯޑެކެވެ.

ފަތުރުވެރިކަމާ ބެހޭ ވުޒާރާގެ އެންމެ ފަހުގެ ތަފާސްހިސާބުތައް ދައްކާ ގޮތުގައި މީގެ ކުރިން ކޮވިޑަށް ފަހު އެންމެ ގިނަ ފަތުރުވެރިން ޒިޔާރަތްކޮށްފައިވަނީ 23 ޑިސެމްބަރު 2023 ގައެވެ. އެ ދުވަހު 8054 ފަތުރުވެރިން ޒިޔާރަތްކޮށްފައިވާ ކަމަށް ތަފާސް ހިސާބުތަކުން ދައްކައެވެ.

ކޮވިޑްގެ ކުރީގެ ރެކޯޑުތަކަށް ބަލާއިރު އެއްދުވަސް ތެރޭގައި އެންމެ ގިނަ ފަރތުރުވެރިން ރާއްޖެއަށް  ޒިޔާރަތްކޮށްފައިވަނީ 2019 ވަނަ އަހަރުގެ ތެރޭގައެވެ. އެދުވަހު 9000 ފަތުރުވެރިން ރާއްޖެއަށް ޒިޔާރަތްކޮށްފައި ވެއެވެ.

ފަތުރުވެރިކަމާއި ބެހޭ ވުޒާރާއިން އެންމެފަހުން އާއްމުކުރި ތަފާތު ހިސާބުތަކަށް ބަލާއިރު މިހަފުތާގެ އަންގާރަ ދުވަހުގެ ނިޔަލަށް 236،730 ފަތުރުވެރިން ވަނީ ރާއްޖެއަށް ޒިޔާރަތްކޮށްފައެވެ. މިއީ މިދިޔަ އަހަރުގެ މި މުއްދަތާ އަޅާބަލާއިރު %13.7 އިތުރު އަދަދެކެވެ. އެއީ މިދިޔަ 2023 ވަނަ އަހަރުގެ މި މުއްދަތުގައި ރާއްޖެއަށް ޒިޔާރަތް ކޮށްފައިވަނީ 208،162 ފަތުރުވެރިންނެވެ.

މިއަހަރުގެ މިހާތަނަށް ދުވާލެއްގެ މައްޗަށް އެވްރެޖުކޮށް 6،398 ފަތުރުވެރިން ރާއްޖެއަށް ޒިޔާރަތް ކޮށްފައިވާއިރު އެންމެފަހުގެ ތަފާސް ހިސާބުދައްކާ ގޮތުން މިއަހަރުގެ މިހާތަނަށް އެއްޤައުމަކުން އެންމެ ގިނަ ފަތުރުވެރިން ޒިޔާރަތްކޮށްފައިވަނީ ޗައިނާއިންނެވެ. ޗައިނާއިން 28،304 ފަތުރުވެރިން ޒިޔާރަތް ކޮށްފައިވާއިރު ދެވަނައަށް ޒިޔާރަތްކުރި އިޓަލީ ވިލާތުން 23،749 ފަތުރުވެރިން ޒިޔާރަތްކޮށްފައިވެއެވެ. އަދި މި ލިސްޓުގެ ތިންވަނާގައި އުޅޭ ރަޝިޔާއިން  23،399 ފަތުރުވެރިން ޒިޔާރަތްކޮށްފައިވެއެވެ.

އެންމެފަހުގެ ތަފާސް ހިސާބުތަކުން ދައްކާ ގޮތުގައި އެންމެ ގިނަ ފަތުރުވެރިން އައި ޤައުމެއްގެ ގޮތުގައި ޗައިނާ ހިމެނިފައިވާ އިރު ރައީސް ޑރ.މުހައްމަދު މުއިއްޒު ޗައިނާއަށް ކުރެއްވި ދަތުރުފުޅުގައި ވަނީ ރާއްޖޭގެ ފަތުރުވެރިކަމުގެ އެއްވަނަ މާކެޓެއްގެ ގޮތުގައި ޗައިނާ ހަދައިދެއްވުމަށް ޗައިނާގެ ކަމާއިބެހޭ ފަރާތްތަކުގައި އެދިވަޑައިގެންފައެވެ.